MLA BIAL FANGIN A MOTOR-AH INDIAN NATIONAL FLAG A TAR

Tunlaia Mizoram titi lar tak tak leh social media luah hneh em emtu zinga pakhat chu Dampa bial MLA, Pu Lalrintluanga Sailo-in a bial fanna motor-a a tih loh tawp tur, Indian National Flag a tar thu hi a ni.

MLA atana thlan tlin a nih hma lawk khan a bial khaw pakhat Phuldungsei a tlawh ṭumin an lo hmuak a, khua a luh dawn chuan mi pawimawh (VVIP) te chauhin an tih rik ṭhin ‘siren’ a tih rik thu Phul­dungseia kan party senior pahnihin min rawn hrilh nghal a. Kei chuan, “State hotute zingah chuan Governor leh CM te chuan an hmang fo ṭhin a, Sawrkar Laipui-a BJP an sorkar hnu hian VIP kalphung tih tlem nan hei pawh hi khap telin a ṭul tawpa tih rik tur erawh chuan an pai reng a ni awm e,” tiin ka chhang a.

Mizoram mipuiin kan aiawha roreltu tur kan thlan hmasak ber District Council Member, an rorelnaa an thusawi leh chet dan, a hria leh a taka an thawhpuite sawi ngaihnawm tak tak leh nuih tiza em em member kan ngah tawhzia leh vawiin thlenga chutiang mi kan la ngahzia hriat hian tunlai hun atan chuan nuih an tiza tawh lo a, thin an tirim tawh zawk a ni.

Kan sawi tak ang khan tunlaiah social media a lo chak tawh avangin MNF MLA pakhat bial fangin a motor-a Indian National Flag a tar, lar ta em em ang hian District Council aṭanga kan aiawh atan kan thlante kha an hun laia an chet dan mawlmang tak tak tarlan tur tam tak a awm a ni.

Hun rei tawha mi sawi lovin Mizorama rorelna fawng vuan rei ber Congress Sawrkarah pawh khan sawi tur an nei lo bik lo. Pakhat, keima tawnhriat ngei kan sawi teh ang. Congress Party-a ka awm lai leh ADCC General Secretary ka nih lai khan ṭum khat chu MLA pakhatin (a hming sawi rih lo ila) a biala khaw lian ber tlawha zan hnih riak turin min sawm a. Tukṭhuan ei khamah a driver nen min rawn sawm a, Jeep hlui la ṭha deuh tak rawn kengin Indian National Flag, motor hma lai takah an rawn tar a.

Kan in aṭanga kan chhuah dawn chuan driver hnenah chuan, “Hei hi kan tar tur a ni lo ve, a aiah Congress Flag tar tur zawk kan ni,” ka ti a. “Congress Flag tar tur kan keng lo,” an ti a. “Keiman ka nei alawm,” ka ti a. Congress Flag tê ka kawl chu kan tar ta a. Chu pawh chu Indian National Flag ai chuan lian tak a la ni.

Kan MLA pawh chuan sawisel lovin kan zin chhung chu Flag tar leh tar loh thua kamkhat pawhin kan sawi zui ta lo a, kan zin haw kar khat velah kan MLA chuan kan la fan loh a bial fangin a zin chhuak leh ta a. Hemi ṭum erawh chuan Indian National Flag tar chungin a bial a fang ta a, he thu hi Aizawl a lo kir leh hma khan Congress Bhavan titi ber pakhat a ni nghe nghe a ni.

Pu Lalrintluanga Sailo, MLA pawh hian a tih loh tawp tur ni awm tak a ti a, mahse, amah hre chiangtute chuan mak kan ti hauh lovang; a tihawm tak ti maiah kan ngaih mai ka ring. Phuldungsei khua a luh dawna ‘Siren’ a tih rik thu miin min hrilh pawh khan ka lo engto lem lo a, tuna a Flag tar thu an sawi takah chuan Congress Sawrkarah pawh sawi tur awm lo khawpa fihlim an ni bik lo, tih ka’n sawi lang ve a ni e.

- MC Lalrinthanga