Bawng inah a piang lo, Khualbukah zawk a ni
Vanglaini, December ni thum, Editorial hnuaiah khan Rinfela Zadeng ziakah khan, ‘Mari chuan rai puar ṭeuh chungin ran in tlawm tak mai kha a bel ta tih kan hmu a’ a rawn ti ve leh mai a. Chanchin Ṭha ziaktu Luka hian keiniho ai hi chuan a hriat chian hmel a, a ziak dan chuan Bung 2:chang 5-7 : Bethlehem an tihah chuan an kal ta a. Tin, heti hi a ni a, chuta an awm lai chuan a hrin a lo hun ta a, tin, a fa tirah mipa a hring a, puanin a tuam a, khualbuka an len ve tak loh avangin ran chaw pekna thlengah a muttir a.
Chanchin Ṭha Luka ziak hi han chhiar nawn leh mah teh. A ziak dan hi chuan Khualbukah a lo piang ta mai si a, mipa tak a lo ni lehnghal a, puanin a tuam a, nau nei hlim nen chuan khualbuk, mi tamna hmuna awm ve chu a rem ta lo va, an leng ve ta lo va. Ran chaw pekna thlengah a muttir ta mai niin a lang. Bawng ina piang niin a sawi lo. Bawng ina piang ni dawn ta se, fa tirhah mipa hrin phawt a, puana tuam hnuah a hring tihna em ni ang, a va mak awm ve?
Khualbukah a piang a, an len ve tak loh avangin ran chaw pekna thlengah an muttir a ti a ni lo vem ni?
Thil hriat sual hi pawi tak asin, Hmanah kei pawh Vanglaini-ah hian Darbu lei tur kan duh e, tih an rawn ziak a. Darbu chu ka nei a, chutianga mi pawimawhten an mamawh si chuan ui deuh mah ila hralh mai a ṭhat dawn chu tiin ka ngaihtuah a. Darbu lei tur ka neih thu chu ka hrilh a.
A zan a zanin Pu K. Sapdanga leh a nupui te chu an lokal ta a. Ka darbu chu ka phawrh a, kan entir nak chuan: an duh ang a lo ni hlek lo mai a. An duh chu Darmang, tumpawn nei, a mal pawha vuak ṭhin ang kha a lo ni a. Anmahni khan Darmang kha Darbu emaw an lo ti a, a zan a zanin kan in an lokal thleng ṭhak mai a. A zia lo lam a ni, a zia lam a awm chuang bawk si lo.
Darbu leh Darmang chu hre hrang awm rualah ka lo ngai rawk a, tun thlengin ka Darbu chu roh takin ka la kawl ve ta reng a ni.
Chutiang bawkin Chhandamtu lo piang pawh hi Khualbuk-ah a piang phawt a, phuanin a tuam a, chumi hnuah ran chaw pekna thlengah a muttir ta chauh tihin a ziak tih hria ila. Keiniho em ai hi chuan a ziaktu hian a hre chiang deuh zawkin ka ring a, a ziak hi rin tlak a ni bawkin ka hria. A ziah dan ang lova sawi ṭalh chu a ṭha lo vang.
Mizo Kristiante hian kan Lal Isua pian thu pawh hi kan hre chiang fumfe hlawm lo a nih hmel a, Bawng in, ran ina piang ni angin kan sawi ṭheuh hlawm mai a. Krismas a lo thleng leh mah nang a, bawng ina piangah kan chhuah leh hlawm mai hmel. Luka ziak hi chhiar chian deuh a ṭha ngawt ang. A ziak dan ang hian sawi a ṭha.
- H. Zakhawla