GEORGE BUSH A LIAM TA...

Kum 94 mi niin US president 41-na George HW Bush chu ni 30.11.2018 khan a thi a. A nupui thih hnu thla 8-ah a thi ve ta a ni. A nupui Barbara Bush nen khan kum 73 an innei.

US president a han nih theihna kha a phakar leh pawisak a neih loh vang te, vote a lei ṭhin avang te, a elpuite chhiatna a zawn thiam avang te, dik lo taka sum lalut chunga a zahtheih loh vang hrim hrim te, mipui thudik hre thei loa a bawlphawn vang lam a ni lo. US Navy-ah lieutenant a ni a, Indopui pahnihna a lo chhuah khan raldo turin sipaiah a inpe a, a hunlaia aviator naupang ber a ni. A zirna te pawh a chawlhsan rih hial. Indopui pahnihna lai hian a thlawhna khalh pawh an kahthlak sak a... chawimawina te pawh dawngin 'war hero' tih a hlawh pha a ni.

Sipai aṭanga a chawlh hnuin sum­dawnna lamah a kal a, kum 40 chauh a nihin millionaire a ni pha. US house of representative member te, China rama Us palai te, US Ambassador to UN te, Director of central intelligence te, US vice president niin President a ni chho a. A hunlai hian hun harsa tak tak an tawk a. Gulf War a hmachhawn a, Cold war a tawp zui bawk. Harsatna karah zahawm takin a hna a thawk thei a ni.

Sipai aṭanga a chawlh hnu khan Yale University-ah a lut chhunzawm a, Economics-ah degree a la a ni. A fapa pakhat George W. Bush chu US President 43 na a ni a, John Adams a hnua mahni fate US president nilai hmu leh hmasa ber a ni. A fapa dang Jeb Bush-a chu Florida Governor a ni tawh bawk.

A foreign policy vanga president a thlan a ni a. USSR tlakchhiat lai, Cold war tawp, start treaty ziah, Gulf War te chua a hunlai a mi a ni a, a hlawhtling hle nghe nghe. A economic policy a tlak phah a, chu chu Clinton-a tlin chhan a ni ve bawk. Indopui pahnihna hnu lama economic a ṭhanna nasa ber kha Clinton-a hnuaiah hian a thleng ve leh ta reng a ni.

Chutiang chu an ni, mi chu! An inthlan­naah te hian an policy an sawi a. An policy avangin an thlang tlingin an paih ṭhin. George HW pawh hi term khat chauh a president nghe nghe. A hmain Republican tho Reagan-a kha president a ni. Term hnih an chelh tawh avangin party thar an thlang kher lo. Term khat chauh an la chelh avangin party ngai an thlang leh ngawt hek lo. Thu inchuh an nei a, chu chu America ram hruai an tum dan a ni.

Keini chu engtin nge ram hruai an tum sawi hman lek loin an campaign chu a ni mai a. Kan heti leh ṭhin. Clinton-an a thlak dawn khan he lehkha hi a hnutchhiah,

Duhtak Bill,

He office chhunga ka han luh leh hian, kum li kal taa lawmna leh zahawm ka tih ang tho khan ka la awm. Chutiang tho chu a ni tih i hre ve mai ang.

Hetah hian hlimna sang tak ka duhsak che. Preaident dangtena khawharna thuk tak an sawi ṭhin ang kha ka tawng ve lo a ni.

Hun harsa tak tak a awm dawn a. Sawiselna awm ang lo tak tak nia i hriatte tawngin chung hun harsa te chu a belhchhah ang.

He lehkha i chhiar meuh chuan president i ni tak tak tawh ang. Duhsakna ṭha ber ka hlan che a. In chhungkaw tan duhsakna tak tak ka hlan a che u.

I hlawhtlinna hi kan ram hlawhtlinna a ni. Nangmaha ka beiseina hi a sang hle.

Duhsaknan tha ber nen aw - George

Chutiang mi chu an ni a. Chutiang chu mi chu an ni. Bush-a hian, "Tute emaw nena in inkhin avang ringawtin hmelma innih kher angai lo. Politics hi a sualin a chhe kher tur a ni lo." Tiin a sawi. Clinton-a te nen hian an inkawm ngeih a, a hnu lamah zel pawh vantlang tan hna ṭha tak an thawk ho zel a ni.

Kum 40 chuang public service-ah a hun a hmang a, a damchhung hun tam zawk a hmang tihna a nih chu. Public service/ servant hi mipui chhiahhlawhte hi kan ti mai ṭhin a, mipui rawngbawltu an ni. Chhiahhlawh chu an ni lo. A nawm amaka kan tih kawi theih kan chhiah hlawh an ni lo a. An duh duha zahawmna awm loa khawsa tur an ni bik bawk lo, mipui rawngbawltu an ni.

George HW a pa pawh hi US Senator a ni ṭhin bawk. Anni chhung hi mipui rawngbawltu ropui tak an ni. George HW Bush hian zahawm takin a hun a hmang zo a. Anni chhung hi kristian ṭha tak an ni.

- F Vanlalrochana