Aizawla footpath enkawl a ngai
Aizawl khawpuiah Aizawl Municipal Corporation hmalakna nge UD&PA zawkin footpath an han siam tak tak a, kan kawngpui zau lo tak chu a zim belh nghal viau mai a, kawng chhawng hi kan siam tak tak lo a nih phei chuan kal ngaihna a awm mang dawn hleinem mawle.
Tuna kan subject zawk chu kan footpath siam takte hi kan vil zui deuh loh chuan hmun ṭhenkhatah chuan parking atan an hmang vel mai mai a, mipui kawngpui kan tizim tawh si a, mipui kea kalte kal theihna tura kan dah a ngai. Hmun ṭhenkhatah chuan dawr neitute’n inzawrhna remchang atan an lo hmang vei nen, kan footpath hi siam ṭhat deuh a ngai a ni.
Thil hre zawkte sawi dan chuan kawngpui hi chu lirthei a kal theih ṭawk ṭawk chuan a ngaihdam theih a, mipui kalna awm lo hi ngaimawh zawk tur, an ti a. Hei hi a nih ka ring, footpath kan siam nasat chhan hi, hei hi a ṭhat rualin kan ngaih pawimawh tur chu heng hmunahte hian mihring kea kalte tih loh chu eng thil mah lo tlazep lo se, thil zawrhna leh lirthei parking atan an hman leh chuan a hming nen pawh a inmil thei dawn lo hrim hrim a ni.
Khawpui enkawl dan sawi takah chuan AMC inthlan dawn khan tuna tling tate hian ‘Free Wifi’ kha an intiam a, ṭhalai tam tak chuan an vote phah a, kha kha an beisei aiin a lo harsa deuh a nih pawhin kan intiamna hi chu tihlawhtling hram hram teh ang u. Thil harsa leh budget lian tham pawh a ni si lova.
Hman deuha Aizawl khawpuia bus tlan chak chi, stand-a passenger nghaka ding ve vung vung lo tur tihte kha engtikah nge kan hmuh dawn ni? Khawpui chei han tih hian contract tenau te te mi tihlawmna atana sem kual lo hian project lian tham deuh tana ke pen ve tawh hi a ṭha khawp mai.
Hengte hi kan hruaitute hian an ngaihtuah thleng zel turah ngaiin Krismas i nghak phawt mai ang u khai!
- Lalromawia