Mizoram Assembly Budget Session thlirna - III (Chief Minister thaha vau chungchang leh a phena thil awm)

Tun Assembly ṭhut­khawmah khân, Kamrul-a hming a langsar hle a. Chu mi kaihhnawih zelah, Zoram kalsiama ṭhalai beidawng Apuia Tochawng leh a ṭhiante chuan, Zoram siam ṭha tura pâwl an din thu leh, CM Zoramthanga chu thla thum ral hma ngeia a nihna chawlhsan tur leh, a hna a chawlhsan lo a nih chuan thahah an vauna thu, Vantlâng Titina hmunah kan hmu ta hial a. Rei rial lovin Mizoram Police-te chuan Apuia leh a thurualpui Chan­chinmawiate chu an man zui ta a nih hi.

A hnu lam thu kal zela kan thu hla han en hian, Zoram mipuite hian sawi zui tura thu pawimawh tak awm kan sawi hmaih ta tlat laia hi ngaihtuah nawn leh a ngai hle. Chu thu pawimawh tak chu eng nge? Apuia hian CM Pu Zoramthanga hi Kamrul-a hming hawha contract hna thawk ve mai a nih thu, huai tak leh mahni inringtâwk takin a rawn tlângaupui piap lai hi a ni. “Kamrul-a Chhangte hming hawha CM Zoramthanga chetdan engkim chhui chhuah vek a ni a, he pa Kamrul-a hian engkim a sawi vek tawh e” tiin!

He inpuhna taka hi Zofate u, ngun taka kan ngaih­tuah tlan tur a ni dâwn lo’m ni? Pu Zoramthanga pawh insawifiah turin Zoram mipuite hian kan phut ngam dâwn lo em ni? Kamrul-a ṭawngkam ngei aṭangin kan CM hian a hming hawhin contract hna a thawk tiin, Apuia hi a tlângau ngam a ni si a. Apuia thu sawi ti rinawm zual tur tingin, First Class Contractor pawh ni hlei lo, Kamrul-a hian kum 3 chhûng lêkin, contract hna cheng nuai 11,643 man hu a thawk tawh tih, Pu Lalduh­awma kal tlangin kan hria a nih kha!

Kan ram kalphung han inthlak danglam nasatzia chu, kan MLA rualte hian contract hna thawh an tum ta deuh vek ringawt mai a nih hi. Hei hi dân bawh­chhiatna lian lutuk niin, Zoram mipuite hian ngawi rengin kan thlir liam leh ringawt mai dâwn em ni? Hawh teh u, thu dik hi i ṭan ngam teh ang khai. Engtin nge Kamrul-a ve mai hian, contract hna cheng nuai 100 chuang man hu ringawt pawh vawi thum li lai a thawh theih mai chu le? Chhui zui ngai leh sawi fiah ngai a va tam êm!

Kan politician-te leh kan CM ngei pawh hian hre mawlh teh se. Apuia Tochawng leh a ṭhiante thiltih hi anmahni cho chhuah liau liau, an tuhrah seng a ni tih Zofate hian kan hai lo. Kan ṭhalai rualte, bei­dawnna ruama hnuk luttu bul ber chu kan ram CM pahnih lo ni tawh leh ni mêkte an ni tih mi tin hriat a ni. Nakin lâwkah chuan Apuiate aia fing zawk leh remhre zawkte hian beidawnna ruam aṭangin, tharum thawh zawngin phuba lak an tum lo ang tih a sawi theih ta lova nih hi!

Miin thaha vauna meuh a tawh tawh chinah, chu mi ngei chuan a nunah inendikna tur a nei ngei ang tih hi thil chiangsa a ni tlat a ni. Zoram mipuite pawh hian thil thleng reng rengah, thil thleng bulpui ber chhui nachâng hriain, vei nachâng kan hriat a hun ta takzet a nih hi.

Hetiang zela kan kal a nih ngat chuan, nakin lâwka kan Zoram dinhmun tur hi ngaihtuah ngam pawh a ni lo thuai ta ve ang. Beidawnna thinlung, chân leh hloh leh chuan tur pakhatmah nei lote aia mi hlauhawm, he khawvelah hian an awm tawh chuang lo.

Kan ram rorêltute pawhin he thil thleng kal tlang hian insiamṭhat tum mawlh teh se. A nih loha an kal dan ngai renga an kal lui zel a nih ngat zawngin, nakin hunah harsatna a lo thleng a nih pawhin tu mah mawhpuh tur an nei dâwn lo. An cho a, an rim a, an rimthlu ta a ni mai zawk dâwn si a. Kan ram hi siam ṭhat theih a la ni e. Zoram hmangaih tak taktu mi pakhat, CM kan neih phawt chuan kan ram hi kawng dik zawh turin siam ṭhat theih a ni tih, entawn tur Delhi tlângah an awm reng a nih khu!

Pu Zoramthanga hian Kamrul-a hming hawh chhawngin, dân phal loh tawpin contract hna hi a lo thawk ru reng em ni? Eng­vangin nge huai taka Apuia hian Kamrul-a kâ ngei aṭangin he thu hi hria an nih thu a sawi ngam tak mai le? Zoram mipuite u, ngawi reng tur kan ni lo. Lukhawng nei hauh lova mi thil ti thei rualin, an duh dan dana mipui sum an pumhmawm mawlh mawlh mai hi, Pathian nung betu, Kristian ram inti ve meuh si chhûnga chengte hian, kan enliam leh ringawt a nih zawngin, kan phutâwk ve reng dinhmunah kan ding tih hriain, tu mah han phunnawi leh chuang tur kan awm bik hauh lo ang le.

- Lalremliana Pachuau