RAL VENGTU

Ral vengtu chuan, "In game khelh hi duhtawk tawh rawh u, a ninawm lulai em mai" a ti a. Kei chuan, "Ral vengtu, eng game nge maw i sawi chu le? Tunlai ṭhalai hovin mobile phone hmanga game an khelh ṭhin hi em ni? A ni tak asin, hetiang game an khelh vang hian alawm, zan mut hun pawh hre lo, zing thawh hun pawh hre lo, ṭhalai an tam tawh lutuk" kan lo ti var a. 

Ral vengtu chuan, "Chutiang lam a ni lo, in pi leh pute ata tawh, in game khelh hi in la hre chhuak thei der si lo, ka ning tawh lutuk" a ti leh a. Kei chuan," Kan pi leh pu aṭanga kan khelh tawh game chu eng thil nge ni a, sport lama kan inkhelh hi em ni i sawi zawk chu? Chutiang ni se, Mizote hi sport lamah khaw eng kan dak chhuak ve dek dek chauh a ni a, kan talent-te hai chhuah tumin kan sorkar pawhin hma a la sauh sauh zawk asin. 

A nih loh leh playing card den lama kan inkhelhna ṭhin hi em ni i sawi zawk? Hei lah hi Mizote hian kan ching lutuk tawh lovin ka hria, dâwl inchuh takngial pawh kan peih tawh lo, tunah phei chuan. Mi tinin mobile phone kan hum tawh a, chhungkaw inkawm ho pawh a awm thei tawh lo, dâwl chuhte kha ching thar leh tawh zawk ila, chhungkuain table khatah ṭhu ho ila, nui dar dar ila, a nuam ngawt zawk ang" ka ti a. 

Ral vengtu chuan, "Chutiang game ka sawi reng reng lo, a game kheltuten an tih fuh deuh leh tih fuh loh deuh changin, kil tinah mipui in ri huk huk a, i reh leh duak ṭhin, ka nin zawng tak in ni" a ti a. Kei chuan, "Ele, khel muala foot ball kan khelh ṭhin hi a ni maw i sawi, hengte chu nin chi pawh a ni em ni. Mizote hi football-ah kan invawrh ve ṭan dek dek a, football avangin India mipui hriat kan hlawh ve ṭan a. Jeje-a te, Mama te avangin kan lo insawithei ve em em asin, nin chi pawh a nih loh tawp chu" ka ti a. 

Ral vengtu chuan, "In va harh thei lo tak em, in ramri game khelh hi alawm ka sawi chu, ka ning takzet a ni" a ti a. Kei chuan, "Ramri-ah game kan khel reng reng em ni? Kan ramri buai hi kan ngai pawimawh a, tunah pawh mipui ṭang rual chuan, ramri hauhin tha leh sum nen, mahni nun thapin Vairengte val rual pawh an che chhuak hial asin. Hetiangte game khel ang leka min ngaihsak chu le, i â em mai, ka kalsan daih ang che" ka ti a.

Ral vengtu chuan, "In va mawl chhah tak em, in ramri game kheltute chu in politician-te hi alawm, hman aṭangin in ramri hi political game atan an hmang a, vote zawnga an campaign apiangin, ramri ngai pawimawh angin an insawi ṭhin a, lalna an chan meuh chuan, an ngawih bopui leh daih zel ṭhin a nih hi, chinfel tum tak tak tumah an la awm lo" a ti a. 

Kei chuan, " A lo ni dawn tak e, sorkar kan hrawn tawhte khan, ramri buai chin fel an lo tum tak tak lo a lo ni, mahse hei, tunah chuan ka pute hian, kan boruak tawnin a zir em a, hma lak an tum tak tak tawh ang, step by step-in an che dawn alawm, tunah pawh hei, ramri lamah kan sipaite a hung hmak tawh a, a chinfel dan thuruk pawh an hria. An hun chhung hian an chingfel em em ang, mipuite chuan an chin fel ngei hi kan ring tawh teh mai a nia" ka ti a. 

Ka thusawi ngaithla ṭha duh mang lo chuan, lehlam a hawi a, phun bul bul chungin min kalsan ta daih a.