ANGANWADI LEH KEINI
A kum tak chu ka hre lo a, kan pian hlim kum 1989-1990 chho vel kha chu a ni chiang mai - ka nu Anganwadi helper a thawh ṭan kum kha.
A thawh tirh hian lawmman hi Rs. 90/- vel a ni a, tichuan tun kum 2015 thlengin a la thawk a, ban duhin tum ṭhin mah se kan phal lo. An lawmman lak hi tlem hle mah se keini unau pali tan khan a va han hlu ṭhin tak e aw!
Sum lakluhna dang kan nei lo a, kan nu lawmman lak tlemte chu kan ring ṭhin. Hun a lo kal zel a, Middle sikul kan kal lai kha chuan Rs. 250/- chu a la ve tawh tih ka hria.
Krismas te kha a lo thleng a, thawmhnaw thar neih kah kan duh ve ngei zel a. Ka nu Anganwadi hlawh - October aṭanga December thla chhung a khawl khan Krismas thawmhnaw thar kan lei ve ta ṭhin a nih kha - a hluin kan va lawm ṭhin tak em! Nitina sum hman ngai leh chaw ei reng chung si khan ka nu khan engtin nge a lawmman kha a lo khawl ṭhin tih hi tun hnu hian ka ngaihtuah pha lo!
Krismas thawmhnaw mai a ni lo, MBSE hnuaia Pawl Li, Pawl Sarih, Pawl Sawm, Pawl Sawmpahnih, MZU hnuaia BA kan exam-na fee zawng zawng te kha Anganwadi hian min tumsak a, kan va lawm em!
Pathian khawngaihna kan chang a, damloh leh natna khirhkhan lutuk tawk lo khan min siam a, tun hi kan lo thlen theihphah a, Lalpa chu fakin awm rawh se!
Nitin sikul an kai ve a. Anganwadi Helper nih hlawk loh thu hi kan han sawi ve ṭhin tak na a, keini chhungkaw tan chuan sum leh paia kan innghahna ve ber a la ni - tunah hi chuan Rs. 1500/- vel an la ve tawhin ka hria a, tin kan dawr ba kan rulh theih phah ziah a, kan lawm hle.
A AW B ka thiam phah em em a, Sapṭawng a 'What is Your Name' leh 'My Name is..' awmzia kha ka hriat phahin ka hman thiam phah a - English medium kha keima tawkah ka ngai bik lo. Nursery Rhyme 'Are You Sleeping' kha ka thiam phah em em bawk a, kum li mi, Sap Sikul kal lo thingtlang naupangah chuan ka va changkang em!
'Corruption' a ni em chu ka hre lo a, Vitamin leh Bisicuit, Lactogen leh Cerelac kan sem ṭhin te kha, a chuang bang chu kan lo fanghma no ei hmiah hmiah mai a, sum tam tak kan save phah a, kan lei phak loh leh kan ei phak loh kha kan eiin kan neih phah a, a va lawmawm em!
Keini chhung zawng Anganwadi hi sum leh pai aia kan bulpui a ni a. Heng zawng zawng min petu chu bang lo a min hmangaihtu Pathian a ni. Lalpa, kan va lawm em! I malsawmna kan dawn hi kan chhiar seng lo e!
- Rinfela Zadeng