Written by
Lalrozara
LOCKDOWN TIH HMING AN HNE
24th March 2020 khan India ram mipuite chu inring hman miah lovin National Lockdown an puang a. Lockdown 1, 2, 3, 4 zelin ni 68, 30th May kan thleng a. Unlock 1, 1st June aṭangin unlock 6, 30th November chhungah kan cheng mek.
India sawrkar laipui Financial dinhmun tlahniam lutuk vangin RBI-in economic recession a puang hial a. Mipuite ei leh bar harsa lutuk tawh hi Lockdown puan thut vanga puh a ni.
National Lockdown 30th May bak kha chu state sawrkarin Lockdown a lo puan ve Central sawrkarin a phal tawh lo nghal a, ṭul bikah chauh W.Bengal in cyclone an tawrh vanga Lockdown a puan leh, a bak state dang chuan hot spot lai bikte tan Lockdown an hmang chho ta chauh a.
Keini Aizawl Municipal area pum Lockdown pup pup ang hi chu a awm lovin ka hria. Total Lockdown/ Partial Lockdown an hne a, hmun ṭhenkhat restriction mai hi an kalpui dan ni. Ni khat Lockdown-in economy a nghawng chhe thui lutuk tih an hria a ni.
Delhi chu khawpui nihna angin Unlock hnuah International Flight a thlawk lut a, a thlawk chhuak nghal chur chur a. Ram chhung Commercial Flight pawh a services nghal.
Ram pawn aṭanga lutte chu quarantine leh test an ni. Rel leh motor-in chhun leh zanah lut leh chhuak an chawl lo bawk a. Covid 19 vei lut leh a chhunga awm sate zingah vei thar an tamin an pung zel lo thei lo.
Delhi-ah hian mi nuai 5 in an kai tawh a, 8000 bawrin an thihpui tawh bawk. November thla tir aṭang khan kai an pung tam a, ni khatah 8500 te an kai hial a ni.
Delhi CM Kejriwal hian All Political Party meeting koin khawiah mah Lockdown kalpui an duh lo a. Delhi dinhmun invenna leh damlo enkawl thu-ah hmalakna chak zawk kalpui dan an rel a. Hospital & ICU tam zawk buatsaih a, Law & Order sawrkarin kenkawh ṭhat te an rel.
Inneihna hmuna mihring kal theih zat 200 aṭangin 50 ah an tihhniam a, Bazar lun laiah restriction an siam.
Saving economy is equally important for us as fighting against Covid 19
- CM Kejriwal
There will be no Lockdown in Delhi and there is no need of it neither. We have learned the expirience of Lockdown. I don't think it will be effective now
- Satyandra Jain, Health Minister
Ram changkang USA leh Europe-a Lockdown kan hria. Mipui nuam tawlna Bar, Restaurant te kharin hnathawktute an huam tir lo tih hriat tel a ṭha. Mizorama Lockdown kan puan ve hian engnge ṭangkaina a neih? Mipui economy chhuanchham leh leiba ngah lutuk tawh si, hnathawh theih lohna a rei ta hle.
Sawrkar leh mithiam kan tihte hian ngun zawka rilru hman a, Lockdown leh ṭhin ringawt chelek lo hian englai hi nge kan ven hneh loh, kalphung ṭha zawk ngaihtuah chhuah a hun hle.
Hripui hian kum 2 chu min chen chilh ve turah ngai phawt ang u.