RORELTU TUR KAN NGHAK TA

‘I thu chuan thiam a chantir che ang a, i thu vek chuan thiam loh a chantir bawk dawn che asin’ - Matthaia 12:37

A chunga Bible chang tarlan khi a Sap ṭawng Bible lamah chuan ‘I thu’ tih khi ‘kan duh thlanna, kan thil tih’ ni lovin, kan thusawi ‘words’ tih a ni na a, kan thil sawi tur nen hian a thu kalhmang leh ṭawngkam hi a inhmeh em avangin kan tarlang mai a ni e. ‘Mi tin an thiltih ang zela pek tur ka lawmman ka hnenah a awm’ tih leh ‘Mi tin an thiltih ang zela relsak an ni ang’ kan Lal Isuan a lo ti tho bawk a.

Aw le, kan thupuiah lut ila. Kan hma lam huna kan Ram leh Hnam, kan Sakhua awm zel dan tura thutlukna chu keimahni duh thu ngei, kan duhthlanna ṭheuhin kan thlang zo ta a. Kan dam chhung leh kan thih hnu thlenga keimah leh ka chhungte leh kan ram awm dan tur chu keimahni kut ngeia kan vote hmangin kan lo nemnghet ta. A ṭha lam emaw, a ṭha lo lam emaw, Pathian duh zawngin emaw, pathian pawi kan sawi emaw, eng pawh ni se, mipui lam chuan kan mawhphurhna chu kan hlen ta. Tute nge Mizote leh Kristiante tana ding tur, roreltu tur tih chu nghakhlel tak leh huphurh bawk siin kan lo thlir ṭhuap ta a nih hi.

Tute nge tling ang: Rorel tura kan duhte kan vote ṭheuh a, mahse, tling tur leh tling lo tur an awm si a. Chuvangin, result lo chhuah hunah mipuite hian fel takin kan rilru heti hian kan siam tur a ni. Pathian hian min la hawisan lo va, kan chungah zah la ngai hram hramin, inngaihtuah harh a, simna hun ṭha vawi khat min la pe leh a nih chuan, A thu thua awm thei tur, Ama rilru ang pu mi, pawl hrang hrang aṭangin a thlangtute thinlung leh kut hmangin, mite beisei loh leh mi thar Lalpan a rawn din chhuahtir ang.

Chutiang ni lova, Pathianin kan awm ṭhat duh loh ang ngeia min la hrem zel dawn a nih chuan, Pathian leh mipui pawh zahna nei tawh lo, pawisa leh lalna ringawt atchilh tawhtute, mipui tam zawkin an ei loh leh an hnawl tawh hnu te an rawn tling ṭhup a nih chuan, kan ram dinhmun tur chu thim lehzual, huphurhawm tak a ni ang. Keimahni duhthlanna ngeia kan tih a nih avangin ‘Hre reng chunga tisual luitute’ hremna chu kan dam chhung leh kan thih hnu thlenga tuar tura kan inpeih a ngai tawh ang.

A tlingte leh tling ta lote: Thinlung leh tihtakzeta Pathian rawn chunga Mizoram tana in-candidate-te leh, chutiang chiah thinlung pua thlangtute thlan chu an lo tling ta rih lo a nih pawhin, Pathian remruat ngei, Lalpan rem a la ti rih lo a ni tih pawm hmiah tur a ni ang. Mipuiin kan hriat chian, an lak aṭanga beiseina thar engmah kan neih tawh lohte leh, Krista dodaltute an rawn lal leh dawn a nih chuan; kan sual, ât, mawl leh luhlul rei lutuk avangin, kan harh chhuah nan kan phu tawk, kan chunga lal tur Pathianin min pe a, kan sim duh loh avanga kan phu tawk hremna tuar tlak kan ni tih hriain, kan duha kan thlan tlinte chungah eng kawngah mah kan vui tur a ni lo.

Tin, pawl hrang hranga mi, tling ve ta lote kha ngun takin inngaihtuah sela, eng ang rilru puin nge ka in-candidate ve tih leh, eng vanga tling lo nge ka nih tih ngun taka ngaihtuah chungin, a hma aia rilru fim, fel leh dik puin Zoram leh Krista tan hian bei zel rawh se.

Thlan tlinte: Eng pawl aṭang pawhin tu pawh lo tling sela, mahni theihna leh phu ve rengna avanga tlingah inngaiin chapo mai suh se. Engti kawng zawng emaw, a chhe lam atan emaw, a ṭha lam atan emawa Zoram kaihruai turin Pathianin hmanruaa hman a tum a ni tih inhria se, inngaihtuah ngun hle rawh se. Mizo mipuite hremna atana a chhe zawnga hmanrua atana thlan tlin ka ni em tih an MLA nih chhung zawngin inngaihtuah rawh se. Chutiangte a lo nih hlauh chuan thinlung leh tihtakzetin mipui leh Pathian hnenah ngaihdam dil rawh se. Lalpan a siamṭha leh duh mahna.

Mizoram siamṭha tura Lalpa thlan chhuah nia inhriate pawh fimkhur hle rawh se. Setana hian hmanraw chak tak tak, chi hrang hrang hi a ngah em em mai a. Rilru fim taka an awm reng loh a, engkima an aiawh tura Pathian hnena an inkawltir tlat loh chuan, an hriat loh hlanin Setana’n an ngaihtuahna thinlung mit leh beng a tihthimsak leh ang a, MLA term khat chu engmah thil ṭha ti thei tak tak lo leh mi dem kaiin an hmang zo leh mai ang a, a hma aia thimah Mizoram an hruai lut thei tho a ni tih hre tlat rawh se.

Chuvangin, tun ṭuma MLA thlan thar zawng zawngte hian Zoramthar siam turin, engkimah pathian rawn chungin, “Keimahah awm reng rawh u, kei pawh nangmahniah ka awm reng ang; keimah lovin engmah in ti thei si lo,” kan Lal Isuan a tih hi hre reng sela, zawm tlat rawh se. Isua nen chuan engkim a tih theih si a.

- K. Hmingthankaia