City bus hi endik a ngai ta viau mai

Aizawl-ah hian city bus za chuang fe a service mek a, heng zingah hian a tam ber 90% zet hi chu a hluiin a ṭawngṭawl tawh hlawm a, hengte hi endik a, enfiah viau a ngai tawh a ni. Chhiatna rapthlak a thlen hma ngei hian thuneitute te'n an check vat a ngai a ni.

Aizawla city bus enkawltu ber, Aizawl City Bus Owner's Association (ACBOA) a awm a, bus service zawng zawng ṭhuikhawmtu ber a ni a; city bus zawng zawng enkawltu ber a ni bawk. Mumal takin he pawl hi a kal avangin sorkar pawh hian an remtihna lo chuan city bus atan hian permit a pe ngai lo a, pek pawh a phal ngai loh vangin city bus permit nei thar sawi tur an awm meuh lo ang.

Chuti taka pawl inkaihruai ṭha leh member laka thuneitu ber ACBOA chuan member-te harsatna a ngaihtuah ang bawkin member-te (city bus) driver emaw, conductor emaw passenger laka che mawi lo awm palh se action an la ṭhin.

Chutianga che mawi lo report an dawn chuan bus pawh service thei loin ni engemawzat an dintir hial tawh ṭhin a, a aia na pawhin hrem chang an nei fo bawk.

Sorkar thu leh hla an zawm ang bawkin sorkar pawhin he pawl hi a zah ve viau niin a lang.

Mipui nawlpui leh rethei zawk tena kan vahchhuahna ber city bus ten an rate khawn tur bituk kawngah pawh sorkar chuan bus neitute chhiat lohna tawk te, mipui tana phurrit lutuk lo tur te'n a ngaihtuah ṭhin a, rate siam kawngah pawh harsatna lian tham a awm meuh lo. Tin, city bus hian sorkara an thil phut vanga nawrh (bus dintir) pawh an nei khat hle. Bus hi chuanman tlawm ber a nih vangin mirethei zawkte pawhin vahchhuah nana kan hman ber a la ni reng a ni.

City bus ṭangkaizia kan hria a, mirethei leh mipui nawlpuiin kan chhawr nasatzia pawh kan hre vek. Hetihlai hian kan bus-te hi a ṭawng em em hlawm tawh mai si a, bus khata passenger an phurh phei chuan a break-in a zo lo ang a, a body a sah huk mai anga ti hian kan thlir liam chang a awm fo mai.

Tunhnaiah bus eng­emaw­zat chuan a thar a service ve ta a, a lawm­awm khawp mai. Mahse bus service zinga 90% vel zet chu hlui tawh lutuk an ni hlawm tlat mai.

Heng bus hlui lutuk service mek hian nunna hlu tak a la chhat vak ang tih a hlauhawm takzet ta. Thu neitu, State Transport Authority (STA) hian uluk zawkin ngaihtuah teh se. Bus leh taxi rate ringawt ngaihtuah lo hian STA hian mihring tana hlauhawm an service ṭeuh tih hi a takin hria se, hma han teh se.

Mihring tana hlauh­awm mai an ni lo, Aizawl khawpui traffic ti jam-tu tam ber an ni ta hial mai. An bus a ṭawng hlawm si, timing um ranin an han tlan ve bawk si nen; traffic flow a tihbuai chang a tam ta mah mah a ni. Tunhnaiah pawh kawng lakah a chhia a awm ta zeuh zeuh. Hei hian traffic kaltluang lai tihbuai a nei ta nual mai. Heng bus ṭawng lutuk, a meikhu dum nguk nguka tlan hian hriselna pawh a tichhia a, heng ho hian engtin nge polution certificate te hi an neih theih zawk?

STA lam hian kan bus-te hi han check uluk se, replace a theih em? A theiha bus neitute'n an permit ngaia bus thara an thlak duh loh chuan permit cancell thlengin hma han la ngam teh se. Mi tam zawk nunna-in a tawrh hma ngei hian.

- Lal Rinmawia