MNF LEH ZONET TV

He thu hi WhatsApp lamah ka dawng a, tun hnaia MNF party-in Zonet an beihna kha a ni. Zep thu a cheng lova, MNF President Pu Zoramthanga dinna Aizawl East I bialah Pu K Sapdanga a ding a, ani hi Zonet neitu zinga mi a nih avangin Pu Sapdanga tihmualpho an tumna a ni a, a vawtu lamin ek an cheh ta a ni ber mai.

MNF hian media an bei hi an la inchhir ang, a chhan chu media hi chu lam ṭanga siam tum tur a ni a, an bei chat mai hi a atthlak. An beihna thu hi dik ni se chu a la ziaawm deuh a, document hlui hmangin dik lo takin an bei a, a beitu an mualpho ta hlauh a ni.

Vote hmuh theihna tur lam aiin an President Pu Zoramthanga biala ding Pu K Sapdanga tihmualpho tumna a ni. Pu Sapdanga hi Vanglaini neitupa a ni tel a, duh ni se Pu Zoramthanga eiruk thubuai neih zozaite hi mualpho taka tilang thei dinhmunah a ding a, mahse an tilang duh lo a nih hmel. MNF lam chuan rem leh rem lovin Pu Sapdanga tel vena Zonet an bei a, an beihna lah chu thu hlui an chinfel tawh a ni bawk si.

Ka WhatsApp thu dawn chu a ngai ngaiin ka rawn copy paste ve ang e. "November 22, Ningania MNF Vigilance Committee Chairman Pu Lalhming­liana, Ex-MP (RS)-in Aizawl Press Club-ah Press Conference a neih chung­chang kha journalist ka nih angin a hmunah ka awm ve avangin i'n sawi ve lawk teh ang. Chhiah âwl rua Zonet a puh dan leh an press statement-te chu social media leh chanchinbu/ TV lamah kan hmu tawhin a rinawm. A bak, press conference-a thil thlengte ka sawi dawn a ni.

Press mite zawh belhna

LPS sawi tel loin eng vanga Zonet chauh bei nge in nih? LPS subcriber neih zat leh chhiah pek zat min hrilh thei em? - An chhang mumal thei lo.

Inthlan zawhah emaw pawh, LPS subcriber neih zat puanzar ve in tum em? - An chhang mumal thei lo.

ZONET subscriber zat an hriatna source chu RTI information a nih thu an sawi a. RTI hmanga zawttu tunge? Engtik laiin nge information a dil? - An chhang thei lo ve ve.

Zonet neitute zinga mi Pu RK Lian­zuala chu 2013-ah MNF candidate a ni a, engmah in sawi lo a, tunah a neitu dang Pu K. Sapdanga a ding ve leh a. Pu Sapdanga candidate ni tlak loa in ngaih laiin, Pu RK Lianzuala in candidate thung si a. Enge a awmzia? - Hei hi chu Nomination Committee thu a ni a, an chhan chi a ni zawk ang.

Belhna

Pu Lalduhoma MLA a nih laiin dâwt bill (zin loh bill) a lak thu an sawi a, chu vang chuan ram hruaitu atan rin tlak a nih loh thu an sawi.

Press mite'n ‘dâwt bill’ lak hun lai chu MNF sorkar lai, kum 2006-2008 vel a nih thu te, mi 15 velin dâwt bill an lak thu te, Pu Lalduhoma chiahin sorkarah a pek kîr thute an sawi a.

Zawhna: MNF MLA zinga dâwt bill la vetu tute nge?

Chhanna: Ka hre lo. Ka hre tlat lo!

Comment

Zonet subscriber zat leh chhiah pek chungchang hi kum 2013 MLA inthlanah khan MLA ni ta Pu R. Vanlalvena khan a khingpui Pu RK Lianzuala beih nan tak a hmang ṭhin. Thu hlui a ni a, MNF lam hian an President Pu Zoramthanga tan advantage a nih beiseiin a khingpui Pu K. Sapdanga beih nan an hmang a ni mai thei. An tifuh ang emaw!?

Thu hlui a nih ang leh Zonet pawhin an chinfel vek tawh laia MNF lamin thudik tluantling lo hmanga Zonet an bei ta mai te, press mite zawh belhna chhang thei lo te, an reporter-te MNF ten vawi tam tak anmahni cover tura an koh kal tawhte leh MNF news vawi tam tak, zan khatah MNF news 1 mai ni lo, 2-3 te an puansak tawh dante an ngaihtuah ang a; an rilru chu a na ve det mai thei e.

Mizo journalist

MNF vote zawn dan leh an opponent an beih dan hi a nuihzatthlak a, Zonet lamin he thu hi puitling takin an puansak thlap bawk a. Pu Zoramthanga thil tih tir duh dan leh Pu Sapdanga tih tir duh ve loh dan chu a inthlau hle a ni. Ram hruaitu kan thlang dawn a, rem leh rem lova mi bei duhtu nge i thlan dâwn mi beihna (Zoramthanga eiruk thubuai document) nei reng chunga puitling taka bei duh lotu zawk? Aizawl East I mipuite eng ang mize pu MLA nge neih in duh ka zawt a che u.

2008 leh 2013 MLA inthlana a tlak hnua, "EVM an tihchingpen vanga tla ka ni," tia mipuite bum tum duhtu kha a ni a. Sorkar hnathawk election buaipuitute zawng zawng hian EVM hi tihchingpen theih a ni lo tih hi an hre chiang em em si a, mipui bum tumna a ni.

NEDA chungchang zawhna an zawh apianga, "ZNP leh MPC pawh an tel," tia thudik lo sawi duhtu a ni. BJP kaihhruai Amit Shah-a din NEDA-ah hian Mizoram aṭangin MNF leh BJP chiah hi an tel a ni si a. Tuna Zonet an han beih tel duh danah hian an puitling lo a, ram khat hotulu atana dah ngam chi a ni dâwn em ni?

- Lalmuanpuia