Ṭha duh lote tán bawm thar
Kum 20 chuang Mizoram sorkar sum leh pai vawngtu, Mizorama roreltu chu Congress an ni a, chu mite chuan kan ram hi an duh dan takin an enkawl a, min thlen pui chin leh an rorel thiam dan tlin tawk pawh kan hre tawh.
Chu Congress chuan Chief Minister atan mi thar ni lovin term hnih lai Minister ni tawh sâ an zuar a, chumi hmang chuan 'Ṭhat loh theih lohna bawm' an zuar mêk a ni.
Mizorama thil lawmawm tak kan hmuh chu ṭhat tumna lo awm ta hi a ni. Ṭhat pawh tum lem lo tlin ṭum ringawt politician kan tam avang erawh hi chuan he bawm hi eng ang taka rintlak nge hriat a ni lova, mahse a beiseina min siam hrim hrim kan ti thei ang.
MNF an sorkar mêk a, an ni hi an inenkawl dan a mak angreng. MLA lama mi thiam pui pui aiin Minister ruatah chuan 'seniority' ngai pawimawhin minister an han ni fir fer hlawm a. Mahse a takah chuan Minister zinga junior ber berte pawh CM an tihlawm thiam chuan a chhung lailum changtu an ni thei tlat. Party chhung lam chu dah ṭha ta ila a ram hruai kawnga ṭhat tumna an nei lian lo tak mai hi a hahthlak a ni.
MNF hian mithiam hi an ngah ber hial ang a, an MLA chinah pawh mi thiam pui pui an kat nuk a, an thiamna leh theihna an hmang chhuak thei reng reng lo thung hi a buaithlak chu a ni.
MNF zinga ṭhat tum tán pawh Pu berin sum pai chabi a kawl tlat a, chu mi dil chhuak thiam lo tan ram siam ṭhat kawngah thawh chak a harsa a, ṭhat theih lohna bawm lamah an la awm a ni ber mai a nih hi.
Congress hi ṭhat theih lohna bawma rei tak tâng reng anga an awm duh hi an President kal chhuak Congress khai dingtu Pu Lal Thanhawla an zah lo kan ti dawn nge ni an dim lo kan ti zawk dâwn?
Pu Hawla a chhuah ruala ṭhat loh theih lohna anga an inzuar hi a hma khan ṭhat theih lohna bawma tang ang maia insawiin an lang a, mihring ngai reng kha an la ni si.
ZPM leh BJP hian hnuhma sawi tur an la neih loh hi an vanneihna mai mai ni lo se, hnuhma nei thei dinhmuna an ding ve a nih chuan ṭhat loh theih lohna bawm lo tah ve se. Kan hmuh tawh pahnihte min hruai dan hi chu Mizoram hian a dam pui zo lo a, kan duh khawp lo tlâng a ni.
- Lalremruata