Kan Lok Sabha MP a chhuanawm

November 30, 2019 khan Inside Northeast buatsaih NE Youth Conclave 2019 chu Guwahati-ah ka chhim ve a. Politician, filmmaker, journalist, sports administrator leh sorkara mi pawimawh rual kara Mizoram Lok Sabha MP Pu C Lalrosanga che vel kha a chhuanawm ka ti hle.

He Conclave-ah hian Hmarchhak leh ram chhung hmun dang aṭangin mi pawimawh tak tak an sawm a, min sawm tel ve hlauh a. Min sawm chhan chu Mizoram Football Association leh District FA lama ka thawhpuite thawh rah kan state football hmasawnna vang a ni ber ang. MFA Honorary Secretary ka nihna anga sawm ka ni a, ka thusawi tura an thlan pawh sports lam a ni.

He Conclave-ah hian thupui hrang hrang siam a ni a, keimahni sawi awm chi zel min sawitir a ni deuh ber. Meghalaya Chief Minister Conrad Sangma leh Hmarchhaka BJP hmuipuipu Himanta Biswa Sarma leh mi pawimawh ṭhenkhatte erawh Delhi lamah Citizenship Ammendment Bill kaihhnawihah Union Home Minister-in a ko khawm a, an tel ve thei ta lo - anni rual kha tel ngat phei se, an thusawi a ngaihnawmin ngaihven a hlawh zual ngawt ang.

Chutih rualin Assam Chief Minister hlui Tarun Gogoi a tel a, Manipur Deputy Chief Minister Joykumar Singh leh Tripura Deputy Chief Minister Jishnu Dev Varma-te an awm a, state hrang hranga MLA leh Lok Sabha MP-te an tel a, Union Minister hlui Jairam Ramesh pawh a tel.

Kan MP Pu Rosanga ruala ṭhu tur panel member dangte an remchang ta mang si lo a, a mal beih ta a. A kawmtu hi YouTuber lar Akash Banerjee a ni a, ani hi political satirist an tih tur khawpa politics thil han chhaih kual vel thiam a ni. Chutihlaiin an subject hi 'Northeast - an economic corridor to Southeast Asia and BBIN countries' tih lam hawi a nih avangin Akash pawhin thil a zawt chik teh chiam lo. Kan MP hi Sapṭawng a thiam piah lamah thil a sawi thiam a, mipui pawhin ngaihnawm an ti - a subject hi ngaihnawm tak ni lo mah se a sawi ngaihnawm thei tlat.

State pawnah leh ram pawnte thlengin hetiang thil sawihona hrang hrangah hian ka tel ve zauh zauh a, ka Sapṭawng thiam beitham tak avanga induh khawp lohna (insit chu ka ti duh bik lo, kan ṭawng ni miau hek lo!) hi ka nei fo ṭhin a, Pu Rosanga erawh a chhuanawm par par hle. Ani hian hall khata mipui pung khawm hmaah rem leh rem loin Bible thute a rawn zep hram a, a tiṭha ngawt mai.

A thusawi hma leh a thusawi zawh thlengin kan thu dun a, kan titi a. Delhi lama CAB sawiho lai taka Guwahati lama program a nei chu a inthiam loh thu leh meeting tura an rawn hrilhin Guwahati a thlen hman tawh thute a sawi a, zingkara thlawh kir leh mai a duh rum rum thute leh Delhi lama meeting an zawh tawh si dante min hrilh. Engpawhnise kan MP hi hnam dang zingah pawh a zahpuiawm lo mai ni loin a chhuanawm a, thil danga a chet dan chu kan zuk hriatpui thuk lo a, he Conclave-a a che vel na na na hi chuan Mizoram a tihmingṭha hlein ka hria.

Han sawi belh ta ila, hetiang ni-khua hian rualawh a na ṭhin. State dang, Vairam hmun dang chu sawi loh Hmarchhaka kan thenawm politician-te leh politician kher lote pawh hi an duh tawkin Sapṭawngin an titi theiin thu an sawi pap pap thei a, hemi kawngah hian kan tan deuh deuh a ngai. Kan ram chhunga mi chhuanawm tak tak chu kan nei nual a, 'export quality' hi kan mamawh belh nasa hle. Ṭhangthar zingah ṭawng thiam, hawi zau leh khawvel thlir thiam tak tak erawh ṭhahnem tak an awm tih ka chiang.

Keia Conclave subject ve ber chu India Hmarchhaka sports tih hmasawnna lam a ni a; 'sports' tih ni mah se ka bula ṭhu tura an sawm lah AIFF Vice President leh Meghalaya Football Association President Larsing Ming a ni bawk si a, kan football ta mah mah em aw!? Chutih rualin a huap zau thei ang bera sawi turin ka inbuatsaih a, National Games history leh medal tally hrang hrangte ka zir chiang a, Mizoram hian sports lamah hian Hmarchhak state zingah pawh Manipur leh Assam kan la khan lo hle a ni. Mizorama kan phurpui em em si, national level-a kan lan theih reng reng lohna sports discipline kan ngah lutukte hi ennawn a chakawm khawp mai.

Session danga panelist dangin CAB leh ILP te an khel a, insurgency chungchanga Manipur Deputy Chief Minister (IPS officer pensioner ni bawk) sawite kha thil ngaihnawm a ni. BJP sorkarin India rama chengte ṭawng thuhmun (Hindi) min hmantir an tumna chungchanga thlirna hrang hrangte khan ngaihtuah a tizau.

Mithiamten media leh social media an sawi a, ṭhalai leh mipui mimir a nghawng dan te, politics thlenga hmanrua a nih theihziate an sawi rualin, fimkhur a ṭulna leh inbumna hmanrua a nih theih dante an sawi lang tel a - a bengvarthlak.

Arunachal Pradesh lam MP hlui leh tuna an MLA ni mekin, "CAB hi eng ang pawhin Parliament lamah lo pass mah se, kan state-ah chuan kan duh lo, an hmang lo ang. Min barh lui lo ang, na takin kan dodal dawn, kan duh lo takzet a ni," a han tite kha ngaihtuah zui loh theih a ni lo - "Keini khan Amit Shah kha Pawndum lo sin khum ila aw..." tiin ka ngaituah zui ta zel a!

- Lalnghinglova Hmar