Lengpui Airport chim thlirna dang
Mizoram airport neih chhun Lengpui Airport hi India rama airport neih zingah chuan a mawi ber pawla sawi a ni ṭhin a, a chhan chu tlang kara awm niin van aṭanga thlir pawhin a hring dup ṭhin a, he airport mawi tak mai mawi lo taka a thang ta hi chu Contractor pakhat leh a viltu (vil duh lotu) Department vang a ni ta em? Kan sorkar vang zawk hi a ni ta em? Hetiang zawnga thlirna dang deuh hi kan neih a hun tawh nia ka hriat avangin zawhna ang zawngin dah ve i han tum teh ang.
Kan sorkar hian contractor a thlan dawn hian tenser pangngai chuah thlapin a thlang nge ni a, Lengpui Airport chei ṭhatna atana thawk ṭha ber tura an rin leh an chhuan em em an thlang zawk ni ang aw? Kan sorkar hian contractor hi mi tam tak a diltu zinga a ṭha bera a rin dan ang thlapin Engineer thiamte nena ṭhu khawmin an thlang chhuak nge ni ang a, kan hotu lian zinga mi hian, "E, anni ngei hian thawk rawh se," tiin contractor Kamrul Lashkar hi an thlang chhuak ta? tih zawhna hi chhan a ngai a ni.
Lengpui Airport chim hi a zana zanin an khuh fel nghal tih hi thuthang pawh ni lovin social media lamah khan a ion ziak a, eng vanga hmanhawm em ema khuh nge an nih? tihte hi thil hriat chakawm tak a ni ve mai mai a ni. Kan Chief Minister hian kan arport chei ṭhat hnathawh hi a vei em em a, Covid 19 hri leng kar ah pawh vawi khat mai ni lovin vawi tam tak a tlawh tih an sawi a, eng vanga Airport chei ṭhat hi vei em em nge a nih? tihte pawh hi zawhna awm thei a ni a, hnathawh dang tam tak tlawh loh a neih laia vawi khat aia tam daih mai state hotupain a tlawh hi a chhan hriat a chakawm a ni.
PWD khan thu kha hmanhmawh takin an chhuah nghal rum rum a, Lengpui Airport chim tuka an thuchhuahah khan siam ṭhat leh nghal a nih tur thu an chhuah rual khan contractor hremna lam an ziak tel lo kha a mak a, a chim chhan chhui thu an ziak lo hi eng vang nge ni ang? tiin zawhna a awm thei bawk a ni.
He thil hi tuten emaw politics anga ngaiin sorkar an dem chuan a dik lo va, politics anga ngaia sorkar pawhin ngawih bo a tum chuan a dik bik chuang lo va, Mizorama infrastructure pawimawh ber pakhat sak chhe em em mai a chim hi state mipui thinrimna cho chhuaktu a nih avang hian tu mah hrem lova a zuih ral chuan Mizoramah hian dikna a lal lo tihna a ni dawn asin.
- Lalthansanga