MIZORAM POLITICAL PARTY-TE MUTAN! QUA VADIS?

Vanglaini July 5, 2019 chhuakah khan, Pu V. Lalchungnunga article 'Political Party chhungkua' boruak chungchang kha han tuihnih ve hlek ila.

Democracy kal­phungah chuan sorkar siamna turin mipuiin aiawh kan thlang a, sorkar siamna bul zawk chu political party-te hi an ni leh a. Party hruaitute pawh mipui thlan tho an ni. Kan thlan chhuahte chu mi fing ber leh fel ber ni kher lo mah se, an hun chhung na na na chuan mipuiin an thu awiin kan lo ṭawiawm tlat tur a ni.

An ṭhat vak loh chuan inthlan leh hunah mi dangin kan thlak mai tur a ni. A hun hma-a hotu thlak tumna chu buaina chawk chhuaktu a ni thei.

Democracy ṭhatna chu a ṭul huna inthlak mai theih a nihna hi a ni. Amaherawhchu, inthlak chu buaina tel lo a, a hunah leh dan dik taka tih tur a ni thung (Change without disorder).

Mizoramah pawh hian party inthlanna a la awm zel ang a, inthlan hi kan thiam a pawimawh.

Chuhtu awm lo-a inthlan theih a nih fo loh avangin mi eng emaw zatin inthlan an chuh thei a. Mahni leh duhzawngte tlin theih nana tih dan thianghlim lo pawh pawisa lo-a beih vak te hi party pumkhatna tichhetu a ni fo. A duh apiangin an chuh thei a, thianghlim taka inthlan mai tur a ni.

Inthlan a lo hun hian hruaitu hlui leh a ding laite mizia a lang duh hle. Hruaitu nihna hi mahni kuta chelh reng duhna a awm ṭhin. Eng hun lai pawhin min duhtu leh min duh lem lotu hi eng emaw zat an awm tih hriat a ṭha.

Mizo politician hlun pakhat chuan heti hian a ti 'Party chhungkua-ah neuh neuh a awm tawh chuan inthlak a hun a nih hi tih hruaitute hian an hre ngei tur a ni.' Party chhung boruak-ah hian thil inmun dan chu a hriat mai ṭhin. Chutih hunah chuan hruaitu ni mekte hian mi dang ken nachang hriat a pawimawh. Party ṭhan zel nan leh a keh chhiat loh nan insiam danglam hret hi a ṭul fo a ni.

Hotu ṭha fe-a kan ngaih pawh mi ṭhen­khat tan chuan ninawm an lo ni thei tlat. Chuvang chuan hruaitu inthlak thiam hi political party-te hian thiam se, party chhunga boruak ṭha lo awm ṭhin hi chu a reh mai ang. Hotu nih loh thiam miah lo, mi dang kaihza ven harsa ti tlat ṭhinte hian party chhungkua boruak ṭha lo an siam ṭhin.

Mizoram political party inthlang turte hian mahni hmasialna te, chapona te, mi dang itsikna te, mi dang tling lo tlata ngaihna te hi do tlat sela. Hruaitu thar remhriatna te pawh kan ṭhat phah thei a, Kristian rilru mil tak pawh a ni e.

Mahni chauh in ngaihtuah lo ang u.

- J. Lalhlunsanga