Airport chimah contractor an hrem loh chuan contract hna dangin a tuar dâwn

Lengpui Airport chei ṭhat hna hmanhmawh thlak em em mai chu khawvelin a hlauh em em hripui a len lai pawhin chatlâk lovin a kal mup mup reng tho a. A hmanhmawh thlak ngang a ni ang contractor pawhin tender chhuah hma thlà engemawzatah hna a lo thawk tawh a, chu contractor chu chanchinbu lama kan lo hmuh ve dan chuan Kamlova Chhangte inti ta Kamrul Laskar a ni. Airport sak chu a chim a, tun thleng hian contractor hrem tur thu hi sawi chhuah a la ni lo a ni.

Contractor dang zawng tán pawh tuna chinah chuan hna an thawh chhiat pawhin hrem an tawk dâwn lo tih an hre tawh dâwn a. Mizorama hna reng reng hi a nih dan tur anga thawk lova a lo chhe ta a nih pawhin kan sorkar ngaih pawimawh ber (top priority) ang maia Chief Minister berin hri pui kara a tlawh tlut tlut a chim rup pawhin tumah an hrem chuang lova, chuvangin hna dang thawk tán pawh hlauh tur a awm bîk tawh dâwn em ni?

Aw, kan Zoram, kan ram neih chhun hi heti mai mai hian a kal zel dâwn em ni le? Ram hruaitu tura kan thlante chuan mipui tana sum lo kal chu an duh angin an hmang ta hmiah hmiah mai si a, hmasawnna tur sum hi central aṭang hian a lo chho ve reng tih hmù ve ṭhin mah ila mipuiin kan hmuh reng chunga sum chet dan, duhsak zawngten contract hna an pumhmawm tawh hnu pawha hnathawk ṭha chuang si lo, thawk ṭha lo chunga hrem tawk bawk si lo, hei hi kan ram chu a ni si.

Assembly House-ah MLA in contract hna hralh leh lei thu zep lovin a sawi a. Kan Chief Minister berin mi hming hawha contract thawh press mite hma­ah a sawi a, heng te hi court-ah pu lut duh/ ngam awm se chu kan politician-te hi an talbuai viau thei mai lo maw?

Tunah hi chuan Airport chimah hrem tawk an awm lova, contractor leh a viltu Engineer an hrem kan hre si lova, contractor dang hnathawk chhe turin an huangtau sawt dawn a ni.

- Lalremruata