I FATE AN HIM EM?

Mizote hi hnam danglam tak mai kan ni a, mite thiltih tih ve chakna thinlung nei lian tak kan ni. Kan tih chak zawngte kan tih loh chuan mutmu tuah hleithei lovin kan awm ṭhin.

Biak Inah te, YMA Hall-ah te chuan thil ṭha in zirtirna kan hmu hnem a, khawlaiah leh daiah te chuan sualna chitin mai a inlar thung a. Heng hmunah ngei hian kan fate chu tihtur chhuanlam ho te te neiin an va thang bo a. An ṭhiante drug leh zu khawih tawhte an va tawn khan tih ve chakna thinlung an nei ta tlat ṭhin a ni.

Chung an ṭhiante hnen aṭang chuan an lo ti chhin ve ta der mai a. Inah an hawng a, an chhungten a tirah chuan an lo hriat pui lem lo. Kar a ral a, thla a ral a, kum chanve hnu lamah chuan heng ruih theih thil te hi an lo addict hman ta der mai ṭhin a ni. Kum a lo vei meuh chuan zu leh drug addict fate kan lo kawl ta fur mai ṭhin a ni.

Drug addict te chuan kum khuain an chhungte an tibuai a, kawng hrang hrangin an chhungte an bum kualin an neih rohlu te chenin ruihtheih thil tih nan an rawk da zo vek ṭhin. Nu leh pate chu khum laizawlah an rum tlawk tlawk mai ṭhin.

Aizawl khawpui chhungkaw tam zawk fate chu ruih theih thil lakah hian an in veng zo lova, an him zo ta lo. Heng ruih theih thil te hian Mizoram dung tluan a fang chhuak a, Zoram nu leh pate thil tawn rapthlak ber a lo ni ta.

Kan fate chuan an nunin a kham khawp tur hawi thawven leh intihhlimna an nei zo lova, kawtthlerah an va chhuah ṭumin hengte hi ṭangkaiah hmangin nun hlimna tiin state dang aṭanga lo lut mikhual cham rei te chuan heng ruihtheih thilte hi an lo kawhhmuh ta ṭhin ni berin a hriat.

Engpawh nise kan fate kan hmangaih a nih si chuan, tunlai hunah chuan awm awl tam tir loh a, tih tur kan pek zar zar zel a ṭul ta. Sualna in bu a khuar hman loh nan an rilru leh taksa te chu awm awl tir mai mai loh a ṭha ber. Kan fate chu awmna chin hriat te, an thiltih chin hriat te hi a ṭul tak meuh a ni.

Kan hmangaihte nen kan innei a, kan awmna chin te, kan thiltih te kan in hriat sak a, fa kan nei a, kan fate awmna chin leh an thiltih te kan hriat sak leh si lo a, thil sual an lo khawih hman leh ṭhin. Chhungkuaa thiltihna hun neih tam te hi a ṭul hle. Chhungkuaa zin te, lenho te, intihhlimna hun siam fote a ṭul. Kan fate nun chu hlim taka kan siam theih chuan pawn lamah nun hlimna dang an zawn vak a rinawm tawh lo.

In chhung khur chhuahsan fo ngai khawpa tihtur ṭul a awm a nih pawhin tihtur kan hnutchhiah thiam a ngai a, hla tak aṭang pawhin phone-in an awmna chin leh an thiltih te zawh fo a ṭha. An leng chhuak a nih pawhin an tih tur te kan hriat puiin an thian kawmte pawh kan thlan pui thiam a ṭul viau.

Kan fate chu lungngaihna min thlentu ni lovin hlimna leh malsawmna min thlentu an nih theih nan fimkhur takin enkawl ila, thildang kan tihsan lai pawhin theihnghilh lo ila. An nun kan siam ṭhatna tur kawng chu kan buaipui ber lo ni tawh rawh se.

- H.Neih-chungnunga, Durtlang North