Two wheeler taxi rider-te hi

Tunhnai lawkah Aizawl khawpuia mihring phur turin two wheeler taxi permit pekchhuah a ni a, tunah hian sang chuang fe an service mek a, mipui tan pawh a ṭangkai viau mai.

Heng two wheeler taxi-te khaikhawm tur hian pawl pawh an in din a, Aizawl Two Wheelers Taxi Association (ATTA) tiin mumal takin an in kaihruai niin a lang a, riders dik lo taka passenger lak ching emaw, an riders puite mit kham zawnga awmte lakah pawh na takin action an la ṭhin a ni.

Two wheeler taxi a pung zel ang bawkin a khalhtute pawh an pung ve zel a, heng riders zinga tam takte hian mipui rawngbawl an nih hre lem loin eizawnna atana khalh ve mai an nihna an tilang fo ṭhin. Riders polite tak an awm laiin ṭawng ve tak tak, service laia zu leh ruihhlo dang ti hmel hmuh tur pawh an awm ve nuk bawk.

Aizawl khawpui lirthei tam leh chep lutuk tih ziaawm nan Congress sorkar lai khan public transport service tihpun nan two wheeler taxi permit hi pekchhuah a ni a, khatianga permit an pekte kha an service ta a, traffic pawh a tichep hial a ni.

Chutah MNF sorkarin Congress sorkar pek zat deuhthaw bawk a pechhuak ve leh nghal mai a, traffic a ti jam nasa sawt a ni ber mai. Public tran­sport service mai a ni lo, mimal pawhin an tlan loh ni-a kenchhuah turin lirthei an lei belh leh sup sup bawk a, traffic jam chuan ziaawm lam pan aiin a zual zel zawk bawk si.

Kawng chhawng neih lah a harsa dawn ropui mai bawk si. Engtikah nge kan hotu pa Pu Zoramthanga sawi ṭhin kawng chhawng te kha kan neih ve theih ang tih hi Tlumtea thlirin kan thlir chu a ni phawt a, kan kal tawh dante thlirin beiseina beidawngah a chang mai ang tih chu a hlauhawm ta rum rum mai.

Two wheeler taxi rider zingah mawl ve tak tak leh buluk ve tak tak an pung zel a, traffic manner leh traffic rules hre map loin an duh duhin an leu kual a; lirthei intlar put leh two wheeler dangte an din ṭhup laiin dan bawhchhiaa an veilama tlan pelh ching pawh an tam hle. Hengte hi kan traffic police lam hian check ṭhin se a duhawm hle.

Kan traffic police lam pawh nasa zawka ṭan an lak a ngai ta. Two wheeler wrong side zawnga mi tlan pelh ching te vanga tawhsual tawk leh hliam na an awm tam hma hian.

- Lalmuanawma