Kamrul-a leh Abu Mazumdar leh Mizoram

Central YMA hian tun thleng hian Lengpui Airport chim chungchangah thu chhuah an la nei lo niin hman ni khan in rawn ziak a. Tun thleng hian MZP leh MSU pawhin thuchhuah an la siam bik chuang lovin a lang a, MHIP leh MUP pawhin kan lengpui Airport min siam chim saktu hi an rawn la sawi lem lo.

Heti hian Mizo mipuite kan ngawi liam mai leh mai a nih chuan Mizorama infrastructure lian ber pawl sak ṭhat chim hi he ram hian kan vei lem lo tihna a ni ang a, thil ṭha neih pawh kan phu lo hle tihna a ni ang.

Airport sak chim chung changah PWD in thu chhuah an siam a. Chutah chuan contractor hming hi an ziak lang miah lova, media lama a lan dan chuan he contractor hi Kam­lova Chhangte inti ta Kamrul-a kha a ni a, he thil thleng hi state danga thleng ni ta se kawng zawh luai luai na tur thil a ni.

Kan state infra­structure lian tham chu amahin a chim a, chuta mawhphurtu chu eng hnam pawh ni se state pawi khawihtu a ni phawt.

Mipui pawisa hmangin kan ta tur airport a sa a, chhe takin a sa, a chim ta a ni. He thila kan pawl lian deuh deuh an ngawi tluang thei a nih ngat chuan thil dangah an rawn lang leh a nih pawhin ngaih khatah kan ngai ve tawh thung ang chu.

Smuggling hi sualah kan ngai a nih chuan Pu Zoramthanga leh Himanta Biswa Sarma inbiaknaah khan smuggler lian tak Abu Mazumdar a lo lang ve nawlh tih thlalak kan lo hmu bawk a ni.

Inbiakna satliah pawh ni lo, ramri buai chungchang Mizo mipui ngen chhuntu a nih laia inbiakna hmasa berah Chief Minister pahnih kiangah Abu Mazumdar kha a lang ve nawlh mai a ni.

Assam chuan he Abu Mazumdar hi smuggler tiin an zawng a, an man tawh nghe nghe a ni. Mizoram Assembly Session zawhna chhanaah chuan he pa Assam-in kuhva smuggler tia an man hi Mizoram buhfai supplier lian tak a lo ni leh zel mai hi a vanduai thlak ngawt mai.

Kuhva smuggler-in kan Chief Minister hi Delhi-a Mizoram House-ah a hmu ngei tih MNF thu chhuahah a lang e an ti a, chuti a nih chuan eng vangin nge kan Chief Minister hi he smuggler hian a lo va hmuh dawk dawk? Hei hi a ni Mizo ṭhalai rilru ti natu chu a ni.

Smuggler hian kan Chief Minister hi rawn hmu tawh reng reng suh se. Mizoram buhfai pawh hi mi­dang supply tir vat ni rawh se. Asssam-in smuggler tia an manin Mizoram buhfai a supply hi chu a dik hlawl lo a ni.

- Lalremsanga (RSA)