JIM LEH DELLA
William Sydney Porter, O. Henry ti-a kan hriat bawk thawnthu tawi, 'The Gift of The Magi' khan min hneh ṭhin.
Jim leh Della te pahnih rethei chunga an inhmangaihna hausa tak, nei tlem chunga an inngaihtuah tawnna tam tak, an hausakna awm chhun ve ve ral raih khawpa an inpek tawnna kha a va hlu dawn em.
An nupa chu khawsak mawl te, hausaknain a hnaih loh, mi lianhoin an chhaih loh nun nei, harsa taka an sum khawl pawh 'dollar' khat leh 'cent' 87 chauh a ni. An sum kawl zawng zawng zinga 'cent' 60 pawh 'pennies' nawi te te a la ni zui a.
Della chuan an sum neih chhun chu vawi thum a han chhiar nawn a, a tûk chu Christmas nî a ni tawh mai dawn a, a pasal chu thil pek pek ve ngei a duh si.
Jim chuan a pu aṭanga a pain a rochun, a pa aṭanga a rochun ve leh chhawn 'gold watch', a awrhna/bunna pawh awm lo a nei a. Della thung chuan Sam mawi leh nalh zet, Jim pawhin a chhuan em em a nei ve bawk a; chu'ng chu an chhuan theih thil an neih ve chu a ni mai.
Christmas nî-ah a pasal hnenah, a sana, a bunna awm lo bunna tur a pek theih nan Della chuan a sam a hralh a, Jim chuan a nupui sam mawi tak khuihna tur emaw kilhna tur emaw a pek theih nan a 'gold watch' chu a hralh ve thung!
'MAGI' tih hi kan Lalpa Isua Krista a lo pian ṭuma Amah chibai bûka thil hlu tak tak petu khawchhak mifing pathumte sawina a ni a. Jim leh Della te inkara hmangaihna avanga thilpek an inpek dan ngaihnawm leh hlu zet mai hi pu O' Henry hian khawchhak mifingte thil pek nen a rawn tehkhin a ni ber mai awm e.
Dollar khat khi, India chéng 70 velah ngai ila, Jim leh Della ten chhungkaw sum an neih, an 'balance' ropui loh 'khep khep' dan khi han suangtuah bawk la; mahse, an inhmangaih asin!
Chhungrila inhmangaih te hian nun an khawih ṭhin, an hun tawn harsa mah se an chanchin hretute thinlung an chàwm lét ṭhin thung. Sum ngawt ûmtu hi Bible hian a chhuah ṭha tehchiam lo a, thinlung tak, dik leh chumi aṭanga lo chhuak thianghlimna hi a sawi hlu zawk a ni.
Sum ûma i rinawmlohna te, sûma mi thinlung i tih natna te hi Siamtu kuta i tih nat mihring chu a tluk luh vaih chuan, a malsâwm viau lo maithei.
Hmangaihna tak leh dikah chuan inngaihtuah tawnna, inzahna, in ngaihvenna leh kan hun hlu inpek tawnna a awm ṭhin. I hmangaih tan chuan i hun awl bâkah tlém tal i la 'bonus' tur a ni. Neih chuang liam pek hi thilphalna a ni lo va, neih chhun hlan phalna hi hmangaihna lantirtu a ni zawk!
Ti hian ka ngaihtuah. Tun laiah chhiartu ngah leh ṭhalai chhiar duh zawng ziah chu writer-te tan a nuam tih a hai theih loh a, kan mi hmasate tih dan leh kalphung pawh kan kalsan hret hret a, ngaihnawm taka ziah kan duh a, a ṭha e. Chhiartu ngah kan duh a, a ṭha e; mahse, kan thu ziak chuan chhiartute nun eng ti zawngin nge a nghawng? A ngaihnawm liam puat nge, a chhiartu thinlung a chàwmin a ṭha zawngin an thinlung rûak a ti khat thei?
Lehkhabu kan chhiar a, a hlutna kan pawh phak chiah em? Inzawt rawh le. O. Henry hi American Short Story Writer a ni a, 11 September, 1862 kumah piangin 5 June, 1910 kumah a thi.
Dâwn la, inserh a, ka chelh tlat che kha,
Dâwn la, ka phelh lo, kan thlun thu zawng mâw;
Dâwn la, rinawmna, i tân chauh dah a,
Ka vawn, ka thinlung, chhun nawn lul suh âw.
- Chhantea Pautu