Mizoram MLA inthlan leh Hindutva thuruk

Hindutva: Hindutva awmzia chu “Hindu nih pumhlumna” tihna a ni ber mai. A chipchiarin kan sawi hman hrih lo va. Hindutva laimu erawhchu India ram pumpuiah hian Hindu sakhua leh nunphung zawng zawng hi zawm vek ni rawh se tih hi a ni mai. (Hindu-ah hian an culture leh sakhua ṭhen hran theih a ni lo. An sakhua hi an culture a ni a, an culture hi an sakhua a ni!)

Hindutva zirtirna thenkhat:

1. India (Bharat) hi Ram thianghlim atana neitu sakhuate chauh India ramah an cheng tur a ni. Muslim ho ram thiang­hlimchu Mecca a ni a, Kristian ho chuan Jerusalem an nei bawk a, chuvangin heng sakhuate hi India ramah an awm thei lo.

2. India Independence tirh ata enga ti nge Congress sawrkar hian sakhaw tlem zawk Muslim leh Kristiante tlawna mi tam ber Hindu sakhua zuitute min ngaihthah bik? Hindustan hi Hindute ram a ni.

3. Khawvel ram ropuite anga India ram tiropui tur chuan Hindu hlang chenna ram atan siam a ngai.

Hindutva atchilha chawisangtu berte chu RSS ho hi an ni. India Independence hma daih aṭangin ṭan an lo la tawh thin a, mahse, sawrkarah thuneihna an neih loh avangin hma an sawn thei lo. Hnam tlem leh hnuaihnung zawk chawisan tumna policy hi Hindu sakhua zirtirna kalh tlat a nih avangin Mahatma Gandhi-te kha an haw em em a, a thattu Nathuram Godse-a pawh kha RSS ruh tak a ni. He an rilru put hmang hian BJP/RSS ten eng vanga Congress party hi paihthlak tum tlat thin nge an nih a tichiang viauin a lang. (A ziaktu hi eng party mah ka ni lo aw)

RSS an ṭhangharh: An thil duh tihlawh­tling turin sawrkarah thuneihna chan a ngai tih hriain Political Party Jana Sangh party an din a, chu chu a hnuah Janata Party tiin, a hnu lehah Bharatiya belhin Bharatiya Janata Party (BJP) an lo ti ta a ni.

BJP hmalaknat awktarh pathum:

1. Development

2. Congress sawrkar paihthlak

3. Hindutva (Hei hi an thil tum laimu ber ni mah se an zep tlat a, an puanhnuaiah an thukru ṭhin!)

India ram “System” hrang hrang Hindutva mila thlakthleng tum mek a ni:

India rama a lal ber pathumte hi RSS bela chhum hmin diam tawh (RSS Swayamsevaks) an ni vek:

1. President: Ram Nath Kovind

2. Vice President: M. Venkaiah Naidu

3. Prime Minister: Narendra Modi

India ram state Governor zawngzawng 70% dawn lai hi RSS/BJP mi leh sa vek an ni. Mizoram Governor Kumman­amRajasekharan pawh hi chung zinga mi chu a ni.

BJP hian Parliament in hnih hi an control hun chuan Hindu ho duh ang thlapin India Danpui (constitution) tih­danglamte pawh hi thil theih loh a ni lo.

University leh Research Institute pawimawhah an mi leh sa an dah mek dan te, Indian History Hindu thlirna aṭanga an ziah ṭhat sikul tam taka an zirtir tan mekte, India ram khawpui pawimawh tak tak Hindu hminga thlak an tum mekte hi a chipchiarin kan sawi hman lo.

North-East lamah: India hmar-chhak ho hi tun hmaa Congress chakna leh Kristian tamna bial, India ram chhunga state hnufual ber berte awmna a nih avangin BJP tan beih an itawm hle ang. Tichuan, kum 2016, May 24-ah North-East Democratic Alliance (NEDA) rawn dinin, Congress ni lo tualṭo party-te member atan an rawn thlem thlu ta hlawm a ni. Mizoram aṭang pawhin kan tualṭo party lian ber Mizo National Front chu NEDA member a ni ve nghe nghe.

NEDA - BJP Lalna 'Kailawn': Hmar-chhak state pariatte zingah Mizoram tih loh chu a mal te tein BJP lakah an tlu ta zawih zawih mai! Tunah hian heng state pariat zinga pasarihah BJP chuan sawrkarna a chang ta! Hmarchhak state zinga Kristian state tia chhiar

ṭhin pathum zinga pahnihah BJP an lal ta bawk. Nagaland-ah chuan MLA 60 ah 12 chauh hmuin BJP chu sawrkar siamtuah a tel tho a, Meghalaya-ah phei chuan MLA 2 chauh neiin BJP an sawrkar tho!! Mizoramah pawh BJP lalna hnuaia Krismas hmantir min tumna chu NEDA kaltlang tho hian a ni. I harh ang u!

Kan politician-te thusawi hi rintlak a tlem khawp mai! Mipuite i mawl lovang u! Internet leh khawvel news hre phak tan chuan NEDA kalphung leh BJP sawrkarna KAILAWN a nihzia chu chal anga chiang a ni!

Tun aṭanga kum 100 an thlir: Mizoram hi Hindu sakhua leh Culture hnuaia dah duhtute hi an hmanhmawh lo. Tun

aṭanga kum 100 velah chuan an tum hi tihhlawhtlin ngei an inring. Tuna Mizo dam mekte hi Hindu-a min inlehtir an tum lo. Kan ramah Kristian sakhua rawn nekchep an tum nghal ngawt dawn lo bawk. Mahse, zawi zawiin, sawrkar hmalaknain kan nunphung peng hrang hrang hi Hindu zirtirna zulzuiin an siam rem hret hret ang a, tun aṭanga chhuan eng emaw hnuah chuan kan hriat loh karin Mizote hi Hindu nunphung ṭawmin kan nung suau suau thei tawh dawn tlat!

Tun MLA inthlan hi an kaw hreuh ṭanna hmanrua chauh a ni. Sawrkarna an chang emaw chang lo emaw, min la bei zel dawn chauh! Tun inthlan hi Politics thil mai ni lovin Thalarau thil a ni tih hi Mizo Kristiante hian kanhriatthiamavapawimawh em!

TUN HI KAN RAM TAN THEIH­TAWPA KAN TAWNGTAI HUN A NI E!

- Dr Ramdinthara Sailo