INKHUALTELEM POLITICS

MNF MLA 12 chuan ZPM Chief Ministerial candidate chu a ZPM lutuk, a thlang tlingtu mipui phatsanna a ni. Amah mimal taka kan huat vang a ni lova, Legislator meuh chuan dikna kan ṭan ngam tur a ni a, House zahawmna vawn te kan mawh a ni tiin mi 12 in spea­ker hnenah hekna an thehlut rup mai a. An hekna hi chîk taka bih a, ni khat thilthu pawha chinfel theih maia a lan laiin boruak a lâi laklawh zo nge ni vawiin thlengin an la study! 

Tichuan hun a her hret a, ngum khâk ni awm tak Congress lamin an rawn hmu ve leh a. Dikna chhuanlama hektu MLA 12 zinga pahnih, Prof Lalnunmawia leh Pu L. Thangmawia te chu an han keu niap niap a, an thawhna College/ University lama hlawh chu MLA hlawh aia a tam zawk avangin an lo la a, hamṭhatnaah erawh zirtirtu aiin MLA a ṭhat zawk avangin an hui leh hmawk zawk a; hei hi chawm bawk hawp bawkah kan ngai a nih pawhin a mawh lo maithei.

Hetiang chiah hi ZPM MLA, Dr. Vanlalthlana pawh a dinhmun a ni. A sum leh a VIP leh a hamṭhatna lam a piang a theih chinah kan bawh ruak ruak zel mai tih tarlan a ni! 

MNF MLA pathum te, Prof. Lalnunmawia, Pu L. Thangmawia leh Dr. Vanlal­ṭanpuia te phei chu SEDP hnuaiah Board Chairman-ah dah niin Minister of State rank a dah an nih thu Congress lam hian an sawi a. Hetiang a nih chuan Minister awm thei zat tur bithliah bawhchhiatna a ni tiin Governor hnenah hekna an theh lut ve leh a ni. 

A uih lai ngaithei lo khawpa dikna duh MLA zingah lo uih viau zawk a awm theih a, mahni ngum khâk hmu lova mi ngum thlir peih tak pawh an awm maithei. Huaisen tur chuan dik a ngai a, mahni uih loh hmasak a ngai. Tu emaw nawr luih thila mi dik nih tum viau pawh thil awm thei ve tho a ni. Kan han keu lét ve neuh neuh a, a lo uih zaw phian zawk thei. 

Hektute, hek tawk leh chhawngtute inkhual­telemna hi a khamawm ta. British Prime Minister, a Principle a tlang loh vanga mipui duh ngawih ngawih ni chunga a ban dan te, English Football thuneitu sang pakhatin a ṭawng fuh tawk loh (ngaihdam mai theih) thilah pawh mawh­phurhna la a, a ban tawp dan te ngaihtuah hi chuan keini aia hnar hnuaia phatna nei lian zawk fe fe tur hi mipui zah vangin an thlawn hlawl hlawl mai chu a nih hi! 

Keini zawng, insawifiah tura phuttute kha insawifiah ngaiin an awm leh a, kan dak zat zat a, hmai zah kan nei lova, mipui vanga tling, kum 5 hnua feh leh huan kal leh zuk zuk mai thei kan nihna kan theih nghilh a. Insawi thiam reng rengin hun kan hmang a, kan heka te result chhuah hma hmain hek kan tawk ve leh ṭhin a nih hi. 

Hetiang inkhualtelem politics, dik derna, boruak siamna ringawt zawng lo hian ram politics tak tak hi engtikah nge kam buaipui ve ang le?