TLEIRAWLTE LEH SEXTING (Sexual abuse lakah i fa veng him rawh)

Sexting tih hi tunlai ṭawng thar, "tisa châkna titho thei lam hawi thu, thlalak leh video inthawn" sawi nan hman a ni. Mobile phone hman tlanglawn hnua a ken tel ṭawngkam a ni.

Tleirawl kum 11.9 aṭanga kum 17 inkár mi 110,390 an zirchiannaah 14.8% chuan sext an thawn tawhin 27.4% chuan sext an dawng tawh a. 12% chuan sext an thawn chhawng (forward) tawh.

Hei hian tunlai hmasawnnain tleirawlte zingah sexting a tihhluarzia a lang chiang hle.

Sexting hian sexual harass­ment, cyber­bullying, blackmail te a ken tel avangin depression leh suicide hial te pawh a thlen thei (Elizabeth L. Jeflic, PhD).

NU LEH PA TIH TUR

1. I fain phone a khawih hmain sexting ṭhat lohzia, hlauhawmzia i hrilh hmasa ang. I zirtir hma poh leh i ngaihhlut zawngin i fa a kaihruai nasa ang.

2. Saruak thlalak thawn tura turtu a nasat theihzia hriat sak chungin, an thawn avanga zahna, mualphona, nun chhiatna, vanduaina a thlen theih dan i hrilh ang.

3. Saruak thla-lak an dawnin delete nghal zel tur leh nu leh pate hnena hrilh zel turin i zirtir ang.

4. Saruak thla-lak darh avanga mualpho tate (an hming sawi kher lovin) i hrilh ang a. An nun a zim phahzia leh an dam chhung nun hlimawm a tihchhiatzia i hrilh ang.

5. Phone rules i siam ang. Surprise checking i neihsak ṭhin ang. Phone an khawih duh chuan 'ensak thut (surprised checking)' an phal ngei tur a ni tih i hriattir hmasa ang.

- VLC Vanlalhriatrenga