Budget hmun 3-a ṭhena hmun 2 chuan hna a thawk lo tawp ang, kan Chief Minister hian
March 22, 2022-a World Water Day hmannaah kan Chief Minister in Union Finance Minister hnenah Mizoram Budget hmun thuma ṭhena hmun khat la ṭhen se, duh dana hman phalsak a nih chuan a lawm zawk tur thu a hrilh niin March 23, 2022-a chhuak Vanglaini chanchinbu-ah hian a lo lang a. Engti kawng mahin budget hmun thuma ṭhena hmun khatin hna a thawh theih loh tih ka sawi duh a ni.
Kumina kan budget-a sum hmuh tura beisei hi cheng vbc 14,008.15 a ni a. Hemi zinga vbc 2,581.94 hi hmun hrang hrang aṭanga puk / rulh leh ngaia hmuh tur niin kan state sum hmuh tura beisei tak tak chu vbc 11,426.20 a ni, ti phawt ang aw... Kan neih tur pangngai tak tak nia beisei chu cheng vbc 11,426.20 a nih chu.
Chuan, he vbc 11,426.20 zinga vbc 1,637.71 hi kan state thawhchhuah tur a ni a. A bak vbc 9,788.47 hi India sorkarin min pek tur a ni thung.
He min pek tur vbc 9,788.47 aṭang hian hmun thuma ṭhena hmun khat an lak ṭhen chuan vbc 6,525.65 chauh min pe dawn tihna a ni a. Kan pawisa neih tur chu vbc 8,163.36 a ni dawn ta a nih chu!
Kan sum dinhmun kan en chian chuan kum thar tirah cheng vbc 133.09 indaihlohna kan nei sa a. Chumi chu hman tawh, rulh ngai a nih avangin hei hi kan rulh phei chuan cheng vbc 8,030.27 chauh kan nei dawn ta a ni.
Chuan, loh theih loha pawisa hmanna tur, revenue expenditure-a kumina kan sen tur hi cheng vbc 10,006.51 a ni. Chuti a nih chuan, loh theih loha hman tur ringawtah pawh cheng vbc 1,976.24 lawihin kan indaih lo dawn a nih chu!
Sawi awm leh awm loh hi a awmin ka hre ve ṭhin, ka thu phei chu a ni hauh law!
Khita ka sawi mai khi a la ni hlei nem! K Deposit an tih ṭhin, sorkar pawisa awm si hman loh dahṭhatna, civil deposit-ah cheng vbc 1,560.00 a awm a. Hei hi awm sa tura ngaih a ni.
Chutihlaia vbc 133.09-a kan indaih lo a nih chuan kum tira kan indaihlohna hi vbc. 1,693.09 a ni tihna a ni a. Hemi nen phei hi chuan kan indaihlohna hi cheng vbc 3,669.33 a nih chu!
Hahthlak!
- Vanlalruata