Sorkar rin ngam

Kar leh maiah kan inthlang dawn ta a. Tun ṭum inthlanpui hi kum nga mai ni lo, a hnu zel nghawng ṭha leh ṭha lo nei tur a nih avangin puitling chin chu i fimkhur hle ang u. Kan her sual leh vaih chuan her dik a harsa tawh dawn.

Mi rethei leh kut hnathawkte a nghawng na ber dawn lehnghal. Kan sakhua leh kan hnam a nghawng nasa bawk dawn hle a ni. Kum danga kan inthlan ang mai a ni lo vang.

Party candidate-te hi lehkhathiam tak tak, fel tak tak an tam tawh khawp mai. A pawimawh ber ram hruaitu lu ber tur, Chief Minister tur pathumte hi kan hre ṭheuh a. Tunge rinngam tur - mi taima, ṭawng thla mai mai lo, huaisen leh thuzuk lo mi kan ngaihtuah a ṭul ta ber a ni.

Party MLA-te chu ṭha hle pawh ni se Chief Minister ber a rintlak tak zet loh chuan Mizoram hi a chhe chak khawp ang. Kuthnathawkte tan thawh hah manhla lo, thlaithar hralhna awm chuang lo; tunhmaa kuthnathawkte mang­ang Pu Thanbanglova hova kawngzawh ang kha a thleng leh ang tih a hlauhawm. ZPM-in sawhthing quintal khat Rs. 5,000-a lei a tum ringawt pawh hi hmasawnna namai lo tak a ni. Hmuhphiah ro, quintal khat Rs. 10,000 te leh thildang chu thukhat ni se.

A ngaihtuahtu pawlte hi Mizopaah chuan mi puitling leh mi rintlak tak vek an ni hi a vanneihthlak. ZPM-in Chief Minister tura an vawrh chhuah Pu Lalduhawma, IPS (rtd) hi Lok Sabha MP lo ni tawh leh MLA lo ni tawh, mi tumruh, mi chak, huaisen a ni. A sorkar uap tlattu tur ‘Val Upa Council’ an tih sorkar khalhngiltu turte hi mi lehkhathiam, chinchang hria an ni. An hmingte hi sawi law law ila -

Chairman: Pu Lalfakzuala, IAS (rtd). Ex-Chief Secretary;

Vice Chairman: Pu F. Lalremsiama, IPS (rtd). Ex-IGP, Ex-MLA

Secretary: Prof. Thangchungnunga

Executive Member-te - 1. Pu Rinsanga IAS (rtd) 2. Pu K.L. Lianchia, Ex-Minister 3. Pu Bualhranga, Ex-MLA 4. Dr. B. Thangdailova 5. Pu C. Laitanga 6. Rev. Robawiha

24th October, 2018-a ZPM candi­date-te rinawmna chhechhama thutiam hriatpuitu, lehkhaa an hming ‘countersigned’ hnantute -

Thu tiamtirtu Pu Lalfakzuala, Chair­man, Val Upa Council

Hriatpuitute: 1. Commissioner Lal­kiamlova, Salvation Army 2. Rev. Lalzuithanga, Ex-Moderator (Synod) 3. Pu Vanhela Pachuau, IAS (rtd) Ex-Chief Secretary

Hetiang baka rintlak hi Mizoramah a awm thei tawh chuang lo vang. Pathian hming chhalin Mizo­ram mipui hmaah leh hriatpuina ‘aw ka’ leh ‘ziakin’ an intiam kha palzut rual a ni lo.

Tin, Pu Lalduh­awma hi Chief Mi­nister a lo nih chuan department chan bik (port folio) nei lo va, eng department pawh a vil reng tur hi a ṭha thlawt a ni. Law & Order, ramri buai, PWD, PHE, P&E, Horticulture thlaithar hralhna, etc. eng lai pawha a vil thei vek tur hi a tihzia tak meuh a ni.

Mi huaisen, tai­ma, mi rinawm intel­khawmna awm chhun ZPM hi sorkar thei turin i thlang mawlh teh ang u.

- Lalrempuia Pu