HIV/AIDS kan do dan hi...

HIV/AIDS dona chungchang hi i'n sawi ve dawn teh ang. Mizoram State AIDS Control Society (MSACS)-a thawkte hi kan ṭhian ṭha te, kan thawhpuite an ni a; an haw em lo'ng chu maw!

Kum 1990-ah HIV kai Mizo­ramah hmuh ṭan a ni a, chuta ṭang chuan HIV/AIDS dona kawnga Mizoram sorkarin hma a lak dan tak hre pha chiah lo mah ila, hma a la ṭan a tih theih âwm e. Kum sang bi thar kan kai hma lawk khan tuna HIV/AIDS dona kawnga hma latu ber MSACS din a ni a, chuta ṭang chuan Mizoram sorkarin awmze nei lehzualin hma a la kan ti thei ang.

MSACS-in hma a la nasa

MSACS-a thawkte leh hotu bera an neihte'n an tuipui ṭhin bawk a, HIV/AIDS dona kawng­ah pawh an thawh hlâwk hle ti ila, kan sawi sual lutuk awm lo e. Chutih rualin, duhthusam erawh an ni bik kher lo ang; duhthusam ni zawng a har em hi.

HIV/AIDS donaah te, mipui mimirin an hriat chian theih nan te, inkai chhawn theih dan leh inven dante an hriat theih nan nasa takin hma an la tawh ṭhin a. Tun hma deuhah phei chuan 'event' chi hrang hrang an buatsaih ṭhin a; drama competition, sport tournament, event sponsorship leh a dangte. Chu'ng event an buatsaih leh sponsorship an tih ṭhinte chuan awmzia thui tak a neih ngei a rinawm.

Nasa takin MSACS hian ṭan a la a, an rilru leh ngaihtuahna pawh an séng nasa tih a lang reng mai. Amahni chauhin an do hneh theih a ni lo tih an hre chiang a, chuvang chuan NGO hrang hrangte nen an thawkho a, pawl dangte leh kohhrante bakah, mipui hrim hrim ṭanrual a ngaihziate pawh an tlangaupui nasa tawh ṭhin.

HIV/AIDS a pung zel si hi!?

MSACS-in nasa takin ṭan an la a, hma an la a, ngaihtuahna an séng nasa a; hmalakna awmze nei an kalpui theih nan theihtawp tak meuh an chhuah tih hi rinhlelh tur a awm lo.

Amaherawhchu, heti taka ṭan an la nasa chunga Mizoramah HIV/AIDS-in kiam lam pan lo a, a hluar zel zawk leh tunah phei chuan India rama a hluar berna state kan ni ta hial hian ngaihtuah a tithui a, mutmawh hnârmawha neih tham a ni. Tih fuh tâwk loh, hmaih lian tak kan nei em ni ang le?

MSACS-Condom-Kohhran

Tun hnai hun eng emaw ti aṭanga MSACS-in HIV/AIDS dona kawnga an kalpui langsar ber chu condom hmang tura inzirtir hi a ni âwm e. Sumdawnna lirthei hrang hrang - city bus, taxi leh maxicab-ah te, TV-ahte leh hmun dang dangah condom hmang tura inzirtirna kan hmu ṭhin. Ni se, a ṭul tak zet a ni ngei ang. Tin, kan sawi lan kher loh hmalakna kawng hrang hrang an nei a ni.

Kan ramah kohhrante'n huháng an neih lenzia te, mipui hneh tura an ṭangkaizia kan hre tlang a. Chu'ng kohhrante chu MSACS hian HIV/AIDS do kawnga thawhpuiah an sáwm tawh ṭhin. Kohhrante chuan an lo hnar lem lo a, an theih ang angin hma pawh an la ve a; kohhran ṭhalai pawlte pawhin hma an la ve mek a ni.

Chutih rualin, tuna MSACS-in a uar ber, condom hmang tura inzirtir erawh chu kohhranin a pawmpui theih loh thil a ni hmel viau. A chhan chu - Pathian thuah leh kohhran inzirtirnaah chuan mipat hmeichhiatna (sex) chu nupa huang chhungah chauh hman tur a ni a, chutah chuan condom hman a ṭul kher lo thei ang. MSACS erawh chuan condom hmang tura inzirtirna uar takin a kalpui thung a; condom hmang tura inzirtirnain a kawh leh tinzawn ber chu - nupa huang pawn lama sex hman a ni. Chu tak chu kohhran pawhin a pawm theih loh chu a ni.

Kohhran duh dan chu nupa páwn lama sex hman loh a ni a, chu chu kohhran leh a hnuaia ṭhalaite pawhin hman aṭanga tun thlenga uar taka inzirtirna an kalpui mek a ni. MSACS hotute pawh hian an duh ber leh an inzirtir nasat ber (first priority) chu kawpui laka rinawm te, nupa páwn lama sex hman lohte a ni a; condom chu an ngaih pawimawh pahnihna (second priority) a nih thu an sawi tawh ṭhin awm e - media-ah kan hmu tawh ṭhin.

Chutih laiin, MSACS hian HIV/AIDS laka invenna tura mipui an zirtirna kan hmuh ṭhin zinga a tam ber chu condom hmang tura inzirtir a ni a, chu chu an second priority a ni. An first priority nia an sawi leh kohhran pawhin a duh dan - nupa huang páwn lama sex hmang lo tura inzirtirna erawh kan hmu ngai lo. Nupa huang páwn lama sex hmang lo tura inzirtirna banner/hoarding intar kan hmu ngai lo a, commercial vehicle-a sticker tarah kan hmu ngai lo a, TV advertise­ment-ah kan hmu ngai hek lo!

Thailand an sawi ṭhin. HIV hluarna ram a ni a, nasa taka condom an sem nasat vanga HIV kai thar tlakhniam nasatzia leh a dona atana a hlâwkzia an sawi thin. A dik ang ka ring, hnialna tur ka nei lo. Uganda, USA, Britain, Korea, Colombia velah pawh HIV/AIDS dona atana hmalakna awmze nei bik riau an nei ang a, a inang kher âwm lo e.

Chutiangin, India ram, a bikin Mizoram atana hmalakna ṭha leh awmze nei ber kan nei mai thei a, ram dang nen pawh a inang lo mai thei. A chung ram kan ziah lantea awmze nei ber kha kan ramah hian awmze nei ber a ni lo ve thei tho mai. Thil hrang hrangah hian ram dang, ram changkâng zawk pawh ni se, an tih ang zawng zawng hi kan ram tan a ṭha ve kher lo thei a, an tih ngai loh, ṭha lo an tih pawh kan ṭhatpui phian thei bawk.

Rinawm tura inzirtir

Kristian ram kan ni a, ram dang nena kan dinhmun a inang vek lo mai thei. A chhunga cheng mipuite rilru sûkthlêkte pawh ram dangte nen chuan a dang ngei ang. HIV/AIDS dona kawngah pawh hian, Mizo mipui tana awmze nei ber tur hi ngun lehzuala kan ngaihtuah a ngai a; ram dangin an ṭhatpui leh ṭangkaipui kha kan rama kan ṭangkaipui ber a ni kher lo thei tih hre chunga ngaihtuahna sên a ngai âwm e.

Condom hmang tura inzirtirna hi kan sawisel a ni lo a; nupa páwn lama sex hmang ṭhin an awm miau a, tun aia uar zawk pawhin kalpui zel a ngai ang. Chutih rualin, kan first priority - kawppui laka rinawm tur leh nupa karah chauh sex hmang tura inzirtir hi Kristian rama ṭhalaite hian an beisei a ni. A awmzia chu - condom hmang tura inzirtirna poster/banner/hoarding-te kan hmu ṭhin ang bawkin, nupa pawn lama sex hmang lo tura infuihna poster/banner/hoarding-te leh TV advertisement-te hmuh an beisei a ni. Chu chu kan zui Lal Isua duh dan pawh a ni ngei ang.

Tlangkawmna

Mizoramah HIV/AIDS a hluar tak zet tih hi Mizo mipuiin an hre thawkhat tawh mai thei a, kohhran pui leh a ṭhalai pawl hrang hrangte pawhin hma an la mek zel a ni. NGO dangte pawhin an hmazawn ṭheuhah an theih ang angin hma an la mek niin a hriat. Chung zawng zawng karah chuan, kan ramah HIV/AIDS a hluar tulh tulh zel si avangin tuna kan hmalakna kal mekte hi a la tâwk zo lo niin a lang.

Mizorama HIV kaite kai chhan tam ber chu sex hman sual a ni a, sex hman sual chu Pathian thu leh kohhranin a duh loh berte zinga mi a ni. Chu sex hman sual ngei chu India rama HIV/AIDS hluarna ber state - Mizoram - Kristian state-a HIV kai tam berte kai chhan a ni si. Ngaihtuah chet chet hian a zahthlak asin.

Chuvangin, sorkar hian HIV/AIDS do kawngah ngaihtuahna thar pûin nasa lehzualin han ṭang sauh sauh se, kohhran, NGO-te leh mipui pawhin kan mawhphurhna a ni tih hriain, tun aia nasa lehzualin kan tih theih tâwkah lo ṭang ve zel ila; kan rama HIV hluar zual zel hian tlahniam lam a pan ngei ang.

- K. Zothanpara