MIPUI RAHBEHNA KAN TLAWH CHHUAK

Chhim tawp aṭangin, thla khat chhung zet, khaw tin deuhthaw tlawhin kan zin a. Kawng awm zawng zawng kan zawh a, Lawnga kal ngai thlengin, keini aia zawh chipchiar an awm kher lo ang.

Heta kan thil hmuh leh hriat zawng zawng chu sawi sen pawh a ni lo, rilru kap zual chiah kan sawi ang.

Kawng bumboh: Zoram Chhim lama ha hipa kan sawi chu, central in kawng min siamsak 4 lane hi a ni, Mizoram kawng lian ber a ni bawk a, han zawh ila, kan inhmeh lo zawkte hian a hriat rum rum thei nia mawle. Mahse beiseina min ti beidawng leh ṭhin a awm. He kawng ropui tak pawh hi, siam zawh vek a nih hnuah, a enkawl zelna Mizoram sorkarah an pe zui a nih chuan, a ṭha rei leh tak tak chuang lo ang tih hi a ni. A chhan kan sawi ṭan ang.

Mi faten State Highway an siam theih tawh laiin, keini chu maw, central sulhnu pawh chul mam zo lo, state kawng sial zim lutuk pawh, kum 10 dana alkatra luan ni awm tak, kawng bumboh siam ṭhin kha kan ni tlat. Hetiang kawng lian hi vil zo turin, kan chakna hian a zo leh ngut ang emaw? Mi ramte angin toll tax lak nachangte hre ve tawh ila, chu chu a enkawl zui nan hmang ve ta ila, tia kan rawt ṭhinte lah, bawhzui tumna a awm der si lo.

Chhim lamah hian khaw kar kawng chhe tak tak a tam khawp mai a. Tui let hnua metal road la hmu ve lo. Ruah tui tlak hleka zawh ngam loh kawng deuh vek hi a ni mai. A leilung lah hi a ruh ve loh avangin, ṭhal khaw ro lai pawh ni se, motor pahnih inzui phei chuan, vaivut khu hi kan hleuh a ni ber mai a, chhun khaw engah pawh kawng hmuh theih loh khawpin a khu luih luih mai a ni.

Mipui inpawisak lohna hi chhim lamah hian a lian bik emaw tih mai turin, kan zin kawngah hian, Parva aṭanga Vathuampui panna kawng hnai zawh kan tum a, kawng laklawhah, kawng siamtu contractor chuan mihring pilna khawp khuar hi, JCB a lo laihtir hmiah mai a, a bulah tumah an awm bawk si lo. Kal ngaihna awm miah lova khatia kawng an lai khuar tawp mai kha, mipui pawisak lohna chu a ni chiang alawm. He kawng zawhtu Sumo service eng emaw zat a awm lehnghal.

Kan hriat zel dan phei chuan, kawng zawng zawng deuhthaw hi, hotu lian chhungte thawh deuh vek a ni a, tum khat phei chu, KM 6 siam turah, KM 1 chauh an thawk a, an duhtawk der mai an ti - Hahthlak tak a ni.

Kan chhim kawng zawh hian, mipuite rah behna nasa tak min hmuh chhuahtir a, sawtna awm lovah kan thin hi a rim ul reng mai a ni.

Electric current mumal lo: Kan kalna khaw tam takah, ni 4/5 current awm tawh loh thu kan dawng nual mai, khua a lum ropui si, zanah mut theih loh vangin dar 12 thleng thleng pawn khaw dai chhimin, pawnah an awm sup sup mai. Khaw pakhatah phei chuan ruahtui a tlak hunah current an neih tawh loh tur thu min lo hrilh bawk. Enge a awmzia ni ta le? Thingtlang lam mi chu ngaihsak lovin an awm a, current indaih loh vang pawh a ni lo ang, mipui rahbehna bawk a nih hmel a ni.

A khawsa thei deuh chuan Gene­rator emaw, solar emaw an nei fur a, chutiang nei ve pha lo, mei alh ente dinhmun erawh hrehawm tak a ni.

School khawhar: Hei phei hi chu sawi ngaihna pawh a awm lo zawk, kan khaw tlawh Siminasora khuaah chuan, class VIII thleng zirlai an awm a, zirtirtu pakhat chiah zuk awma mawle! School building a awm ve ruah bawk si, eng tak zir chhuahtir ang maw?

Sorkar school a hlawhchham chian em avangin, kohhranin Missionary tirin, hmun hrehawm tak takah an bung a, an khawsakna pawh kan sawi tawh ang kha a ni deuh vek a. Krista avanga hrehawm tuar tur nia an inngaih avangin, an tuar tlawk tlawk mai a ni.

Sorkar hian a hlawhchhamna hi zahthlakah lain, a thawh theih loh thawktu Missionary-te chet velna tal hi chu ngai pawimawh se. Mahni pumpui tanghma chauh ngaihtuah chunga ram hruai hi zawng, mipui rahbehna ramah min la chenpui reng mai chu a nih hi.

Tui harsa: Pu Modi-a sorkar hian India ram mipui zawng zawngin tui hnianghnar taka an dawn theih nan, sum tam tak a thawh tih kan hre ve bawk. Mahse chu sum luan luh phak ve lohna khua kan hmu ṭeuh mai. Hmanlai nun nia kan hriat kha, khaw tam tak chuan an lo la nunpui a. Tlang rama awmte, Tuikhur tui chawi hmuh tur an la awm nuk mai. Missionary tam takin tui an harsatzia min lo hrilh mawlh mawlh bawk.

Mipuite chanvo tur laksak hreh lohna hian kan ram hi a tuam vel a, mi retheite kan VIP ti zuah zuah si hian, contract hna in leisakte chu kan tih dan thin a nih thu, kan hotuten zahna nei map lovin an sawi zat zat mai si a, khua hi a la var thlawt lo chu a ni e.

- Lalrinliana Colney