LAST MINUTE

Inthlan apiangin mi ṭhenkhat hian last minute a pawimawh tih an sawi ṭhin a, tun inthlanpui hi ṭha­hnemngai leh tihtak­zeta ka tel ve vawi khatna a ni a. Party Worker ṭhenkhatten ‘Last Minute’ an tih ni ta awm bera ka hriat chu, campaign hun a tawp chiah aṭangin a inṭan ve a, vote thlak zawh dawn thleng hi a ni awm mang e, ka ti ta a ni.

Inthlanna hung chhungah pawh hian ‘I.R.-ah ka thun ang che,’ tiin a la inbekbawr theih a, a nih loh pawhin ‘Chu mi kha mi zauva Agriculture Link road hi sunction awm sa vek a ni a, i chang dawn nia’ te pawh a la tih theih bawk a ni. A nih loh vek pawhin vote thlakna kalkawng biru deuh laiah Rs. 1000/- note thleh tet a la inahtir ṭeuh theih a nih hmel awm mang e, ka ti ta a ni.

Tin, tun inthlana thil ri thar, tun hmaa ri ngai lo a awm nual. Bank account no. in dil te, kum sawm danah sorkar a inthlak ṭhin a, tun ṭum chu kei ni lo sorkarna thlak thei tur an awm lo, kan sorkar ngei dawn, tih te. MLA candidate chu ṭha mahse C.M. ber a ṭhat loh chuan awmzia a awm lo, tih sawi rik a nasa hle bawk a, hei phei hi chuan kan ṭawngṭaina thu a tidanglam thei hial awm e.

Tin, kan pawl sawi chhiat fo lama in-candidate leh thut si te, kum 20 lai kan hnung zanga min vaw ṭhintu vote pek a ngaih leh si nasat ber ṭum a ni bawk. BJP zawm, zawm lo tih sawi nasat ber ṭum a ni a, a ruka lo zawm an awm kar si kum a ni bawk awm e. Ṭhenkhatin Presbyterian Sunday School zirlai zir nin­awm an tih nasat ber kum a ni bawk a, a ṭhen erawh chuan zir nuam an tih ber ṭum a ni.

Tin, inthlan niin zu in miten candidate leh party worker te pawisa dil kan hrat lutuk hi party tin leh Kohhran pawhin inzirtirna neih a ṭul hialin alang. Inthlan ni hian pawl tinin a buai zual tur mi 20 vel ruata an ei leh in tur pawh aṭul anga buatsaih a, khawi emaw lai kila a duh duh ei tur ang deuha buatsaih chiam hi kawng dik lo lama kal zel inzirtirna mai mai a ni. Hetiang vel hi district council hunah khan a awm ka hre lo, U.T vel aṭang khan tu te pawl emaw pawisa nei deuh khan mipui min tivir ṭana azual ta zel niin ka chhut a ni.

Tun inthlanah hian ZPM hian ram pumah inthlan boruak an tidaiin alang. MNF leh Congress chauh hi pawl lian awm chhun ni se tun ai hian an inbeih nat fe a rinawm, ZPM lo lian ve hian a kam ki-a boruak a ziaawm niin a lang bawk a, chu lovah MPF ṭanlakna hian awmzia a nei thui hle a, tun aia an ṭan zel a ṭul khawp mai.

Kuminah hian EVM ṭhat loh vanga inthlan kaltluang lo tam ber ṭum niin a langa, he tah hian sorkar pawhin a leh pekah chuan fimkhur taka hma a lak a ṭul hle a ni.

Tichuan, ZPM hian mite angin pawisa nei ve mah se pastor-te uapna hnuaiah hi chuan ‘Last Minute’ hi an hmang thiam ve tak tak chuang lo vang. An kal dan hi a cool ru riau.

- Khualluna Pautu