ONLINE OPINION POLL KHA
Er. Lawmnakima, Cognizant Technology Solution, a thawk mêk Artificial Intelligence & Analytics (AIA) department a Middleast region General Manager chuan Mizoram inthlanpui lo awm tûr aṭân software changkang tak hmangin Online Opinion Poll a buatsaih a, mite hlut a hlawh hle.
Pu Lawmnakima hian Online opinion poll a siam chhan hi sawiin, "Ṭhalai leh lehkhathiam zawkten ram hruaitu tur kan in thlannaah ngaihtuahna seng se, inthlanpui lo awm tûr hi ralkhat en ringawt lovin, siamṭhatu kan ni ṭheuh a ni tih kan hriat zual theihna atân awareness a nih ka beisei a ni" a ti. "He poll hi social media a ṭhalai ngaihtuahna hmang tak takten an hlut a, inthlan boruak nu lutukin min chiah hma a ngaihtuahna fim tak nen kan rilru duhthlanna lantir ila. Chu chuan ngaihtuahna thar min pek ngei ka beisei" tiin Pu Lawmnakima hian a sawi.
He Online Opinion Poll hi mimal identity lang si lo a ngaihdan tarlan theih tura siam a ni a, mi tam takin a hlut hle niin a lang. He poll hi October 30 aṭanga November 4 thleng hawn a ni a, he mi chhung hian mi 6000 chuangin ngaihdan an tarlang hman a. A rei deuh hnu hian poll a ngaihdan lut hi a pung chak hle mai a, mahse CYMA huaihawt hnam chhan hnatlang te kan neih chhunzawm tak avangin mi rilru lapengtu a ni ang ti hlauhna avangin he poll hi November 4 ah khar a ni.
Online poll design-tu hi Pu Lawmnakima ni mahse, poll tlak dan te endikpuitu mi puitling tak tak telh an ni.
1. Pu Kiddy Vanchhawng
(Mizo Special Report)
2. Pu Gilbert Renthlei
(Lunglei Chanchinthar)
3. Pu K Chawnghmingliana (Lunglei)
4. Tv Lalhminghlua Tuallawt(Aizawl)
5. Pu Ch.Khithie (Siaha)
6. Tv Jacob Vanlalṭana Khiangte
(Lunglei)
7. Tv Lalbiaknunga (Aizawl)
Heng mite hi Poll Coordinator an ni a, anniho hi Party lamah pawh ngaihdan inang lo tak tak an nei a, poll tlak dan hi fair takin an lo endik ve vek a ni.
Poll link hi facebook-ah leh whatsapp-ah thawndarh a ni a, khaw hrang hrangah thehdarh a ni. A buatsaihtute buatsaihna rilru hriain mi puitling tak tak, rawngbâwltute, sawrka hnathawkte pawhin an respond ṭha.
POLL SIAM DAN KALPHUNG
Google online document hman a ni. Hetah hian zawhna 4 siam a ni.
1. Veng/ Khua
2. Constutency
3. Party Vote tum
4. Vote Chhan.
Google document hi user friendly deuh avangin hman a ni a, mahse duplicate entry a awm theih avangin backend-ah device detector java programming dah a ni.
Vote hi 6700 chuang hret a tla a, device detector-in 700 chuang a reject a, a vaiin 6018 compile a ni.
Poll result hi file-ah export a ni a, Data Analytics tools (Microstrategy) hmanga analyse vek a nih hnu-ah result buatsaih a ni.
Roll result: Poll result hi Constittuency hrang hrang siam vek a ni. Tin age group hrang hrang vote tlak dan result siam a ni bawk. Party vote chhan langsar zualte analysed a ni bawk.
Poll chhangtute hlimthla
1. Technology literate chinte an ni a, upa lam leh social media khawih lutuklo ten tam lo.
2. Ṭhalai lam, 18-45 an tam ber.
3. A tlangpuiin change duhtu (MNF leh ZPM) an active deuh niin a lang. Sawrkar lai mi leh sa ten hetiang ngaihdan lak hi a hlut lutuk lo deuh em aw a tih theih.
4. Chakma/ Bru lamin poll hi an respond ve loh hmel.
5. Party vote chhan kan sawite enin, mi puitling tak takte he poll hi an chhang a ni tih a hriat theih.
- Lawmnakima