2018 ELECTION THLIRLETNA
Members of Legislative Election chu 28th November khan kan zo ta. Result a chhuah hmain election thlirletna ka han siam ve a ni. Zoram Exodus Movement kum 2016 khan ṭhiante nen kan buaipui ṭan a, a tira ka lo tum dan chuan Reformed Movement ni mai sela, electoral politics-ah chuan lut lo ila ka ti a. Mahse kan han kal zel a, ram veitu pawl hrang hrang leh political party dangte nena kan han thawhho aṭangin Zoram People’s Movement (ZPM) a lo piang ta a, tichuan electoral politics lam kan pan ta a ni.
MLA candidate nih chu ka tum lova, ka zuam lova, ka peih bawk hek lo. Ṭhianten MLA candidate-a ding ve tura min sawmnate ka hnawl thlak tawh hnuin June 8th zanah ka mu tur chu ka ṭawngṭai a, ka rilruah hla lo lang chu, “in unaute indonaah kal nangni chu hetah hian in lo awm mai ang maw, engah nge Lalpan a pek rama lut lo tura Israel fate rilru in tih zam dawn?” tih hi a ni. Hei hian ka rilruah nasa takin thu a sawi a. Ṭawngṭaiin Pathian kan rawn a, kan Kohhran hruaitute ka rawn a, Administrative Committee-ah ngaihtuah a ni a, remlohna engmah an sawi tak loh hnuah MLA candidate ve tur chuan ka inbuatsaih a, Lunglei South bialah ka ding ve ta a ni. Tichuan, August 2018 aṭangin hma ka la ve ṭan ta a ni.
1. Mimal harsatna: Harsatna hrang hrang ka nei a.
(1) Baptist Kohhrana hruaitu lo ni tawh, Pastor pension hlawh la lai ka ni a, mi ṭhenkhatten ka tih loh tur tiah min ngai.
(2) Politician ka ni lova, theologian ka ni a, ka conviction pawh hi political conviction a ni lova, theological conviction a ni. Liberation theology ka zir leh ka zirtir aṭanga ram leh hnam veina hi lo piang chhuak a ni.
(3) Mite ngaih chuan Pastor ka ni a, mahse keima inngaih dan chuan zawlnei rawngbawlna (prophetic ministry) thawkah ka inngai.
Mite min ngaihdan leh keimah ka inhriat danah harsatnah neu neuh ka nei a ni.
2. Political issue: Political issue lian ber chu Mizoram Development a ni. MNF leh Congress chuan sem policy a nei ve ve a, thil ṭha tih tur tam a sawi bawk. ZPM chuan development hna ṭha taka thawk tur chuan kalphung thlak (paradigm shift) a ṭul a ni, a ti a. Sem policy hian mipui a hneh vak lo niin a lang. Zu zawrh dona a lian hle a, chutih rualin BJP zawm duh lohna a lian bawk.
3. Campaign method: Campaign method-ah chuan TV thusawi, Watch-up thu chhuah leh inthawn, House to House campaign a ni ber a. Public meeting leh Rally lian tham a awm meuh lova, public debate a tlem hle a, chuvangin party policy leh candidate quality mipuiin an hre thiam meuh lo.
4. Mipui rilru: Mipui tam ber rilru kaihruaitu chu “a chak lam awm fuh” niin a lang. Hemi phena thil awm chu hamṭhatna leh hlawkna dawn tumna (mimal/ chhungkaw benefit) a ni. Party politics a lian hle a, ram leh hnam politics kan thleng pha lo hle a ni.
5. Voting: “Party ruhkawl” kan tih vet tei, engmah vak ngaihtuah lova mahni party chauh vote tum hrim hrim tam tak an awm. Party policy leh candidate mizia ngaihtuah a, ṭha tih zawng vote engemawzat an awm bawk. Suma lei theih tam tak an awm bawk. Engemaw zat hlawkna dawn beisei, tlai lam (‘last minute’ an tih) a party-ten sum an lo sem thin nghak pawl an awm bawk.
6. Expenditure: Sum sem leh inlei a hluar hle a, hei hian election observer beng a thleng meuh lo. BJP ni lem lo, mahse BJP ṭanpuina dawng party awm ni awm tak a ni. Hengho hian sum an che lek viau niin a lang. Ruling party pawhin sawrkar development sum leh mimal sum election atana an lo khawl chu a hmang viau niin a lang. Election dik leh felfai (Free and Fare Election) entir tuma hma la ka nih avangin kei tak chuan ka seng tam lo hle. Election commission of India-in Rs 20,00,000 (cheng nuai sawmhnih) thleng a phal hi Mizoram atan chuan a ṭul hauh lo a ni. A tam lamin Rs 600,000 (nuai ruk) vel chuan ṭha takin election zawh theih turah ka ngai.
7. Sawrkar dik: Sawrkar dik leh fel nei tur chuan inthlanna method a dik a ngai. Sum cheleka pawisa semna vote zawna roreltu nih tum hi rorelna leh sawrkar dik lo inṭanna bul a ni. Mipui rilru pawh a siam dik lova, sem policy hmanga roreltu/ sawrkar siamtu nih tumna hi kan ram chhiatna bul, sawrkar dik lohna bul a ni. Ram leh hnam tan hmasawnna kawng zawh ngaihna a awm lo chauh pawh ni lovin Mizote piangsual leh kutdawh rilru pua siamna bul a ni. Dikna leh felna ṭhatna leh rinawmna ten hmun an neih theih lohna rama siamna a ni. Chutiang chu kan ni mek tawh a, politics dika ram inkaihhruai a ngaiin kan mipuite leh kan ram siam ṭhata din thar a ṭul hle a ni.
8. Kristian political movement hmasa ber a piang ta: Kristian Political Movement hmasa ber (the first ever Christian Political Movement - ZPM) a lo piang ta hi ropui ka ti. Pastor 80% vel chuan ZPM Christian political movement hi an support a, Kohhran leh Kohhran Upa tam tak, ṭhalai tam tak, nu ho taima taka ṭawngṭai ṭhinte leh naupang te leh Mizoram pawn - India leh foreign-a Mizo awm zawng zawngten he Movement an support hi ropui ka ti a, hei hian election boruak pawh a siam ṭha hle a ni.
He Kristian political movement (ZPM) hian a tum ber chu Kristian ram kan nih angin Mizoram sualna chi hrang hrangin a run leh tihchhiat mek hi siam ṭhat a, Pathian ram din hi a ni. Party politics bansan a, ram inkaihhruaina - politics - dik tak hmanga kan ram leh hnam hi kan kaihhruai a ṭul tawh takzet a ni.
- Rev. Dr. K. Thanzauva