Two wheeler Taxi tam belh rawh se...
Aizawl khawpui rem lo lutuk leh chep lutuk, inkal pawhna kawng rem lo leh chhe lutuk, traffic zam rengna hmuna Two Wheeler Taxi lo awm hlauh hi chu a va ṭha tehlul em. A service tirtu sawrkar pawh hi a fakawm. Nimahsela, mi tam tak tana an ṭangkai tur angin tunah hi chuan an la hman ṭangkai theih tak tak lo a ni.
Khawpui laili a an dinna, stand aṭang chauh lo hi chuan an hman theih loh emaw tih tur hian tumah phur lo a an lo tlan lai emaw, khawi maw laia an ding mai mai emaw hman tuma han zawh hian, ‘Ka hman lo’ emaw ‘Ka peih rih lo’ tiin emaw min chhang fo ṭhin.
Two Wheeler number plate eng vuahna zawng tam tak hi chu tuna a lan danah hi chuan an hmel leh an chet vel dan han en hian sawrkarin permit a pek chhan ang ngeia mipuite mamawhna chhawk tur leh eizawnna tak tak atana hman tum lo, mahni duh hun hun leh phur hun huna petrol man leh pocket money hlawh nana hman tum mai mai chauh niin an hriat a ni.
Ṭhenkhatte phei chu mi awm ṭha duh lo, an awm ṭhat beisei avang leh an ngen tlat avanga chhungten permit an neihsak mai maite pawh an ni mai thei. Tin, ṭhenkhatte hi chu eizawn nana mamawh tak tak lo, permit nei ve hrim hrimte niin an lang. Chuvangin tunah hi chuan Two Wheeler Taxi awm mek sa tam tak hi chu a mamawhtu mipui tan hian beisei san vak theih an la ni rih lo a ni.
Aizawl tih hming putna area-a awm ṭalh hi kan duh hlawm si a, hmun rem leh rem lo, veng chengker tak tak leh biru, veng tlabirh takahte kan awm fur hlawm si a. Khawpuia awm ve ta na na na chuan mamawh chi hrang hrang leh pawimawh tam tak kan lo nei ve a, kan awmna veng rem leh rem lo, leh chengker tak tak aṭang hian vah chhuah ve kan duh fo si a. A chang chuan thil hmanhmawh thlak tak takte pawh a awm ve ṭhin; mahse, kan awmna lamah Taxi pangngai, Car taxi a lo kal ve zen zen ngai si lo, chung hunah chuan rilruin Two Wheeler Taxi a ngaihtuah fo ṭhin a ni.
Chuvangin, sawrkar hian Two Wheeler Taxi permit duh apiang hi chu pe zel mai se, a tama a tam na na na chuan ti tak tak peih leh ṭhahnemngai, eizawn nana hmang tak tak duh engemawzat an lo awm ang a, chung mite zarah chuan veng chuanhnuai lama mite pawhin kan lo hmang ṭangkai ve thei ang a, hmun tin hmun tanga an tlan tam na na na chuan nasa takin a hmangtu leh rinrawla neitu pawh an lo pung ang a, anni pawhin an hlawkpui tho dawn a ni.
Two Wheeler Taxi hi Car Taxi tlan ve zen zen lohna hmuna mite tan pawh innghahna tlaka an tlan phawt chuan, chung hmun aṭang chuan a hmangtu pawh an lo tam tial tial ang a, chung hmuna chengte tan chuan thawvenna leh awlsamna chikhat a ni ngei ang.
Aizawlah hian Two Wheeler Taxi hi rintlaka a tam phawt chuan Traffic zam nasa zual zel tur pawh hi engemaw chen chu a veng ngei bawk ang. A chhan chu, Aizawl kawng buaithlak takah hian mahni motor leh Taxi a kal fo ai chuan mi tam takin Two Wheeler Taxi a awlsam taka kal zel kan duh zawk fo ang.
Chuvangin, Traffic zam zual zel tur tih ziaawm nan leh he khawpui ing euh taka in-ek-beng ṭunte nun khaw tih ziaawm nan, sawrkar hian a duh apiang hnenah Two Wheeler Taxi Permit hi pe zel mai teh se.
- K. Hmingthankaia