I SMART CITY AH PLASTIC FREE

Plastic kan tih mihringte’n kan hman ṭangkai em em hi, 1907 khan Leo Hendrix Baekeland chuan a hmuchhuak a, a hmuchhuak lovang tih hlauhawm tak a ni. Thil chi hrang hrang siam nan khawvel ram tinin an hmang a, a man a tlawm a, a zangkhai a, a samkhai si a, sarang ip leh Dispo thleng leh no kan tih ho phei hi chu a tel loa khawsak harsa khawpin kan hmang nasa ta a. Leo Hendrix-an a hmuhchhuah hnu kum 43 hnu, 1950’s leh 2018 inkar khan, khawvel pumah kumtin Plastic atangin 6.3 billion tones zet bungrua an siamchhuak a, kum 2018 bikah phei chuan 300 million tones zet khawvel hian a siam chhuak bawk. Heta ṭanga zaa 50 (50%) zet hi mihringte'n kan hman tlanglawn ber one-time uses an tih Dispo thleng leh no leh sarang ip (polythene) te an ni.

Khawvelin plastic aṭanga bungrua a siam chhuah nasat ang bawkin, kan paih pawh ṭhahnem tak a ni lo thei lova. Zirchiangtute chuan Khawvel ram hrang hrangte hian, Tuifinriatah plastic bawlhhlawh 1.1 aṭanga 8.8 million  tonnes vel zet kum tin kan paih lut ṭhin niin an sawi a, hetiang reng a nih chuan kum 10 hnuah chuan a let 10 vel zet ni turin an sawi bawk. Environmentalist-te chuan 2050-ah phei chuan Tuifinriata sanghate aiin plastic bawlhhlawh kan paih luh hi a rit tawh zawk dawn niin an sawi.

Environmentalist-ten plastic hian kan environment a tihchhiat nasat zia nasa takin an sawi chamchi a, India pawh a harh ve ṭan ta a, India rama a hmasa ber ni turin Maharastra State chuan an state chhungah plastic (polythene/Dispo) hman a khap a. Mizoram pawhin August ni 31,2019 atangin ‘The solid waste management rules, 2016’ hnuaiah heng plastic aṭanga siam Micron 50 aia tlem hman leh lakluh a khap a nih tur thu AMC Mayor-in a puang ta nih kha.

National Green Tribunal-in AMRUT hnuaia Smart city-a a puan khawpui 100 te chu plastic free city ni vek turin thupek a chhuah a, Aizawl pawh smart city puan zinga mi a nih miau avangin, AMC hotute’n an puang ve ta a. Plastic free city ni turin theih tawp an chhuah tur thu te, Sorkar leh ngo-te'n theihtawpa ṭan lakpui turin an sawm a, a ṭan tirh a sarhu lai kha chuan an ti tak tak dawn niin a lang a, AMC-in casual worker a lak mi 50 training chhuak thlapte’n officer hnung zuiin dawr hrang hrangah kal kualin Micron 50 aia pan, polythene ṭhahnem tak an man a, a ṭhen an chawitir bawk a, Mizote thu awih ṭhin hnam kan nihna a lang a, polythene leh Dispo kan tih angho pawh hmuh tur a vangin a rêm deuh duak a. Dispo thleng leh note pawh dawrkai ṭhenkhatte chuan an thukru bo zova, lei tur/hman tur avang hle hman a nih kha. Mahse, plastic free city-a Aizawl kan puan aṭanga kum chanve emaw lekah, an khapho chu hmuh tur a awm leh ta! Kan ramin zia a neih awlsam taka thil a khap a, bawhzui leh tak tak si loh hi a sim thei lo a nih tak ber hi maw? Khap hmingchhe lo hian, khap a nih dawn thu a khat tawkin puang reng mai se la, a ziaawm zawk lo'ng maw?

Plastic free city-in kaihhnawih bawlhhlawh ṭawihthei leh thei lo thliar hrang turin AMC-in Aizawl veng ṭhenkhatte nikum Dec vel khan thupek an chhuah leh a. A tirin mipuiin ṭha takin kan zawm a, mi ṭhenkhatin thangṭhat lak tumin a hmunah an chhunfin leh tho tih chanchinbuahte an han chhuah a. Mipuite pawh an endik si se lo tih vang mai maitein kan thliar ṭha duh lo leh a, Tuirial Airfield-a bawlhhlawh sawngbawlna hmun siam thar ‘Solid waste management centre’ khuan ṭha tak hna a thawh theih nan mipuite'n kan bawlhhlawhte ṭha tak kan thliar hrana kan paih a ngai si a, veng tina LC-te YMA leh veng mipuite’n ṭangrualin faina nena inkaihhnawih ram leilung humhalhna ni bawk bawlhhlawh thliar hran hi ṭha takin i zawm tlang teh ang khai. Plastic Micron 50 kan khap hma leh bawlhhlawh thliar chungchang kan kalpui dawn khan mipui hnena inzirtirna awm lo lutuk kha a ni.

Sarang ipte pawh han thlakna mai tur a awm si lova dawrkai tan pawh thil buaithlak tak a ni ngei ang. A bikin sarang ip thlakna tur hi AMC hian ngaihtuah se la, hetia dawta plastic free city ni lo hian tlem chuan a ziaawm deuh mahna. German faina kan sawi chuan an bawlhlawh paih an fimkhur a, mi tinin a ṭawihthei leh thei lo an thliar ṭha a, bawlhlawh a paih dan tura ka paih hian ram leilung tan tha ka thawh ve a ni tia an rilrua a bet tlat ang khian, keini pawh hi kan bawlhlawh paih mai mai (plastic) in ram leilung a tihchhiat dante leh khawvelin a buaipui nasat dan thlengin a tam thei ang inzirtir ila. Tin, AMC lamin bawlhhlawh thliar dan tur an tih hi veng tin LC-te nen ṭangkawpa hei aia nasaa kan inzirtir chu a ngai a nih hi, bawlhlawh thliar chungchang hi kan buaina a ni si a. Thil zirtir nuam leh thu awih thei hnam Mizote kan nih miau avangin kan bawlhhlawh sawngbawlna hmunte khuan ṭangkai takin thawnchhuah tham a lo sawngbawl ang a, kan khawpui Aizawlte hi chu kar lovah Plastic a free tawh lo ang a, Plastic free city tak tak kan lo ni tawh mai ang chu.