Party hruaitute hnena thurawn

Mizoram Assem­bly Inthlanpui chu boruak muanawm tak hnuaiah tluang taka neih a lo ni ta a, a lawmawm tak meuh meuh a ni. Inthlan vuakvet thlirin a tirah CEO thil tih dan fuh loh vanga Mizoram pum huapa harsatna a thleng deuh tih loh chu a hnu lam leh vawiin thlengin harsatna a thleng lo niin a langa a lawmawm hle.

Inthlan boruak thlirin Mizoram pumah Kohhran Pawl hrang hrangte pawimawhna a lang chiang hle a tih theih a. Heta

ṭang hian Mizoramah tlawmngai pawlte aiin Mizo mipuite hi Kohhranah an inphun nghet zawk tih a chiang hlein a lang a ni. Tun inthlanpui neih zawh takah pawh khan chik taka lo thlir chuan Party hrang hrangten Kohhran pawi khawih an hlau ṭheuh a, Kohhran malsawmna dawn beiseiin hma an la ṭheuh niin a hriat theih a ni.

Hetiang taka Kohhran hi Mizote thinlungah a pawi­mawh a nih si chuan kan la inthlang zel dawn si a, Kohhran nena thawh hona ṭha hi inthlan dawnah chauh siam ṭhat tum lovin, a tir aṭangin ruahmanna fel tak neih ni se la, awmzia a neih hmel a. Chumi atan chuan Party hrang hrangte hian Kohhran hmunpuite ngaih pawimawh nachang hria se.

Entirnan - kan awm vena Aizawl South II huam chhung­ah hian Mizo­rama Kohhran lian ber berte hmun­pui a awm nual a. Synod Office a awm a, Mizoram UPC General Head­quarters Office a awm a, Salvation Army Central South Office a awm a, UPC NEI General Office a awm bawk a, Roman Catholic Biak Inpui (Christ The King Cathedral) a la awm cheu bawk. Heng hmun pawimawhte hi Kohhran hruaitute hian an awm chilh deuh vek a.

Tun Assembly inthlanpui neih zawh taka vote tlate chhiar la ni chiah lo mah se, party zinga hnehna chang a, sorkar siamtu Party hruaitute chu Aizawl South II huam chhunga an candidate-te an tling a nih chuan sorkar an siam turah he biala candidate te hi ngai pawimawh a, mi pawimawh takte zinga dah nachang hre turin ka ngen duh che u a ni.

Hetianga in ti a nih phawt chuan inthlan leh hun atan a va ṭangkai dawn em ka ti.

Hetiang hian hmun dangah pawh Koh­hran hmunpui awmna a in aiawh te ngaih pawimawh nachang hre hlawm u la, inthlan leh hunah in awlsam phah hle dawnin ka hria a, thurawn ka han pe che u a ni.

- Samuel Lalruatsanga