Thusawi thleng dik thei lo

Hman deuhah khan pa pahnih khan party pakhat an sorkar hma chu an khabe hmul an ziah loh tur thu an sawi a, an thlalak pawh ka hmu ve tawh a, nimahsela kha party kha tunah chuan a awm ta lo a.

An khabehmul chu an tan tawh tho a rinawm a, hei hi politics lama thil sawi dik lo leh thleng lo tam tawhzia ti chiangtu chu a ni.

Kan Chief Minister ber Pu Zoramthanga pawhin Assam Rifles ho chu an insawn chhuak ngei dawna ngaiin Lammuala mipui pung khawm hmaah AR ho insawn tur thu a puang ngawt mai a, tun thlengin Lammualah an la insawh nghet sauh sauh a ni.

MNF President bawk hian inthlan campaign laiin, "Cheng nuai 3 vel bawr hi chu kan sem theih ka ring, min vote phawt chuan kan pe thei ang che u," ti mai lovin, "Chungkaw tin hnenah cheng nuai thum pek, NLUP dawng tawh zawng zawng pawhin an dawng dawn," ti lama a sawi chu tun thleng hian a video a la awm a ni.

TV interview ah kawng chhawng siam dan tur a sawi tui em em a, chu chu tun thleng hian hmuh tur a la awm lo. Vai buhfai ring tawh lo tura sawi pawh kha engtin zel nge ni dawn, ration buhfai man a pung dawn tih thawm te pawh a awm a ni.

Politics a nih tawh hi chuan miin 'dawt' an sawi pawh hian kan chhuahchhal let tawh lova, kan en liam mai mai a, hei hi hriain politician te pawh hian dawt hi an sawi ve mai mai fo niin a lang tlat.

Kan politician zingah hian dawt sawi lo pawh hi an awm lovang tih theih deuhthaw hian dawt sawiah hian party tin hi an inpuh tawn an inpuh tawn mai zawng a nih hi.

Tun hnaiah kum 2023 inthlana tling chiang turin ṭhenkhat chu an au chhuak leh ta hial a, Serchhip Bialah khan dawt sawi an awm tawh a, chutiang bawkin Tuirial bialah khan dawt sawi an awm tawh.

Kum 2023 inthlan kan ur leh ṭan a, tuna au chhuakte hian an sawi dikin ring em?

- Lalthanmawia