CORPUS FUND CHENG VBC.200 A PUNG MIAH LO EM NI?

Sawrkar hnuaia damdawia inen­kawlna senso bill ve thei lote'n an inenkawlna senso te an bill ve theih nan Mizoram State Health Care Society chuan cheng vaibelchhe 200 chuang corpus fund a dah a, he pawisa hi thil­dang atan khawih chet thiang a ni lo.

Chu pawisa, cheng vaibelchhe 200 chu Mizoram sorkar chuan bank hrang hrangah a pung awmin a dah a, chu pawisa pung chiah hmang chuan Health Care Scheme kan tih mai, damlo inenkawlna chu rulh sak a ni ṭhin. Chutiang chuan sorkar chuan health care scheme chu a kal chhoh pui a, sorkar kum tawp a thlen hma in 1st October 2021 khan he scheme hi a tawp a, sorkar chuan sorkar kum chhiar anga kalpui a remchan zawk nan ni 31, March 2022 thleng pawhsei ṭha tiin hetiang hian health care scheme registration chu pawhsei a ni ta bawk. A pawhseina pawh cheng nuai 321.67 zet a tlingkhawm a ni.

Ni kum October thla aṭanga health care scheme registration pawhsei a nih aṭang khan damlo ten an dam loh avanga an in enkawlna bill chu an la thei ta lo a. Damlo mi 23,031 te chuan an in enkawlna chu an la chhuak thei lova, heng damlo bill tam lam chu Rs. 59,63,40,278 a ni.

Hetiang a nih lai hian kumin March 31 ah Health Care Society in ziah luh chu a lo tawp leh tawh dawn a. Kum hmasa lam aia tam deuh hretin sorkar chuan health care a ziah luh man chu a let thawk thawkin a ti tam a. In ziahluhna man hi AAY (Card eng) Rs.200, PHH (Card pawl) tan Rs.1000, Non-NFSA (Card var) Rs. 2000 leh Ration Card nei lo tan Rs. 2000 a ni.

Ka sawi tum tak chu

Sorkarah damloh man bill let thei turin pawisain kan do let a. Chu mai a ni lo, cheng vaibelchhe 200 chuang chu thlatin pung turin bank hrang hrang 14 ah dah a ni. Heng pawisa te hi sorkar chuan health care bill atan chauha hman theih turin a dah a, mahse, October thla aṭang khan bank hrang hrang chuan pawisa pung hi a titawp em ni, tih mai a awl khawp mai.

Cheng vaibelchhe 200 chuang hi a tam khawp ang. Mi mawl ber tan pawh heng pawisa pung hi a tam dawn tih a hriat reng. A tlem berah thlatin cheng vaibelchhe 5 chuan a pung dawn tih a hriat reng mai. Mahse, pawisa khawih chet thiang lo bill tang mek, pek theih loh chhan chungchangah health minister chuan sorkar sum indaih loh vang a ni a, bill hi pek thuai tum a ni, a ti lawi si. Pawisa khawih chet thiang lo kha sorkar khan hmun dangah a lo khawih peng zeuh emaw tih a awl rum rum mai.

Health minister chuan assembly house-a health care shceme pawisa chungchang a sawiah, health care pawisa corpus fund a dah chu finance department remruatna anga kal a ni, a ti a. Sum a pungawm hmanna kawngah langtlang taka thiltih vek a ni. Health care sum chu health care atan ni lo hmun danga hman a remchang lo, a ti bawk. Finance depart­ment an thu hle, tih a chiang.

Assembly neih zawh taka health minister-in a sawi tawh angin, state health care corpus fund aṭangin cheng vaibelchhe 4 sem chhuah a ni dawn a. State sorkar sum hman bangte finance department-in a dapkhawm mek a, vaibelchhe 5 dah chhuah tura kalpui mek a ni, a ti. Hetiang a nih chuan sum bat tam tak pek chhuah theih beisei a ni, a ti.

Hetiang a nih takah chuan health care scheme atana corpus fund cheng vaibelchhe 200 pung awm chu a bo a bang awm lovin khawi department-ah emaw pawh kual a ni maithei a, mipui lam nawr nasa lutuk vangin cheng vaibelchhe 5 chu dap khawm chawp mai mai a ni, tih a awl ta rum rum mai.

A tawp nan Health Care pawisa, a pung chauh lak tura dah corpus fund an tih cheng vaibelchhe 200 hi la chhuak se, bank dangah dah se, a pung a awm ṭhat ka ring ta deuh. Pung awm miah lova cheng vaibelchhe 200 dah hi a hlawk miah lo.

- Maroa Colney Bungsut