Zofate fimkhur a hun NEDA hi kan hre chiang em?

Kumin 2018 MLA inthlanpui kan hmachhawn mekah hian political party hrang hrangte BJP thawhpui leh thawhpui loh chungchangah nasa takin an inpuh tawn a, thil dang zawng aiin he thil hian chanchintharah hmun pawh a luah a ni.

Hetih lai hian chanchinthar thehdarhtu pakhat, wwwfirstpost.com in Nov 22, 2018 chhuakah MNF President chuan BJP hi Kohhran zahawmna tihniam theitu niin a ngai lo tih ziakin, “BJP hian kan ram chhung zau takah rorelna a chelh mek a, Kohhran zahawmna a tihchhiatna ka hre lo” tiin a sawi tih a lo lang a. (“BJP is ruling a large part of the country. It is not harming the dignity of Church anywhere,” Zoramthanga says - https://www.firstpost.com/poli... Accessed on 23.11.2018). Mizoram CM nih tum ve meuh Pu Zoramthanga hian India ram hmun hrang hranga Kristian rawngbawltute’n BJP sawrkar hnua harsatna hrang hrang an tawh te hi a hre lo der em ni?

Hmar chhak biala kua hreuh hi RSS ho hian an duh em em a, chumi tih puitlin nan chuan North East Democratic Alliance (NEDA) hi an din ta a. NEDA nihphung hi kan chian viau a ngai. NEDA hi May ni 24, kum 2016 a BJP President, Pu Amit Shah leh BJP General Secretary, Pu Ram Madhav te leh North East Zonal Organising Secretary, Pu Ajay Jamwal te huaihawtna hnuaia din a ni a. Anni hi RSS rawngbawltu lawk, Pracharak an tih, RSS university a train chhuak, thil ruahman thiam elkhen an ni.

Hmar chhak biala BJP zung kaih theih nana helaia tualṭo party (regional party) ho huikhawm a bul ṭan hi a ngaihtuah chhuaktu chu a chunga mite pahnih hi an ni a; Pu Zoramthanga pawh hi a tir te aṭanga a dintu zinga mi a ni. Pu Conrad Sangma, NPP President (a pa P.A Sangma March thla a thi ta aiawh) pawh a bul tantu zinga mi a ni. Pu Amit Shah leh Pu Ram Madhav te hi BJP mi namai lo, an party tana thluak bur an ni. NEDA member nghet ni mekte chu hengte hi an ni:-

BJP leh an thuihruaite sawrkarna kan pek chuan kan ram leh hnam tana pawi tur heng a hnuaia mi hi kan thlentir dawn a ni:-

1. India Danpuiin a humhalh ‘Sakhaw Zalenna’ lungphum hian eng chen nge a daih ang aw? Kan Krismas ni pawh Good Governance Day tiin min thlaksak a, Good Friday pawh Digital India Day tiin, Father’s Day lah Yoga Day min tihsak mek bawk. Kan Kohhran rawngbawltute hian pulpit tlang aṭangin Hindutwa movement leh BJP chungchang hi thlamuang takin an sawi chhunzawm thei zelin kan ring em?

2. Biak In in kalh sak te, pastor leh upate chunga hleilenna te chu thleng ut ut tura beisei tur a ni lo. Muang fan raihin a chukna tur takah an chuk chat chat mai ang. Entirna pakhat chiah tarlang ila: India rama kristian missionary te leh NGO te hian kil tinah rawngbawlna tam tak an nei a. Sum vaibelchhe tela ramdang ringtute leh ṭhahnemngaite rawn thawn luh ringa thawk an ni. Henga ṭanpuina hmute hi Home Ministry hnuaia FCRA (Foreign Contribution Regulation Act) tlawh chhana in register vek a ni. Hei hi RSS ho mit ti mimtu lian tak a nih avangin BJP in sawrkarna central-ah an chan aṭangin heng ṭanpuina lo luang lutte hi an rek chhum vek a ni.

3. Kan Krismas te, Good Friday te hi lawm an khap hranpa dawn lo, mahse sawrkar thupek hmangin thil danga hliahkhuh tir a ni tawh ang. Pu Modi PM a nih hlima Christmas Ni Good Governance Day tia a rawn chhilh hmak te, Good Friday ni pawimawh palzut tumin High Court judges ho All-India conference a ko tlat mai te kha an rilru putzia tarlangtu a ni. Vairama thawk official tan chuan Christmas ni a Good Governance Day lawmna programme a tel ngei a ngai tawh asin.

4. Krismas leh Kumthar lawm nan ruai atan pawh bawngsa a tel thei tawh lo ang. Governor firfiak deuh kan neih phei chuan ruaitheha sa ei thlengin min la khap dawn. RSS ho in kan sakhua min han chin leh sak vel tur hi ngaihtuah chian ngam pawh a ni lo a ni. Chumi awmtir tura chhawp chhuaktu lo nih hi a Mizo lo ngawt mai.

Thuchah hnuhnung

1. Kumin 2018 Nagaland inthlanah Kohhran hoten thuchhuah te siamin BJP vote lo turin mipui an infuih nasa. Mahse, BJP hian thiam takin Tualto party, Nationalist Democratic Progressive Party (NDPP), CM hlui Neiphu Rio kaihhruai an hmang a. Rem hre taka thil ruahmanin, BJP hian Naga tualṭo party nen inthlanna an bei ta a. Mipuiin BJP vote angah an in ngai lo, mahse Tualṭo party NDPP an vote vak khan BJP an vote tih an in hre lo.

2. Meghalaya inthlanah Nagaland ang deuh bawkin BJP chu Kristian ten an do viau chungin Conrad Sangma pawl, NPP leh NEDA member dangte chuan thiam takin BJP chu an hliah khuh tlat a, inthlan zawha sawrkar inṭawm siamah pawh BJP chu ‘fatu leader’ a ni.

3. BJP te hian inthlan hi an phiar uluk

ṭhin khawp mai; mi thiam ruaiin uluk zetin bial tin an zir a, chet dan tur fing takin an ruahman a, sum tam tak chhawpin an che ṭhin. Chakna tur chiang deuh nia an hriatah chauh BJP candidate tling ngei tura an rin an dah a. Kristian hlangna hmunah an hmatheh zawk chu an NEDA member, Tualṭo party te a ni hlauh thung. Naga ho leh Meghalaya ho lah chuan in tifuh fein Tualṭo Party (Regional Party) an vote emaw an ti. Tin, NEDA member te candidate chu NEDA member dinthuah tir te pawh an awm thei; mahse, dinthuahtu kha tlintir tumin an bei lo va. Tu emaw tana vote kal hlang tur tihpen te, vote kalkhawm lo va tih phirsi te, tu emaw tana vote hlang zawnga khalh te an ni thei.

A chunga an kalphung zulzui hian Mizorama candidates an rem dan pawh hi fing taka Pu Amit Shah leh Pu Ram Madhav te thluak hmanga ruahman a ang hle. BJP candidate ni kher lo, NEDA member- MNF emaw NPP tlintir emaw hi BJP tlintir nen thuhmun reng a ni tih hriat reng a pawimawh. “Kan thawk ho lo, a hrang kan ni” tia Meghalaya leh Nagaland mipuite an lo hruaibo ang kha ni ve suh se.

MNF te hian ‘BJP kan thawhpui lo’ tiin pha kual vel mah se an goal chu NEDA team tu emaw ber hmanga sawrkarna lak a ni hrim hrim. Hei hi a chianna chu a tir lama Pu Zoramthanga thusawi kan tarlan leh tun thlenga NEDA aṭanga an inhnuhdawhna Mizo mipuite’n kan la hriat loh vang a ni. Hetiang hi kan hai der a, chet huna kan chet loh chuan Tualṭo Party hmanga BJP lalna thlentirtu kan ni mai dawn.

Hetihrual hian Independent candidate te an tlin palh pawha lei khawm vek thei turin BJP te hian a rukin sum leh pai tam tak nen thang an kam lo vang tih sawi a har hle a ni.

- Lallianchhunga