Kristian tho la, ṭawngṭai rawh le
Kum 2000 bawr vel aṭang tawha Pathian miten an lo vei, mutmawh hnar mawha an lo neih tawh, an thiam ang tawka an lo sawi ṭhin ‘Hindu thlipui India ramah a tleh dawn’ an lo tih ṭhin kha, hei a takin India ram hmun hrang hrangah leh Mizoramah ngei pawh a nasa zual zawkin a lo thleng dik ta.
Keini pawhin kan phak ang tawkin kan vei a, kan thiam leh theihna hrang hrang hmangin inralrin nan kan tlangau ṭhin kha a nia. Pastor tam tak, mithiam tak tak leh kohhran hruaitute pawhin engtia lo hmachhawn tur nge tiin kawng hrang hrangin min zirtir ṭhin kha a nia. Tunah a takin a lo thleng dik chho ta zel a, kumin inthlan dawn meuh chuan a hlawp hlawpin kan ram min rawn thlen chilh ta.
Hindu a firfiak a che duh BJP leh RSS pawh an rawn huangtau ta hle. Yoga hmanrua a rawn hmangtute tho kha an ni a, a rawn thleng dik chho zel mai zawng a nih hi.
Tunah chuan "Ka aiawh Lal hma a’n a ding” tih ang maiin media hrang hrangah mithiam tak takte leh, pastor tam takte an rawn tlangau chho ta zel hi ava ropui em!
Pathian hian Zofate hi an lo hmangaih em em mai a, kum 2000 bawr aṭangin he Hindu thlipui lo tleh tur atan hian “Inralrinna” thu a lo puang chhuak tawh daih mai a. Zawi zawia Mizote min hnehin, kum 2018 inthlan a lo thlen meuh chuan BJP thawhpui chaka tuihalin Mizo mipui tam tak kan lo awm hman ta reng mai a, a dikzia a takin a vawrtawpna a lo thleng ta. He hunah hian Mizo kristiante hi kan harh zo ang em?
Kumin Kan state Inthlanpui chu Inthlanpui danglam, thlarau indona (spiritual war) a ni dawn, thlarauva mitmeng chuan hre rawh se. He indona (inthlanna) ah hian kan ram neihchhunah hian Krishna nge ro kan rel tir dawn Krista? Krishna nge kan thlan dawn Krista?
Eng vangin nge political party hrang hrangte hian BJP hi kan thawhpui chak tlat hlawm le? Engatinge BJP kan in biak ṭhat siak? anni thawhpui lo hian central-ah kan state chanvo chu a awm tho tho a ni lo’m ni?
Anni puihna tel lo pawh hian fund hrang hrang hai chhuak thiam mithiam kan nei ve tho lo’m ni?
Kristian tamna, majority na state, state danglamah hian Kristian tan tih a mawi lo kan ti mek em? In enfiah kan va ngai em! Political party a in hmang tak tak te, a hotu a ṭang te hi Kohhrana Pathian rawngbawltute tho kha a ni si a, kan rawngbawl sak Pathian chakna aiin BJP chakna maw kan rin zawk? Aw, Mizo kristian bukin i awm mek, i Pathian mithmuhah i tling zo dawn em? Keimahni leh keimahni bawhchhiatna avang hian ringlomite kutah kan tlulut ang tih a va hlauhawm em! Tun hi Zofate kan harh hun a ni!
Kum 18 kal taah Pathianin Zoram tan inralring turin min au tawh a, tunah a vawrtawp a lo thlenah hian Pathian thu kan awih dawn em? Kumin inthlanah hian BJP leh a thawhpui leh thawhpui hnial lotu party te, NEDA kaltlanga tel party te Pathian leh kan kristianna humhim nan hian kan vote hi i pe lo ngam ang u. Kan vote hi Pathianin kan ram min fiah nan a hmang dawn. Ka unau duhtak tuma hmuh lova 'i vote ruk/ i vote thuruk' hmang khan Zoram tan Pathian pawi lian lutuk i sawi thei tih i hriat a ngai.
Kumin inthlanah hian Pathian hmaah Zoram kristiante bukin kan awm dawn. Aw! Kristian zawng zawngte u hawh u, tho ila tih tak zetin Pathian hmaah ṭawngṭai ang u. Pathian duh zawnga Zoram mipuiten vote kan thlak theih nan mahni hmun ṭheuhah Pathian au chuah chuah ang u khai!
Nakin atan a ni lo, tun atan a ni, tunah ṭawngṭai a ṭul, thinlung thlerin, chawngheiin ṭawngṭai ta che. I ramin ṭawngṭai turin a ko che. Tun tak hi ṭawngṭai hun a ni e.
- H. Lalhmingthangi