MBSE bul kawngpui leh sum indaih lo

Mizoram sorkar chuan hripui len laiin pawisa a neih loh thu a sawi chungin a ngaih pawimawh em em Chaltlanga MBSE Office peng aṭanga DIET Peng, Ramhlun North lam panna kawng chu a siam ta mup mup mai. Hei hi mipui tan a ṭangkai turzia pawh nasa takin an thehdarh mek a, a ṭangkai dawn tih pawh hi i ringhlel lo ang u.

Hei aia sum sen tlem zawka kawng chhak leh kawng thlang kal pawhna remchang tak hi a piah lawk, tuna Transport Office atana an hman mekah hian a awm a, sorkar tan pawh kawng chhawng (lem lem) siam belh ngai lo hian sum tlem te sengin zal nuam takin compensation pek ngai miah si lovin a siam theih tih hi kei BA pass ve ṭawk ṭawk pawh hian ka hmu thiam tlat a ni. Chuvangin, zeldin thu ka han sawn zui vel mai mai ang e.

"E khai.... Covid avangin kawng chhawng kha kan siam leh thei ta lova, chuvangin tuna kan siam chin ringawt hi han en te che u. DIET peng aṭanga MBSE panna kawng hi a zal nuam tawh asin, hetiang hian min thlan tlin leh chuan kan la siam zel ang," tiin kum 2023 chawhnu lam hi chuan tu emaw hian a sawi ang a. Tute emaw chuan Facebook-ah an post phur em em ang a, midangtein Whatsapp lamah an vawrh darh bawk ang a, ṭhenkhatin an awih em em ang a, ṭhenkhatin an awih lo let tawp ang. Ṭhenkhat an lawm ang a, ṭhenkhat an nui ang - tihte hi keia rilru sualah hian a lo awm der tawh a ni.

Kawng siam ṭhat hi a ṭha a, mahse pawisa nei lo chunga khawih atan chuan a uiawm lutuk a ni. Helai siamna atana an hman hi UD&PA pawisa niin an sawi a, pawisa hi a awm tho tho a nih pawhin hei aia khawih atana ṭha hi a awm.

Aizawl West aṭanga kawng­pui chhuah chhohna tura CM Bangla hnuaiah hian emaw High Field bul vela chhuah theihna kawng hi LMV zawh theih pawh awm se a zia hawk ang. Electric Roman Catho­lic Biak In bula kawng ulh em em pawimawh si pawh hi han dawh ṭha zawk se a chhawrtu an tam dawn sia.

- Lalthankima