LALNUNSANGA R.I.P

Zofate zinga stand up comedian ṭha ber pawla chhâl ngam, Lalnunsanga chuan mual a liam ta mai a, fiamthu khawvel mai ni lo, fiamthu ngainatute kan ngui nghuai mai a nih hi. A sulhnu hnutchhiahte hi ropui em em mah se, a la tlem kan ti a, kan kham lo ṭheuh a ni. Puitling aṭanga naupang thlengin an hlimpui fiamthu ṭha tak tak a thawh ṭhin a, tunlai ṭawngkam takin a common lo em em mai ṭhin leh nghal a; chutah mi thawh tawh a sawi pawh a sawi dan leh a awkiin a zir em avangin kan nuih hluah hluah zel tho a ni. Hmanni lawkah stand up comedian ṭha ber nia mi tam takin an ngaih, Pu Roluaha kan chán tawh bawk a, fiamthu ngainatute kan hním ruih a ni ber mai. Chutah, anmahni pahnih a ṭha zawnga fuihtu Pu Mafaa a lo awm lo tawh nen, fiamthu khawvel chuan arsi lian 3 inhnaih te te, hun lo takin a chan kan ti thei ang. A pawi vawng vawng e.

Stand up comedy hi kan ngaisáng tláng a, kan hlimpui a, Pu Rotluanga (zephyr) hmalaknain comedian search te neih ṭhin a ni a, mi tinin kan hlut viau vek a tih theih ang. Kei hi a hlut pawl ber ka nih ve ka ring a, stand up comedy hi ka lawm em em a, a zo a vaiin ka ngaithla nasa hle. Sapramah ka la awm ve loh avangin an nunphung tak tak ka hre pha lo va, an stand up fiamthu pawh hi ka hlut pha chiah lo. Chutih laiin vairamah te kan lo awm ve nual tawh avangin vai stand up pawh hi hlimpui tak ka ni. Zakir Khan, Amit Tandon, Sorabh Pant, Nishant Tanwar, Vivek Tyagi etc te hi ka dahsanzualte an ni.

Stand up comedy hi kan ngaihsan tlan em em rualin kan comedian ṭhenkhat hian a nihna an man fuh vak lo em aw a tih theih; fiamthu thawh tura sawm an nihin an hlawhchham fo mai. Chutih laiin Lalnunsanga te, Roluaha te chuan an man fuh em em a, an hlawhchham ve mang lo. Canvass Laughter Club, East India comedy tihte vairamah chuan a awm a, club/pub/college function velahte comedian-te chein sum hailuhna ṭha takah an hmang mek. Kan ramah erawh chuan a kalphung kan la man fuh tawk loh avangin kan comedian-ten an la hlawkpui tak tak thei lo.

Fun club/comedy club-te hi nei ve tawh ila, regular takin hotel/college function etc ahte stand up comedy kalphung pangngaiin kalpui ve thei tawh ila tih hi ka ‘dream’ a ni fo ṭhin. Mahse, he lama inhmangte han biak kual hian an la huphurh deuh nain kan la nei ve thuai ang a, awmze nei zawkin kan fiamthu thiamte pawhin eizawnna an nei ve thei tawh mai dawn a, a nghahhlelhawm khawp mai. A awmzia chu pawisa chawiin fiamthu kan ngaithla ve tawh ang a, bung thar kan kai tawh dawn a ni. Zaithiamte concert pawh man chawiin kan en ve tho hi maw. He lama tui miten ngaihtuahna lo seng ṭheuh turin kan sawm ni nghal se la. Kan comedian-te pawhin ‘pa pakhat pawh kha’ tih stage hi an pelh a ngai ve tawh thung ang.

A tawp nan. Zu leh comedian-te kan hmeh pawlh mah mah a, zu fiamthu an thawh a kan nui hluah hluah a, kan hlimpui ber emaw tih mai tur a ni. Hei hian insum ngai lova ‘license to drink’ nei taa inngaihna a siam ta mai em aw, tih hi chhut tham tak a ni. Mipui lam pawhin hemi kawnga kan sukthlek dan hi thlak a ngai ta niin a lang e.

I fiamthu nuihzatthlak tak tak, original em emte, I awki leh I fiamthu inhmehziate hi kan la sawiin kan la ngaithla dawn chauh. I kal hma lua a ni e.

RIP Lalnunsang...

- Dr Para