Ngai rawh fiahna ni a thleng mek a ni!

India ramah hian BJP sorkar kan hmuh apiangin, BJP+RSS hmel kan hmu tel ziah a, chuvangin, Mizoramah hi chuan BJP hi ding lo sela tih hi, ram mipui 90% duhdan niin a lang. A lo ding ve a nih pawhin, BJP tel loa state sorkar siam hi mipui duh dan niin alang.

Zoram mipuite kan ṭhan harh a hun ta, hun rei kan nei ta lo! Political Party hrang hrang, kohhran tin te, chhungkua leh mimalin fiahna paltlang tur kan nei ta. Kan Political leader zahawm tak Pu Lal Thanhawla te, Pu Zoramthanga te, Pu Lal­duhoma ten ‘Mizoram hi Pathian zawn chhuah ram leh hnam kan ni’ tiin kum tam tak min lo zirtir tawh a.

Mahse, enga tinge tun inthlan boruak leng velah hian, an vaia BJP rim nama ka hriat leh tak tlat mai le? Hemi thuah ngawtah pawh hian, Pathian mite rilru a nâ a, an mittui a tla a, an thin a rim hial niin alang!

Pastor/ officer leh Revival Speaker-te pawhin, ‘Mizote hi Lalpa zawn chhuah ram kan ni’ tiin kohhran min zirtir rei ta. Nimahsela, tun fiahna hun takah hian ‘Central sorkar developement tui bawlh­hlawh, ‘kuna hmui chuk­tuaha dawt’ engzat tak awm ang i maw? Harh ila, he fiahna hunah hian Sipaihote Lalpa chakna ringin, mahni kein ding ngam ila. Central developement fund chu ‘mahni kut ngeiin’ kan thal zawk dawn nia (Roreltute 7:7).

North East State-ah ‘BJP-in sorkar an siam’ tih kan hriat aṭang phei chuan, kan in­thlang tur hian, Pathian mite thin-lung min ṭham lawk tawh a. Chuvangin, kohhran hrang hrangten BJP duh lovin kan ṭawngtai a, political education awereness nasa takin kan kalpui a, chumi fiah­na chu Mizoramin kan hmachhawn dawn ta.

Kan rin lawk ai maha makin, Kristian signature chuang zingah meuh pawh BJP sawimawitu hmel an lo lang ta! Heng miten min zawrh ber chu, ‘Mizoramah BJP sorkar kan siam chuan, kan ram mamawh tinreng central sorkarin min rawn develop dawn a ni’ an ti. Tu party pawhin, BJP thawhpuia sorkar an siam a nih ngat chuan, central sorkar-in an rawn control ngei dawn.

Tichuan, Mizoram chu Hindu + RSS hnuai­ah kan inbarh lut tihna a ni ang. Chakma leh Bru an pawngpawrh ang a, kan kawtthlerah Hindu puithiam chalrang leh Tuikuk leh Chakma, intivei takin an kal huai huai ang a. Chutih hunah meuh chuan, independent sual ni tawh si lovin, thisen chhuahna thim thuah hnih chu keimahni ngeiin kan insiam ang a, Mizoram kohhran leh NGO-te chuan sorkar kan ep tawh ang.

Inthlan hma hauh­va kan hun tawng rapthlakzia kha, theih­nghilh chi a ni lo vang; heng zawng zawng hi BJP politics verther aṭanga lo zi chhuak a ni ṭan pang tawh a! Tuikuk hovin Tripuraa vote an thlak theihna tura an hmalakna dodal ngam, kan Mizo IAS pasal ṭha chu diriam takin min sawn sak a; Central YMA leh NGO’s hnam hnatlang thinrimzia kha kan hria em?

Tun inthlanah hian, party mal sawrkar siam thei an awm lo a nih pawhin, BJP + RSS tel loa sawkar siam turin mipui 90% hian kan duh a. He mi pawisa loa an tilui a nih ngat chuan, kan ram chu thimin min khuh ang a, Biak inah kan ṭawngṭai rual leh ang a, kawng zawh kan huaihawt leh ang a. Chutih hunah chuan, central developement fund pawhin awmzia a nei lovang.

Israel lal Ahaba’n hnamdang lal fanu Zezebeli nupui atan Jerusalem-a a lalut ang khan, dan rual lohvin Hindu puithiam leh vai permit nei lo Aizawlah an vei suau suau dawn. Chutih hunah meuh chuan, kan hnam leh Kristianna chu chim ralin kan awm tawh ang. Ram buai vawi hnihna chu, Mizoram sorkar laka helna a ni tawh ang a, thisen hlu lo zet chhuak chu kan dang zo lo ang.

Tun hi fiahna hun hnuhnung ber chu a ni a; ṭawngṭaiin i vote kha Lalpa hnenah hlan la, Pathian hriak thih ngei lo vote ang che.

- Major Dr. J.Thanruma