Pathian leh kan ram tan le

November 28 a hnai tual tual, Mizo thinlung pu tak tak leh tak tak lote indona ni a inher chhuak dawn ta. Keini Mizo thinlung pu ruh tlatte chuan MNF lo chu vote tur kan nei lova, ka Mizo pui zawng zawngte min vote pui turin ka sawm nghal che u. MNF chiah hi kan ram dinchhuahna tur chu a lo ni.

Tun hnia MNF an selna ve ber chu ‘Vibrant Chakma nation’ tih kha a ni a, kha kha MNF hi a Chakma ta em em tihna lam a ni lo. Saw lai Chakma rama awmte sawn vote an neih tho tho avangin Mizo party vote tura va sawmna a ni a, chu chu Mizo mipuite hian kan hrethiam lova, kan hre ṭhelh deuh hlek a ni. MNF hi Chakma party angin kan puh hi a dik lova, Mizo thisenin a hrin chhuah party ngat a ni. Chakma ramah ram kan zauhna ṭawngkam hi an lo la kawi a, a la kawitute pawh hi tu dang ni lovin vai pawl Congress lam ṭangte bak an ni lovang chu.

MNF an sawi chhiat lehna MNF President-in kawng chhawng a sawite hi thil tak tak a ni.

Congress CM Pu Lal Thanhawla khan “Silchar pawh pel lovin kawng chhiat thu sawi suh se,” a tih ang khan kawng chhawng siam theiha ring lotu hi chu Silchar pawh pel lo an nih ka ring. Heti hian sawi ve thung ila, “Silchar pawh pel lovin kawng chhawng a siam theih loh thu hi sawi sawi suh se,” kan ti ve teh ang.

Pu Zorama vision hi mipui nawlpui hian kan man thiam lova kan nui mai mai a ni. Aizawl khawpuiah hian kawng chhawng hi siam theih a nih bakah Traffic Jam awm lohna pawh a siam thei tak tak ang tih a rinawm. Pu Zorama sawi ang hian Aizawla Traffic Jam kalsanin kawng chung lamah kan tleh zel zel dawn a, chu chu tunah tih theih loh pawh ni se sorkar aṭanga kum thumah tih theih a tiam a, a ti ngei ang tih hi a rin­awm viau bawk a ni.

EVM rinhlelh pawh kha Pu Zorama thlirna aṭang chuan âwm tak a ni. A chhan chu tunlai ṭhangthar thiamna internet-a google-ah pawh hian EVM hi tihdanglam (hack) theih a nih thu hi hmun tam taklah hmuh tur a awm a ni.

Kum 2008 leh 2013 inthlanah khan Pu Zorama sawi ang khan Congress thiltihtheihnain (Central-ah an sorkar lai a ni) EVM kha khawih chingpen a ni lo tih tuin nge sawi thei? Chuvangin, Pu Zorama thusawi hi a dik ngei ang tih a rinawm.

Engpawh chu lo ni se kum 2018-ah hi chuan Mizo hnam thisenin a hrin chhuah MNF-ah hian vote ila, “Pathian leh kan ram tan” tih hi i vawng nung zel ang u.

- Lalnunmawia (Mawitea)