Mizo Language Development Board lo ding tur hi

Kum 2022-a Mizoram Legis­lative Assembly Budget Session ṭhutkhawm ni hnuhnung ber 10.03.2022-a Mizorama Dan Siamtu Rorel Pawl chuan Dan thar a pass pathum zinga pakhat chu Mizo Language Development Board Bill, 2022 a ni a. He Bill hi thla khat a ral hmain Mizoram Governor chuan Dan puitlingah a pawmpui tak avangin Act a ni tawh nghe nghe.

Kha Bill ngaihtuah ni khan inkhawm ṭan veleh India Vice President M. Venkaiah Naidu chuan Mizoram Assembly House-ah thu a sawi a nih kha. Ani khan thu dang karah Pianpui ṭawng pawimawhna a rawn sawi lang khauh mai a, kan ram roreltute thu ngaihtuah tur nen pawh a inzul ṭha hle.

Mizoram Legislative Assembly-a kan MLA rualte rorel lai hi a hmuna kalin emaw TV-a lo thlirin emaw kan en tawh furin ka ring a. Ṭha ni-a an hriat a lo inang diak diak lo va. A chang chuan an inhnial luih luih ṭhin tih kan hria. Tun ṭuma Mizo Language Development Board Bill, 2022 ngaihtuah ni kha chuan MNF, ZPM, INC leh BJP member zawng zawngten lungrual takin he Bill hi pass an remti ṭheuh mai - hei hi thil lawmawm tak a ni. Mizo hnam pumpui huap Dan a nih dawn avangin rorel lai lam leh eptu lam an inthurual ṭhap mai kha a chhinchhiahtlak em em a ni.

He Dan hi School Edu­cation Department changtu Minister putluh a ni a. A umzui hna pawh School Education Department Secretariat lamin chak takin an kalpui nghal a. A Bill sawiho a nih ni-a a changtu School Education Minister-in hun rei tehchiam hmang si lova a sawi hawnna kha a chiang ṭha khawp mai a, a fakawm takzet a ni.

He Mizo Language Deve­lopment Board Bill, 2022-ah hian Clause 25 a awm a. Mizoramah hian kan Dan Siamtute thurel hi a zavaiin Mizo ṭawnga dah nghal theih a la nih rih loh avangin he Bill chhung thu pawh hi Saptawng (English) a ziah a ni a. A4 lehkhaa chhutin phek 12 a chhah a ni. A ngaihven duhte tan School Education Secretariat-ah a copy hmuh theih a ni.

Mizo Language Deve­lopment Board hi hna thawk theia a awm hmain an pisa tur leh a bul ṭantu turte School Education Department hian an buai­pui nghal char char a. A bul ṭannah chuan he Board-ah hian Member 12 (sawm leh pahnih) an awm ang. Chungte chu – (1) MLDB Chairman (2) MLDB Secretary (3) Chairman. MBSE (4) Director, Art & Culture (5) Director, SCERT (6) leh (7) Mizo Academy of Letters aṭangin member pahnih (8) leh (9) Mizo Writers Association aṭangin Member pahnih (10) Mizoram University aiawh pakhat bakah (11) leh (12) Mi langsar dang pahnih.

Heng bakah hian a ṭul dan angzia zelin mi pahnih aia tam lo Co-opted member-ah sawm tel theih an ni bawk ang. Heng Member 12 zingah hian Member 7 aia tlem lo an kal chauhvin Board chu thu rel thei a ni ang.

He Board hi hna thawk theia a awm hnuah pawh Art & Culture Department hnuaia Mizoram Publi­cation Board hi chu a kal pangngaiin a la kal zel ang a. Mizoram Board of School Education hnuaia Mizo Language Committee (MLC) hma chhawp hrang hrangte erawh hi chu Mizo Language Development Board hian a kalpui chhun­zawm tawh ang.

He Mizo Language Deve­lopment Board din puitlin a nih theih nan hian Pawl hrang hrang kan ṭangrual ṭha hle a. Chung zingah chuan Mizo Academy of Letters (MAL) 1964-a din te, Mizo Writers Association (MWA) 1977-a din te, Mizo Poetry Society (MIPOTY) 2016-a din leh Mizo Grammar Society (MGS) 2020-a din te hi a bul tum zualte chu an ni awm e. Pawl dang dangte pawhin he Board lo ding tur hi Tlumtea thlir takin an thlir dauh dauh hlawm a ni.

Mizo ṭawnga thu kan ziah zawng zawng hi a dik thei ang ber leh ṭhangtharte hlan chhawn zel tlaka chak taka pho lan zung zung hi a lo ṭul ta hle mai a. A dik tawk lo leh dik lo baksak ho hi tarlan thuai thuaia a dik tak inzirtir hi kan mamawh tawh takzet mai. Tun hmaa Department pakhat ni mai ṭhin aṭang khan tunah chuan Social Welfare Department (Women & Child Development) te, Art & Culture Department te, Higher & Technical Education leh State Council of Educational Research & Training leh School Edu­cation Department te Director hran nei vekin kan lo inṭhen pung ta hlawm a. Mizo ṭawng dik taka hman tur chhawp chhuah leh zirtir kawngah erawh kawi kawm thin ang ṭhapa kan kal rual ṭhap ṭhap a pawimawh zual tawlh tawlh dawn a ni.

- R. Lallianzuala, President Mizo Writers Association