Hello December

Pathian zara dam chuan hei December thla kan thleng ta chu a ni a, a va lawmawm em. Kum bul aṭanga chhut phei chuan kan hmelhriat te ngei ngei pawh kutchang thleh nghauh nghauh tham te’n min boral san a, keiniin hetia kum tawp kan han thleng ve ngawt hi a chhan eng dang mah a awm lo ang - kan vanneih vang a ni tih ngawt mai loh chu.

Nia, kan vannei thlawt a ni. Buaina leh harsatna neuh neuh chu kan tawk ṭheuh ang, a ṭhen phei chuan tawrh zawh loh tur khawpa lian harsatna kan tawk ngeiin a rinawm a, tunah chutiang zawng zawng kal pel chuan kum tawp kan han thleng thei hi a lawmawm a ni. Naupan lai hun aṭanga kan lo nghahhlelh em em kum tawp chu kan thleng ta a ni mai a, han ngaihtuah let leh mah teh, kumin January thla kha nimin lawk ang maiin kei chu ka la hria asin. March thlaa ka thil tawn te kha ka tan chuan nimin lawk ang mai a ni asin. Dam chuan hun hi a kal zung zung mai a, June thla te pawh nimin lawk ang maia a liam tak hi. Hun kal chak ang hian mihring nun hi kal chak ve sela chuan hetiang tur em em hi chu a ni bik hian kan ring lem lo a, nimahsela a ni miau bawk si lo a, hun leh tuilianin tumah a nghak lo an tih ang maiin an liam zung zung chu a nih hi.

Nipui lai huna thlantla phunga kan awm a, nisa kan tawrh theih loh em em te kha liamin tunah chuan duhthawh em emin nilum kan ai tawh a, duh aia rei kan awm ziah lehnghal a, zing nilum ai paha thingpui in lah tui bik riauin kan hre bawk nen. He hun hi chu a nuam ve a nih ka ring a, zing kan han tho chhuak hi nguar bur a awm lem lo a, mitin hi kan harhvang em ni? tih turin kan zangkhai em em vek maiin a hriat a ni.

Nimin lawka chhun hnathawhna hmuna thawmhnaw pan tak nena awm reng ṭhin kha tun hunah chuan thlak danglam a lo ngai ta a, thawmhnaw lum lam inbel a lo ngai a, office chhunga fan-in chhem tir lo a awm thei lo ang hial te pawh khan tunah chuan thli vawtin a chhem hlek pawh an lo hlau ta thung a, a thente chuan kawrlum chauh duh tawk loin nghawng awrh lum chi an la awrh bawk a, vur rama cheng ang maiin an inthuam ta.

A dik alawm, thlasik boruak hi chu a nuam thlawt a ni. Nakin lawkah Lal pian champha kan thleng mai dawn tih pawh tuma hrilh hranpa ngai loin kan hre vek bawk a, kan titi tui ber pawh ‘Engtiknge kumtawp inthlahna kan siam ang’ tih te ‘engtiknge keini ho hian Advance Christmas kan hman dawn’ tih te a ni nuk tawh a, mitin thinlung hi a zangkhai vek tawh mai a ni. Thlawhhma nei te pawhin a rah an seng tawh a, hah thi kula an lo thawh rah chu in an thlen tawh hlawm a, taksa ti hahdamin a thente chuan ‘khawilai mual ah nge Behai kan kam ang?’ tih te pawh an ngaihtuah ngei ang le.

Keini hun lai kha chuan kumtawp school chawlh a nih hi chuan Vaithang nen Chul ramah thian hoin kan riak lut ṭhin a, a neiin silai an keng bawk a, buhpawlin mutna nuam tak kan siam a, mutna phah fel tawh hnuah hian lehkha kan deng ṭhin a, ral lehlamah hian Chingpirinu a rawn hram dut dut bawk a, thawm dang hriat tur awm hek lo le, bengah a ring duh viau ṭhin mai.

Khawpui lamah pawh he hun lo thleng turin mitinin kan urlawk nasa hlawm ngang mai a, thawmhnaw zuar te lah chuan a hma daih aṭang tawha foreign leh hmun hla tak tak aṭanga an lo chah tawh thawmhnaw chi hrang hrang an zuar chhuak ṭan a, design thar nalh tak tak te chuan mit an la hlawm em em a. Hlim takin an zuar a, a lei tute lahin zangkhai takin an dawr bawk a, lo thlir rengtu tan pawha lungawihthlak turin huatthu hi an sawi mawlh lo a ni.

Bazar-a kal a nuam tawh a, mi kan tam tawh mai bakah hmel hriat hlui tak tak te kan hmu leh nawlh ṭhin a, khaw hla tak tak aṭanga chakkhai rawn la te nen pawh in hmuh fuh leh zauh chang a lo awm bawk a, rem leh rem loa kan han inchibai nawk nawk ṭhin te hi a nuam dangdai riau ṭhin asin. Mitin hi kan hmanhmawh em em vek maiin a hriat a, ni a rei lo chu a ni ngei mai tak a, chumi piah lamah chuan Jerusalema naupiang chibai kan buk hman loh mawlh hi kan hlauh ber chu a ni.

Kohhran lam lahin Kumtawp ro an rel ṭan a, Masi thlenin tur an ngaihtuah a, a ṭhente chuan khawilai bawng nge kan kaih ang tih an rel bawk. A ṭhenin sial ngeia Lalpiang lawm an tum bawk a, nun hi a va nuam tawh tak em. Chhungkaw tin hnenah kum hmasa aia tamin thawhlawm an tuk lahin tumah chuan phunnawi an tum lem lo a, an lawm zawk emaw tih mai turin Kohhran hruaitute chu an dawngsawng vek mai a. Khawpui ai mahin thingtlang lama Kohhran hruaitute chu hetiang hunah hian kan ngaina bik riauin ka hre lehnghal.

He huna naupang ber aṭanga kum upa ber thlenga thawmhnaw thar kan lawm chhan pawh hi eng dang vang mah a ni hleinem - he a pianchampha kan hma lawka lo thleng tur nau piang hi mitin tana piang a nih tlat vang alawm.

Hello December, mitin hnenah hlimna thlen mawlh teh le...

- Mahmuaka Chhakchhuak