Mizo MLA an lei theih dawn em ni?

MLA inthlan a zo tawh a, vote chhiar hma hian India ram state danga thil thleng ṭhin, Mizoramah pawh thleng ve thei mai tura an sawi hi a thlen a rinawm lohzia hi sawi a ngai. MLA hi tu pawh ni se, khawi party mahin pawisa hian an lei chhuah theih ka ring lo - he MLA hi Mizo a nih chuan lei theihin a awm duh ngai lovang.

India rama inthlan hnu­hnung ṭhenkhata thil thleng dan an sawi chu MLA nei tlem zawk BJP-in sorkarna an siam leh ṭhin a, sorkarna an siam theih chhan chu ‘thlawptu’ an neih ṭhin vang niin chung thlawptute chu BJP-in pawisa tam tham tak pein a leiin an lei tih an sawi. He inleina an sawi hi a ruka inleina tih ṭit ṭet a ni lova, langsar takin an inlei niin national media lam pawh hian an puang pawp pawp mai a, Vai ho hian hetianga inlei pawp pawp hi an kalpui ni ngei tur a ni, media lam rengin an sawi uar.

Mizoramah pawh an insawi ṭhaih chu, “ZPM hi inde­pendent candidate an ni a, BJP-in an la lei zo vek ang,” tihte a ni. Ṭhnenkhat chuan, “MNF leh BJP hi NEDA-ah thawkho sa vek an ni,” tihte a la ni leh bawk. BJP-in MLA pahnih khat lek neiin a bak zawng an lei khawm dawn, ti pawl an awm a, hei hi thil thleng thei niin a lang lo. Mizoramah chuan tumahin mahni zahawmna hralhin BJP hnuaia kun turin pawisaa inleitir an duh lovang - Mizo pangngai, chutah pawh MLA chin tan chuan duh tur a ni lo.

MLA te hi kan dah sang em em a, MLA chin hi chu vantlang chuanglam an nih bakah Mizoram tana rorel tura a thlana kan thlan chhuah an ni. An zinga mi tute mah hian tumahin pawisaa inlei tir hi an duh lovang. Inthlan hmain BJP thawhpui an awm loh thu party zawng zawngin an sawi fel vek tawh a, chuvangin Chakma leh Tuikuk awmna biala MLA pahnih khat neih theih tum BJP hian tu MLA mah hi an lei dawn lo.

Congress-in BJP chu engti kawng maha an thawhpui loh tur thu an sawi tawh. Congress President Pu Lal Thanhawla sawi dan phei chuan Chakma ADC-a an thawhhona pawh tihtawp vek a ni tawh a, BJP nen chuan engti kawng maha thawk dun thei an ni lo. MNF President Pu Zoramthanga sawi dan chuan, “Pathian leh kan ram tan, tih leh Hindutva hi a kal kawp thei lo hrim hrim,” a ti leh hmiah mai. MNF hian engti kawng mahin BJP hi an thawhpui thei dawn lo tih a sawi leh tawh bawk. ZPM lahin Val Upa Council hriatpuinaa rinawmna thutiam thlap MLA candidate an nih avangin BJP-in an lei theih mai mai turin an awm dawn lo, an inti leh bawk si.

Chuvangin, BJP-in an lei theih tur MLA chu sawi loh, a thawha thawhpui tur MLA pawh an nei dawn lo a ni, Mizo Kristiante tan thu lawmawm a ni, kan hlauh angin BJP hian thil an tithei dawn lo kan MLA-te an thitiama an rinawm chuan.

Congress-in ualau takin BJP an dem thu, BJP an thawhpui theih loh thu, BJP chu India tana hnawksak, sakhaw tenau leh hnam tlem zawkte tana hlauhawm tak an nih thu an puang dum dum a ni. MNF lahin BJP nena thawk dun anga puhna chu dawt a ni an tih mai bakah chutianga puh an lo ni ve ringawt pawh chu a huatin an hua a, chuvangin BJP han thlawp chu MNF tan chuan thil theih loh bur a ni; Pu Zoramthanga ngeiin a sawi nasa a ni. ZPM pawhin BJP lam ṭang an nih theih loh thu, BJP ideology chu an pawm theih loh thute an lo chhuah ve bawk a, chuvangin tumahin BJP an thawhpui dawn lo.

MLA-te zingah hian tumahin pawisa duh vangin BJP an zawm ngam lovang. Engtirna han ti ta ila- Kolasib pa ka lo ni ta a, Kolasib-a kan MLA thlan tlin hian a party awmna chhuahsanin BJP hi zawm ta se, Kolasib a lo luh hi Kolasib ṭhalaiin an phal dawn lo hrim hrim a ni. Congress/ MNF/ ZPM a nih vanga kan thlan tlin pa chu BJP-in lo lei thei tehreng pawh ni se, Kolasib hi damin a lut ngam dawn em ni? Heti zawng hian thil hi ngaihtuah tel ṭhin ila, Vairama khawi MLA emaw pawisa tam zawka thlem vanga ṭan zawng thlak an lo awm a nih pawhin hei chu Mizoram a ni a, Mizo-ah pawh MLA chin chu heti mai maia lei theih tur chi an awm lo.

Mizo MLA hi tumahin an lei thei lovang, suma lei theih tur hi mipuiin kan thlang tling lo. Mipui zah lova lei theih an lo awm a nih chuan a bial ṭhalaite’n tih tur an ni ve mai dawn, niin a lang. Tumah hi lei theih an ni dawn lo.

- Lalchhandama Chhangte