AMC inren se, bawlhlawh paih man tipung lo se
Aizawl khawpui enkawltu tura mipuiten duh taka kan thlan tlin, Aizawl Municipal Corporation Board of Councillors meeting chuan Aizawl khawpuia bawlhhlawh paihna senso mipuiin an chawi ṭhin chu tihpun an rel leh ta rup mai.
Hei hi AMC inthlan hma khan an sawi si lova, kan thlang fel chauh tihah bawlhhlawh paih man san an han rel nghal mai hi chu electric bill, tui bill leh chhiah dang neuh neuh hmanga sawr fu tawh Aizawla mirethei zawkte tan chuan thu ngaihnawm lo tak a ni a, min den dan a dang khawp mai.
AMC inthlan hi a la rei lo lulai a, bawlhhlawh paih man an han san nghal hi chuan thil awm dan hriatthiam a ti harsa zo a ni. A chhan pawh AMC hmasa khan MNF bawkin rorelna an siam a, MNF khan term hmasa khan bawlhhlawh paih kawngah harsatna an lo tawk a nih chuan inthlan dawn khan sawi chhuak se.
Pawisa indaihlohna a awm a nih chhuan sawi mai se, tunah an sawi leh si a, bawlhlawh paih man a sang leh tur hi kan ramah hian mirethei tan nun man hi a sang tawh lutuk deuh a ni.
AMC thu rel lama a lan dan kha chuan bawlhhlawh paihna sum senso AMC lamin 80% an tum ṭhin chu an tihniam dawn a, AMC hian 60% chiah an tum tawh dawn a, Local Council kaltlanga mipuiin an chawi ṭhin chu 20% aṭangin 40% ah a kai tawh dawn a ni.
Hei hi hetia an thurel hi a kal tlang puat chuan kan phun kan phun ang a, mahse a sawt tawh si lovang a, AMC hian khawpuia mirethei zawk (Urban Poor) tan hian hriatthiamna te pawh rawn nei ve se a ṭha hle mai.
Entirna han sawi ila, property tax kan pek aṭanga en hian mahnia in leh lo pawh nei lote hi chu bawlhhlawh paih man te hi phut hniam deuh se, a nih loh leh ration card rawng milin a sang leh hniam te pawh thliar se a ṭha lo maw?
AMC Councillor te chet dan hi han en ila, thla tina an lawmman lak zat nena chhut hian a hmaa eng teh vak ni bik lo, eizawnna dang an neih pawh hriat ni lo te hi an che thei tawh hlawm viau a. AMC Councillor hlui te thleng hian rin aiin an lo insiam lian hman hlawm a, mipuia pawisa khawn lam ti belh lo hian tlemin inren ta zawk se.
AMC pawisa che vel pawh hi tun ai hian khuahkhirh uluk se, zin kual vak vak te kha awm tawh lo se. Tichuan bawlhhlawh paih man sang tur hi ven dan zawng se, AMC hi a inren sawt chuan pawisa hi tam tak an khawl theih ka ring, ka mimal ngaihdan a ni.
- Lalmuanawma