Inthlan leh a behbawm thlirna

Mizote mize ṭhatzia chu, kan vote thlak danah a lo lang leh ta. Ashish Kundra, CEO chuan Mizoram, chu 'the most democratically organised society' a tih mai bakah, Mizoram aṭangin state dangten zir tur an neih thu a sawi chhuak hial.

Kan mize ṭhatna lo lang chiang em em mai chu, Tuikuk-te dan dik lo va electoral roll-a thun chiang lutuk avanga kan buai laih hnuin, danin nomination file a nih tawh avanga inthlan hnua chinfel tur a ni a tih avangin kan ngawi ta mai chauh pawh ni lo vin, Tuikuk vote thlak turte Kanhmun YMA in duat takin an lo buaipui theite kha Mizote mize ṭhat­zia tilangtu a ni.

Heti khawpa khua leh tui ṭha kan nihna kan tihlan lai hian, ECI lam hian kan mamawh min pe tawk lo niin a lang.

Vote thlak theih chhungin mipuiin kan thlak kim hman lo, ṭhenkhat chu hmanraw chhiat avangin zan rei tak tlengin vote an thlak a. Hei aia pawi zawk chu, vote thlakna hmun a tlem avangin, mi ṭhenkhat intlar rei peih loh vanga vote thlak lova haw ta mai an awm nual.

Heti khawpa khua leh tui ṭha hi, ECI hian kan mamawh phuhru khawp min pe ngei tawh turin, NGO emaw MPF emaw hian aw chhuah se, inthlan lehah chuan hei aia vote % a tla ṭha ngei ang.

Inthlan chu kan zo fel ta, kan thlan tlinte chu, a thlangtu tam zawkten kan duhte an ni. Tute nge chung mite chu? Vote chhiar hunah a lo lang dawn.

Vote result hi enge ni ta ang, inthlan awm tawh zawng zawnga ṭawngṭai nasat ber ṭum a ni awm e. Kan thlan tlinte chu kan duhthusam a nih loh pawhin, kan ṭawng-ṭai chhanna a nih dawn tlat avangin, chhuanlam siam a theih loh. Mizote hi eng rilru pu nge kan nih tih hi, inthlan result hian a ti lang dawn a ni.

Zoram hian hmel thar a hmu dawn nge, kan bu ngaiah kan let leh dawn? Eng party pawh lo tling se, zoram siam-ṭhatna tur kan sawi tam tawh.

Tun aṭanga kum 5 chhung hian Zoram­in hmel thar a hmuh kan beisei tlat a ni.

- Lalrinliana Colney