Sorkar thu ngaichang chungin Dawr khar loh dan dap ang aw

Covid 19 hripui vangin hun rei tak chhung hna thawk thei loin kan awm tawh a, mi tam tak chu ei tur takngial pawh an harsa tawh a ni. 

Veng ṭhenkhatah phei chuan pawisa sem hial a lo ni ta a, mi ṭhahnemngaiten pawisa an thawh a, an entawntlak hle. 

Sorkar pawh hian hetiang boruaka mipuite kan awm tak avang hian Aizawl pum lockdown ang chi kha chu a tih tawh loh a rinawm a, mipui pawhin kan zuam tawh lo hle tih kan thawm aṭangin a hriat theih. 

Veng bil lockdown ang chi pawh hi tih tawh loh hram a duh­awm - khawi lai area emaw te tih loh chu. 

Mizoram hi India rama in lockdown rei ber kan ni a, mahse hri kai kan pung zel tho niin alang. 

Hetiang boruak kan tawn mek lai hian Aizawl chuan dawr hawn hun inchhawk (dawr indawta awmte tan) a hawn ṭhin a ni a. Mahse ṭhenawm nei ve lo dawr mala awm te tan erawh ni kar thlaka dawr khar kher hi thil ṭul a ni lo tih sorkar thuchhuah (SOP) ah khan tarlan a ni. 

Hetiang a nih avang hian midangte nena in tlat pawlh leh fimkhur ngai bikte a nih loh chuan dawr mala awm ho te hi chu ni kar thlaka khar tir ve kher loh ni se. Veng ṭhenkhat LTF ten thil hriat fuh loh an lo nei palh a nih pawhin mipui manganna hriatthiam pui se. Fimkhur tak chunga eizawnna lam kan dah pawimawh a ngai ta khawp mai. 

Entir nan - Bawng­kawn, Zemabawk, Kulikawn etc. hetiang veng Aizawl khawpui chhung hu lum laia awm ni lem lote tan phei chuan veng hmawr lama dawr leh eizawnna hmun te chu ni kar thlaka inhawn leh inkhar tir ve kher ngai lote pawh a awm thei ang.  

Dawr neituten a tam thei ang dawr an hawn a, eizawnna a tam thei ang kan kal­pui thiam a pawi­mawh a, dan zawm chungin a tam thei ang ber eizawnna kan kalpui thiam a ngai ta a ni ber mai. 

Mipui eizawnna hi kan ngaih pawimawh sak thiam loh a, sorkar thu baka mahni veng LTF ten khauh taka eizawnna tibuai thei zawnga thu rel ching lo ila a duhawm hle. 

He hri hi dawr khar leh in lockdown avanga reh thei a ni lo tih chu khawvela in lockdown rei ber, Peru ram aṭang chauh pawhin a hriat theih mai a ni. 

Chuvangin, mahni veng chhung ṭheuhah fimkhur tak chunga eizawnna awm thei ang (dawr kher lo pawh) khar loa a tam thei ang ber kalpui theih dan veng tin LTF ten ngaihtuah sak se a duhawm hle.