Kuhva tawlhtu tana ngeiawm FIR thehluttu

Champhai DC-in a khat tawka kuhva tawlh a man zeuh zeuh leh a hâl zeuh zeuh kha chanchinthar lian tham em em a ni hran lo a. Kuhva tawlhtu pakhatin Champhai DC laka FIR a thehluh khan chanchinthar lian, mite ngaihven, sorkar lai pawh phut zawkna tham tur a ni a, a buai pawh kan buai zui ta hle reng a.

Kuhva tawlhtute leh mi kuhva tawlh phurtute chuan Champhai DC an ngei hle a, a phur ṭhintu lam phei chuan sorkarah sawn chhuak turin an ngen hial. Kuhva tawlhtute tan lah harsatna siam a, ralṭi reng renga awmtir ṭhin DC kha a ngeiawm a, a awm loh chuan an thaw a veng huai dawn a ni.

Mahse, kha FIR khan kawng lehlamah nghawng ṭha lo tak a nei a, a tuartute chu kuhva tawlhtute leh a phurtute an ni.

FIR kha thehlut lo se, Zoram mipuiin kan ngaihven tehchiam lo ang a, kuhva hmanga sumdawnna hi a hma ang deuh rengin a kal ang. Mahse, FIR an han thehluh khan mipui an ṭangrual a, kuhva hmanga sorkar phal loha sumdawnna kha mipuiin ṭha an ti ta lo a, dodalna a pung a, inhnamhnawih nih pawh zahthlak lamah a kal ta mek.

Kuhva phurten an paltlang ṭhin khuate an khauh tial tial a, sorkar tan lah tlawmngai pawlten an enzuipui avang leh, sorkar an nawr tlat avangin a hma aia an khauh a ngai ta zawk a. Hetiang a nih takah chuan a tuar bertute chu kuhva tawlhtute leh a phurtute an ni.

FIR kha thehlut lo se chuan, ngaihven leh ngaimawhna em em awm loin, a hma angin kuhva an la tawlh thei ang a. A khat tawkin man tâwk an awm zeuh zeuh ang, mahse tunah chuan an vai maiin an tuar ta a ni. FIR thehluh a nih tak avang khan kuhva tawlh lama hlawkna chang ve hlek tawh chin chu an ṭi dûk tawh a, chu chuan an eizawnna a nghawng ta viau a ni.

Kuhva tawlha sumdawngte tana ngeiawm ber tur ni ta leh, an eizawnna kaltluang lai titawp a, mite huat hlawhtirtu ni ta ber chu FIR thehluh kha a ni ta a ni. FIR thehluttu khan ama ṭanghma a hai avangin a eizawnna anga eizawngte a tichêp a, anmahnia innghat, bungraw phur­tute thlengin a tichêp a, an eizawnna a tih­chhiatsak zawk a ni.

A tirah chuan a ṭhiante tana thil ṭha ti angah an ngai maithei a, amaherawhchu a rei tial tial a, a tuar nasatute chu a ṭhian­ te leh anmahni sangawi­zawnpuite an ni.

Champhai DC ai chuan, kuhva tawlhtute tan chuan FIR thehluttu kha a ngeiawm ber zawk tawh awm e.

- Ramropuia