Kawng chhawng hi
MNF president Pu Zoramthanga chuan sorkarna an siam chuan Aizawl khawpuia kawng chhawng siam a tum thu a sawi a, keichuan ka awih chiah lo.
Mah se, Chief Minister hial lo ni tawhin a sawi a, keini ang mimawlin lo awih loh ringawt chu a finthlak ber lo mai thei. Kawng chhawng siam a tum dan a sawi erawh ngun taka ka ngaihtuahin awih har erawh ka ti hle.
A tum anga a lo siam a nih chuan kawng dunga office leh mimal in tan a buaithlak awm hi ka ti. Engtin nge kawngkhar an hawn ang, engtin nge tukverh an hawn ang, keini ang mimawl chu kan buai map mai. Tin, a rinawm a ngem?
Eng pawh nise, Pu Zorama hian kawng chhawng siam turin ruahmanna, kan hriat ve phak loh a nei vek tawhah ngai phawt ang. Mak ka tih erawh chu MNF candidate zingah kawng chhawng campaign na atana au chhuahpui ka hre miah lo. Pu berin a tuipui em em hi a naute hian an tuipui ve lo nge, an awih chiah lo ni ang le?
Aizawl pawna candidate-ten kawng chhawng campaign puina atana an au chhuahpui lo chu thuhran nise, Aizawl chhunga MNF candidate-te pawhin an au pui lo hi chu a mak a ni.
Aizawl khawpui a tawt em em a, Aizawla chengte chuan kan ning hlawm hle. Chutiang anih laia MNF President-in kawng chhawng leh traffic jam awm lohnaa Aizawl siam a tum hi thil lawmawm tak a ni.
Mah se, Aizawla MNF candidate zingah pawh kawng chhawng leh traffic jam awm lohna Aizawl khawpuia siam tum campaign na atana hmang ka hre hauh lo. Kei mimawl ang bawkin an pu thusawi hi an awih lo ve nge maw ni le? Pu Zorama hian thil tih theih loh tur a sawiah an ngai ve tho a nimai lo maw, nise lose campaign au hla atan hman ve awm tak.
Tin, kawng chhawng chungchang hi MNF manifesto-ah ka hmu miah lo. Sum sen a tam dawn tehreng nen, manifesto-a an telh loh hi mak ka ti. An pu ber thusawi hi a naute pawhin an awih pui lo tih tilang tuah ka ngai.
EVM, mau lian chinte pawh hi MNF hruaitu leh candidate zingah au chhuahpui ka hre miah lo. Pu ber thusawi hi candidate meuhte pawhin an tuipui lo hi mak ka ti hle. A naute pawhin a thusawi an ring lo tih tilangtuah ka ngai. A naute pawhin a thusawi an ring lo anih chuan mipui tan chuan rin chi a ni lo ang.
- MS Chuauhang