MIZORAM MLA AN TIBUAI

Kan sawi tam leh theih­nghilh a tam chu a ni mai a. Lungte au chhuah hun nghah leh ngawt thin lah a tlawm thlak sia le! Thingtlang lam voter-te vanga sawrkarna siam MNF hnuaia kan MLA-te chuan anmahni hlawh en nawn a, siam ṭhat ngai siam ṭha tur pawl a siam a, chu body chu anmahniho tho an ni.

Eng chen nge an hai a, an zir phei chu kan hre ve law; a hmaa an hlawh lak aṭanga 130% chuang a sang teh meuh maia tihsan ṭulin an hre mauh mai si a, pass loh phal chi-ah an ngai phal ta lo a nih kha.

Hman ni lawk inthlana mi tlawn nana nuai tam seng an ni bawk a, vawk rilṭam chaw pek ang em chuan an hap hreh deuh a, an hel rei lo khawp mai. Awm lo an ti vek a, an hnar phal lo tih erawh a chiang viau e.

An sawihonaa tihpun ṭul an tih chhan tlangpuiah an bial chhungah mirethei ṭanpui ngai an tam tih a lang. An retheihna denchhenin a ṭanpuina tur an account kal tlangin Mizote tax tling khawm leh Budget te lo kawih pen an tum a ni berin a lang. An biala miharsate hian an lo tibuai hle a, MLA nih tihrehawm khawpin an lo sawp chau ṭhin ni tur a ni. Tunah chuan a hmaa an tihbuai let 130 aia nasain tihbuai an cho zak tawh hmel - lo inthlahrung lo phawt teh u!

Inthlan dawnah MLA an nih theih nan theihpalingkawhin an bei a, an han tling a, ruai nen an lawm luih luih a. MLA nih hautakzia thu rorelna In sanga an sawi ngam leh si kha Isua thil mak tih tam tak aia mak ka tih a ni.

Sorkar hna thawk senior tawh lutukte nena an han inkhaikhin te pawh hi thil ropui lo tak chu a ni. Politician ni tur hian eng qualification mah a ngai lo a, khua leh tui nihna neih kha a ni deuh mai.

Eizawn nan poli­tics-ah an inhmang a nih phei chuan ram tana chhenfakawm nih aiin phurrit an ni lo thei lo thuai ṭhin. Sorkar hna­thawk senior-te hian an hlawh ang la tur hian kum tam tak an service a ngai a, a nih loh vek chuan inelna hautak tak paltlang a ngai a ni.

Kum khat pawh MLA an nih hmaa tiang zat lak ve ngawt hi thil intu lo tak chu a ni. Nge rim taka bum theih bum tuma tha leh sum senga an lo beih vena an hmachhuan zawk!

Mizoram politics kaih­hnawiha thil thleng tam tak hi hmun kil­khawr taka awmte pawn kan lo hmelhriat ve zel tawh a. A chhia leh a ṭha pawh kan rilru hi chuan a hre ve tawh fu chuan a lang, tiang lam atan te hian social media te hi hmang ṭangkai zel bawk ila.

Kan ram fahrah te hi keimahni avang hian mi ak rualin a ak ve thei tih te hi ngaihtuah a hun tawh khawp mai. Kan nulate sap (vun var/ sen, advanced countries) etc. ho-in an bem/ chhai a, duh lo thei lo dinhmuna an ding emaw an inti tlat te hian kan dinhmun hi a tilang chiang a ni. Khawvel hma-ah hian kan la tlawm raih raih khawp a nia.

Table hi en la, kan ram din­hmun chu a chiang viau e. India state leh Union territory 33 zingah a pachhe ber pawl kan ni (kum 2/1 erawh chuan a danglam tih kan hmu thei ang). Chutih rual chuan state thawh chuah chawhrual (Per Capita Income) ah chuan 18 na (141,210 (US $2,000) ah kan awm ve ran a, hei hi chu a chhan kan hriat vek kha. In khua YMA member zingah kum khata Rs 141,210 (nuai khat singli za hnih leh cheng sawm) thawk chhuak lo an tam viau chuan Zoram hi a hrisel lo a, tuam dam ngai lai tam tak a awm tih i lo hre mai dawn nia.

India rama MLA hlawh sang zual paruk leh an state thawhchhuah zat tar lan tel a ni. (MLA hlawh hi state dangah an tidanglam thar em, ka hre chiah lo).

- Tomy Hnamte